អេស៊ីលីដាធ្វើការបោះផ្សាយសញ្ញាបណ្ណធម្មតានៅដើមសប្តាហ៍ក្រោយ

ធនាគារ អេស៊ីលីដាជាធនាគារពាណិជ្ជទីមួយដែលបានបោះផ្សាយលក់មូលបត្រកម្មសិទ្ធិជាសាធារណៈនៅផ្សារ មូលបត្រកម្ពុជា  ត្រូវបានអនុញ្ញាតឱ្យចុះបញ្ជីលក់សញ្ញាបណ្ណធម្មតា (សញ្ញាបណ្ណបន្ទាប់បន្សំ) នៅផ្សារមូលបត្រកម្ពុជា​ចាប់ពីថ្ងៃទី២៤ ខែកុម្ភៈ ឆ្នាំ២០២៥ ដោយខ្លួននឹងធ្វើការប្រមូលទុនពីការបោះផ្សាយនេះជាង៨៥លានដុល្លារដើម្បីពង្រីកការផ្តល់កម្ចីទៅអតិថិជន។
​

យោងតាមសេចក្តីប្រកាសព័ត៌មានរបស់ធនាគារនៅថ្ងៃទី១៩ ខែកុម្ភៈ សម្រាប់ទំហំបោះផ្សាយសរុបៈ ៣៤៣,៣៥​ប៊ីលានរៀល (ឬជាង៨៥លានដុល្លារ) ជាមួយរូបិយបណ្ណជាប្រាក់រៀល ដែលមានតម្លៃចារឹក ១សែនរៀល ក្នុងមួយសញ្ញាបណ្ណ។ ចំពោះសញ្ញាបណ្ណនេះមានរយៈ៧ឆ្នាំ (២០២៥-២០៣២) គិតចាប់ពីកាលបរិច្ឆេទបោះផ្សាយ និងមានអត្រាគូប៉ុង ៨.៥០% ក្នុងមួយឆ្នាំដែលទូទាត់ជាប្រចាំត្រីមាស។

កាលពីថ្ងៃទី២៥ខែមករា ធនាគារនេះបានប្រកាសថា ជាមួយនឹងផែនការនៃការគ្រោងកៀរគរទុនប្រមាណ១០០លានដុល្លារ ក្នុងការធ្វើបរិវិសកម្មរបស់ខ្លួនក្នុងដំណាក់កាលទីមួយ គឺខ្លួនបបានទទួលការបញ្ជាទិញគិតជាទឹកប្រាក់ជាង៨៥លានដុល្លារ ​។

​​​​​លោក ស៊ូ សុជាតិ អគ្គនាយកនៃនិយតករមូលបត្រកម្ពុជា បានថ្លែងមកកាន់កម្ពុជាថ្មីកាលពីពេលថ្មីៗនេះថា ការអនុញ្ញាតរបស់ NBC គឺជាការបើកផ្លូវដល់អេស៊ីលីដាក្នុងការរៀបចំនីតិវិធីបន្តដើម្បីធ្វើការបោះផ្សាយនូវសញ្ញាបណ្ណបន្ទាប់បន្សំនេះជាផ្លូវការ។

លោកបានថ្លែងថា៖«សម្រាប់សញ្ញាបណ្ណបន្ទាប់បន្សំនេះគឺប្រភេទមួយនៃសញ្ញាបណ្ណទូទៅ ដែលជាធម្មតាដែលភាគច្រើនត្រូវបានបោះផ្សាយដោយគ្រឹះស្ថានធនាគារដែលជាការកំណត់អាទិភាពនៃស្ថាប័នទាំងនោះក្នុងការបោះផ្សាយ»។​

កាលពីថ្ងៃទី១៥ ខែឧសភា ឆ្នាំ២០២០ ធនាគារអេស៊ីលីបានធ្វើការបោះផ្សាយមូលតប្រ​កម្មសិទ្ធិម្តងរួចទៅហើយនៅ CSX ដោយប្រមូលទុនបានចំនួន ១៧,៥ លានដុល្លារ៕