ព័ត៌មានអន្ដរជាតិ

អាមេរិកមានបំណុលជាតិធំជាងគេបំផុតលើពិភពលោក តើអាមេរិកជំពាក់នរណាខ្លះ?

បានផុស

១ year មុន

នៅ

ថ្ងៃចន្ទ ១០ កុម្ភៈ ២០២៥

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ បានលើកឡើងកាលពីថ្ងៃអាទិត្យថា បំណុលជាតិរបស់អាមេរិកប្រហែលជាមិនខ្ពស់ដូចតួលេខនោះទេ ដោយសារតែ «ការក្លែងបន្លំ» ហើយថា រដ្ឋបាលរបស់លោកកំពុងត្រួតពិនិត្យលើការទូទាត់បំណុលរដ្ឋាភិបាល។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បច្ចុប្បន្ន សហរដ្ឋអាមេរិកមានបំណុលជាតិ ឬបំណុលសាធារណៈ ចំនួន ៣៦,២ ទ្រីលានដុល្លារ ឬស្មើនឹងជាង ១២០ ភាគរយ ធៀបនឹងផលិតផលក្នុងស្រុកសរុប។ នេះបើតាមទិន្នន័យពីក្រសួងរតនាគារអាមេរិក។ តួលេខនេះបង្ហាញថា សហរដ្ឋអាមេរិកមានបំណុលជាតិច្រើនជាងគេបំផុតនៅលើពិភពលោក។

ដោយសាររដ្ឋាភិបាលសហរដ្ឋអាមេរិកចំណាយច្រើនជាងចំណូល លោក ត្រាំ និងសមាជិកសភាមកពីគណបក្សសាធារណរដ្ឋ នឹងត្រូវអនុម័តការខ្ចីប្រាក់បន្ថែមទៀតនៅឆ្នាំនេះ ដើម្បីជៀសវាងការសងបំណុលមិនរួច។ ការណ៍នេះនឹងធ្វើឱ្យបំណុលជាតិកើនឡើង ខណៈអ្នកជំនាញផ្នែកថវិកាឯករាជ្យលើកឡើងថា ការកាត់បន្ថយពន្ធដែលលោក ត្រាំ ស្នើឡើង រួមទាំងការកាត់បន្ថយពន្ធសាជីវកម្ម ក៏រួមចំណែកដល់កំណើនបំណុលផងដែរ។

បំណុលជាតិអាមេរិក សំដៅលើបំណុលដែលរដ្ឋាភិបាលសហរដ្ឋអាមេរិកជំពាក់តាមរយៈការចេញមូលបត្រកម្មសិទ្ធិ សញ្ញាប័ណ្ណ ឬប័ណ្ណរតនាគារ ទៅឱ្យអ្នកវិនិយោគ ឬម្ចាស់ឥណទានទាំងក្នុង និងក្រៅស្រុក។

តើនរណាខ្លះជាម្ចាស់បំណុលជាតិអាមេរិក?

ប្រព័ន្ធបម្រុងទុកសហព័ន្ធអាមេរិក: ៤,៧ ទ្រីលានដុល្លារ
សន្តិសុខសង្គម និងទីភ្នាក់ងារផ្សេងទៀតរបស់សហរដ្ឋអាមេរិក: ២,៤ ទ្រីលានដុល្លារ
វិនិយោគិនបរទេស: ៨,៧ ទ្រីលានដុល្លារ
វិនិយោគិនអាមេរិក និងម្ចាស់បំណុលសហរដ្ឋអាមេរិកផ្សេងទៀត: ១៩,៧ ទ្រីលានដុល្លារ

ចំពោះវិនិយោគិនបរទេស ប្រទេសជប៉ុននាំមុខគេនាំមុខគេលើម្ចាស់បំណុលជាតិអាមេរិក សរុបជាទឹកប្រាក់ ១ ០៩៩ ប៊ីលានដុល្លារ បន្ទាប់មកគឺចិន ៧ ៦៨,៦ ប៊ីលានដុល្លារ ចក្រភពអង់គ្លេស ៧៦៥,៦ ប៊ីលានដុល្លារ និងលុចសំបួ ៤២៤,៥ ប៊ីលានដុល្លារ៕