រាជដ្ឋាភិបាល ប្ដេជ្ញាលើកកម្ពស់ហិរញ្ញវត្ថុ តាមរយៈការកសាងប្រព័ន្ធអេកូឡូស៊ី

និយ័តករមូលបត្រកម្ពុជា​ សហការជាមួយគណៈកម្មការសេដ្ឋកិច្ច និងសង្គមសម្រាប់តំបន់អាស៊ីប៉ាស៊ីហ្វិករបស់អង្គការសហប្រជាជាតិ (UNESCAP) នៅថ្ងៃទី ២-៣ ខែមិថុនា ២០២៦ បានរៀបចំសិក្ខាសាលាកសាងសមត្ថភាពស្តីពី «ការកសាងប្រព័ន្ធអេកូឡូស៊ីហិរញ្ញវត្ថុប្រកបដោយចីរភាព៖ ការរាយការណ៍, ការត្រៀមខ្លួនផ្នែកទិន្នន័យ និងនវានុវត្តន៍​ឌីជីថល» នៅសណ្ឋាគារ ហៃយ៉ាត់ រីជិនស៊ី ភ្នំពេញ ក្រោមវត្តមានលោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនិយ័តករមូលបត្រកម្ពុជា និងលោក HamzaAli Malik នាយកផ្នែកគោលនយោបាយម៉ាក្រូសេដ្ឋកិច្ច និង​ហិរញ្ញប្បទានសម្រាប់ការអភិវឌ្ឍ នៃUNESCAP។

សិក្ខាសាលាកសាងសមត្ថភាពមានគោលបំណងពង្រឹងការយល់ដឹងអំពីប្រតិបត្តិការរបស់អ្នកអនុវត្តក្របខ័ណ្ឌការរាយការណ៍ និងការបង្ហាញព័ត៌មានចីរភាព, ពង្រឹងសមត្ថភាពស្ថាប័នចំពោះការត្រៀមខ្លួនផ្នែកទិន្នន័យបរិស្ថាន សង្គម និងអភិបាលកិច្ច (ESG), កសាងសមត្ថភាពស្ថាប័ន និងបច្ចេកទេសតាមរយៈដំណោះស្រាយ​ឌីជីថល និងហេដ្ឋារចនាសម្ព័ន្ធទិន្នន័យ និងពង្រឹងកិច្ចសម្របសម្រួលពហុភាគីពាក់ព័ន្ធដោយផ្តោតលើចីរភាព។

លោក ស៊ូ សុជាតិ មានប្រសាសន៍ថា៖ «ការកសាងប្រព័ន្ធអេកូឡូស៊ីហិរញ្ញវត្ថុប្រកបដោយចីរភាពតម្រូវឱ្យមានកិច្ចសហការយ៉ាងជិតស្និទ្ធិរវាងនិយ័តករ ដៃគូអភិវឌ្ឍន៍ ស្ថាប័នហិរញ្ញវត្ថុ និងអ្នកចូលរួមក្នុងទីផ្សារ។ តាមរយៈការកសាងសមត្ថភាព ការបង្កើនប្រសិទ្ធភាពនៃការរាយការណ៍អំពីចីរភាព និងការអនុវត្តការបង្ហាញព័ត៌មាន ESG ការត្រៀមខ្លួនផ្នែកទិន្នន័យឱ្យកាន់តែរឹងមាំ និងនវានុវត្តន៍ឌីជីថល យើងអាចធ្វើឱ្យប្រសើរឡើងនូវតម្លាភាព ពង្រឹងប្រសិទ្ធភាពបទប្បញ្ញត្តិ និងបង្កើតទិន្នន័យចីភាពដែលមានគុណភាពខ្ពស់»។

លោក ស៊ូ សុជាតិ បានបន្ថែមថា កិច្ចខិតខំប្រឹងប្រែងទាំងនេះ នឹងជួយកសាងទំនុកចិត្តរបស់វិនិយោគិន ទាក់ទាញការវិនិយោគប្រកបដោយចីរភាព និងគាំទ្រដល់ការអភិវឌ្ឍរយៈពេលវែងនៃទីផ្សារហិរញ្ញវត្ថុប្រកបដោយចីរភាពរបស់ប្រទេស​កម្ពុជា៕