ការបង្កើតសហគមន៍កសិកម្មទំនើប កើនដល់ចំនួន ១១

សហគមន៍កសិកម្មទំនើប«ម្ទេសដំណាក់ទ្រយឹង» ត្រូវបានបង្កើតជាផ្លូវការនៅថ្ងៃទី ០៥ ខែមីនា ឆ្នាំ ២០២៥ ដែលនាំឱ្យសហគមន៍កសិកម្មទំនើបកើនដល់ចំនួន ១១ សហគមន៍ គិតត្រឹមខែមីនានេះ។

សហគមន៍កសិកម្មទំនើប ដែលបានបង្កើតកន្លងមកមានដូចជា សហគមន៍ «បន្លែផ្ទះសំណាញ់ត្រាំកក់», សហគមន៍កសិកម្មទំនើបដំណាំស្រូវ, សហគមន៍កសិកម្មទំនើបស្វាយចន្ទី និងសហគមន៍មួយចំនួនទៀត។

តាមរយៈមហាសន្និបាតកំណើតដំបូងរបស់ខ្លួន ដោយមានសមាជិកចំនួន ១៨១គ្រួសារ និង​មាន​ផ្ទៃដីផលិតកម្មដំណាំម្ទេសចំនួនប្រមាណ៥២ហិកតា។

សមាជិកនៃសហគមន៍នេះសុទ្ធតែជាបងប្អូនអតីតយុទ្ធជន ដែលទទួលបានដីសម្បទានសង្គម​កិច្ច​ពី​​តំបន់អភិវឌ្ឍន៍ភូមិប៊ុនរ៉ានីសែនជ័យដំណាក់ត្រយឹង នៃស្រុកភ្នំក្រវ៉ាញ់ ខេត្តពោធិ៍សាត់។

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខា ប្រមាញ់ និងនេសាទ មានប្រសាសន៍ថា​គិតមកដល់ពេលនេះ មានសហគមន៍កសិកម្មទំនើបចំនួន ១១ ដែលមានការគាំទ្រ និងចាប់​អារម្មណ៍​ពីប្រជាពលរដ្ឋច្រើន ខណៈសហគមន៍កសិកម្មទំនើបផ្ដោតលើ​គុណភាព​ជាងបរិមាណ ដោយ​ពង្រីកវិសាភាពនៃទំហំសហគមន៍នីមួយៗឱ្យធំជាជាងបង្កើត សហគមន៍​ច្រើន។

បើតាមលោក ឃឹម ហ្វីណង់ គោលការណ៍នៃសេដ្ឋកិច្ចមាត្រដ្ឋានតម្រូវឱ្យ​សហគមន៍​មាន​ទំហំ​ធំ​ទើប​សមាជិកទទួលបានអត្ថប្រយោជន៍ពីការរៀបចំសហគមន៍កសិកម្មទំនើប៕