ព័ត៌មានអន្ដរជាតិ

វៀតណាមព្រមានពលរដ្ឋខ្លួន ឱ្យប្រយ័ត្នចំពោះទុរេនដែលចិនឃាត់មិនឱ្យនាំចូល

បានផុស

១ year មុន

នៅ

ថ្ងៃព្រហស្បតិ៍ ២០ កុម្ភៈ ២០២៥

ដោយ

អាជ្ញាធរវៀតណាមបានព្រមានពលរដ្ឋខ្លួន ឱ្យមានការប្រុងប្រយ័ត្ននៅពេលទិញទុរេនដែលលក់ធូរថ្លៃនៅលើទីផ្សារ ដែលចិនហាមឃាត់មិនឱ្យនាំចូលដោយព្រួយបារម្ភពីការផ្ទុកសារធាតុគីមី។ នេះបើតាមការចុះផ្សាយរបស់កាសែត VnExpress កាលពីពេលថ្មីៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីខែមុន អាជ្ញាធរចិនបានចេញស្ដង់ដាររឹតបណ្ដឹងថ្មីលើការនាំចូលទុរេនពីថៃ និងវៀតណាម ដោយតម្រូវឱ្យមានការត្រួតពិនិត្យលើសារធាតុគីមី Basic Yellow 2 ដែលអាចបង្កជំងឺមហារីក។ ចំណាត់ការភ្លាមៗបែបនេះ ធ្វើឱ្យអ្នកនាំចេញវៀតណាមជួបបញ្ហា ដោយសារតែមិនអាចឆ្លើយតបឱ្យបានទាន់ពេល ជាហេតុធ្វើឱ្យពួកគេត្រូវដឹកជញ្ជូនទុរេនមកវិញ ឬត្រូវជាប់គាំងនៅព្រំដែនចិន។

ក្រោយមក គេមើលឃើញថា តម្លៃទុរេនក្នុងស្រុកវៀតណាមបានធ្លាក់ថ្លៃខ្លាំង រួមទាំងការលក់នៅតាមផ្លូវ និងលើអនឡាញ។ យ៉ាងណាមិញ ការណ៍នេះបង្កការព្រមានពីអ្នកជំនាញវៀតណាម ឱ្យអតិថិជនមានការប្រុងប្រយ័ត្ន។

អគ្គលេខាធិកាសមាគមបន្លែ និងផ្លែឈើវៀតណាម លោក Dang Phuc Nguyễn បានកត់សម្គាល់ថា ការដឹកជញ្ជូនទុរេនមួយចំនួនត្រូវបានបង្វែរមកវិញ ដោយសារមិនបានបំពេញតាមស្តង់ដារគុណភាព។ មន្រ្តីម្នាក់ទៀតនៃសមាគមដដែល បាននិយាយថា៖ «ទុរេនដែលត្រូវបានបង្វែរមកវិញចំពោះការមិនបំពេញតាមស្តង់ដារគុណភាពនាំចេញ អាចបង្កហានិភ័យ [សម្រាប់អ្នកប្រើប្រាស់] ប្រសិនបើលក់ក្នុងទីផ្សារក្នុងស្រុក»។

សមាគមបានកត់សម្គាល់ថា នៅថៃ ដែលជាប្រទេសផ្គត់ផ្គង់ទុរេនធំមួយទៀតសម្រាប់ចិន អាជ្ញាធរតម្រូវឱ្យបោះចោលទុរេនដែលគេបង្វែរមកវិញ ដើម្បីការពារអ្នកបរិភោគក្នុងស្រុក។ សមាគមបានជំរុញឱ្យអ្នកជំនួញវៀតណាមធ្វើដូចគ្នា ប៉ុន្តែអ្នកខ្លះនៅតែព្យាយាមលក់ទុរេនរបស់ខ្លួនដោយប្រើនិន្នាការអនឡាញ (Trend) «សង្គ្រោះទុរេន» ដើម្បីស្រង់ដើមរបស់ពួកគេ៕