ព័ត៌មានអន្ដរជាតិ

ឥណ្ឌូណេស៊ីគ្រោងបង្កើនការនាំចូលប្រេងឆៅ និងឧស្ម័ន ពីអាមេរិកទ្វេដង ដើម្បីចរចាពន្ធ

បានផុស

២ ខែ មុន

នៅ

ថ្ងៃសុក្រ ១៨ មេសា ២០២៥

ដោយ

ប្រទេសឥណ្ឌូណេស៊ីគ្រោងនឹងបង្កើនការនាំចូលទំនិញថាមពលពីសហរដ្ឋអាមេរិក រួមទាំងប្រេងឆៅ ឧស្ម័ន LPG (ហ្គាស) និងប្រេងឥន្ធនៈចម្រាញ់ ដើម្បីជាផ្នែកមួយនៃកិច្ចខិតខំប្រឹងប្រែងបន្ធូរបន្ថយភាពតានតឹងពាណិជ្ជកម្មជាមួយអាមេរិក និងដោះស្រាយសម្ពាធពន្ធគយ។ នេះបើតាមការចុះផ្សាយរបស់កាសែត Jakarta Globe កាលពីថ្ងៃព្រហស្បតិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីថាមពល និងធនធានរ៉ែឥណ្ឌូណេស៊ី លោក Bahlil Lahadalia បានថ្លែងថា ចំណាត់ការនេះគឺជាផ្នែកមួយនៃការចរចាកំពុងបន្ត ក្នុងគោលបំណងដោះស្រាយការដំឡើងពន្ធនាំចូល ៣២ ភាគរយ លើទំនិញឥណ្ឌូណេស៊ី ពីសហរដ្ឋអាមេរិក។

យោងតាមទិន្នន័យរបស់ទីភ្នាក់ងារស្ថិតិកណ្តាល (BPS) ឥណ្ឌូណេស៊ីមានអតិរេកពាណិជ្ជកម្ម ១៤,៥ ប៊ីលានដុល្លារ ជាមួយសហរដ្ឋអាមេរិកក្នុងឆ្នាំ ២០២៤ ប៉ុន្តែ រដ្ឋាភិបាលអាមេរិក ដាក់តួលេខនេះខ្ពស់ជាងនេះ ដែលធ្វើឱ្យឥណ្ឌូណេស៊ីជាប់ក្នុងអន្ទាក់ពន្ធដ៏ខ្ពស់មួយរបស់ប្រធានាធិបតីអាមេរិក ដូណាល់ ត្រាំ។

លោក Bahlil បាននិយាយបន្ទាប់ពីកិច្ចប្រជុំគណៈរដ្ឋមន្ត្រីនៅវិមានប្រធានាធិបតីក្នុងទីក្រុងហ្សាកាតា កាលពីថ្ងៃព្រហស្បតិ៍ថា៖ «ដើម្បីដោះស្រាយភាពមិនស្របគ្នា និងជំរុញការចរចា យើងកំពុងពិចារណាបង្កើនការនាំចូលថាមពលពីសហរដ្ឋអាមេរិក»។

លោក Bahlil បានបន្ថែមថា ផែនការនេះនឹងមិនដាក់បន្ទុកលើថវិការដ្ឋនោះទេ ព្រោះ «យើងមិនបន្ថែមកូតានាំចូលថ្មីទេ។ យើងគ្រាន់តែប្តូរប្រភពផ្គត់ផ្គង់ដែលមានស្រាប់របស់យើងមួយចំនួន ពីមជ្ឈិមបូព៌ា អាហ្រ្វិក និងអាស៊ីអាគ្នេយ៍ ទៅសហរដ្ឋអាមេរិក»។

បច្ចុប្បន្ន ៥៤ ភាគរយនៃការនាំចូល LPG របស់ឥណ្ឌូណេស៊ី មានប្រភពពីសហរដ្ឋអាមេរិក ដោយរំពឹងថានឹងកើនដល់ ៨៥ ភាគរយ។ ប្រេងឆៅពីសហរដ្ឋអាមេរិកវិញ រួមចំណែកតិចជាង ៤ ភាគរយ នៃការនាំចូលប្រេងឆៅសរុបរបស់ឥណ្ឌូណេស៊ី ប៉ុន្តែក្រោមផែនការដែលស្នើឡើង តួលេខនេះរំពឹងថានឹងកើនដល់ ៤០ ភាគរយ។ ការនាំចូលប្រេងចម្រាញ់ ក៏នឹងត្រូវបង្កើនផងដែរ។

គួរគូសបញ្ជាក់ថា ឥណ្ឌូណេស៊ីបាននាំចូលប្រេង និងឧស្ម័នតម្លៃ ៣៦,២៨ ប៊ីលានដុល្លារក្នុងឆ្នាំ ២០២៤ ធ្លាក់ចុះ ២ ភាគរយធៀបនឹងឆ្នាំមុន។ ប្រេង និងឧស្ម័ន រួមចំណែក ១៥,៥ ភាគរយ នៃការនាំចូលសរុបរបស់ប្រទេសឥណ្ឌូណេស៊ី។

ផែនការបង្កើនការនាំចូលពីសហរដ្ឋអាមេរិក គឺជាគំនិតផ្តួចផ្តើមមួយ ដែលគណៈប្រតិភូជាន់ខ្ពស់ឥណ្ឌូណេស៊ី យកទៅចរចាក្នុងដំណើរទស្សនកិច្ចទៅទីក្រុងវ៉ាស៊ីនតោន ដឹកនាំដោយរដ្ឋមន្ត្រីក្រសួងសេដ្ឋកិច្ចលោក Airlangga Hartarto ដែលបានលើកឡើងថា ការបង្កើនការនាំចូលអាហារ និងទំនិញរបស់សហរដ្ឋអាមេរិក នឹងធ្វើឱ្យឥណ្ឌូណេស៊ីបន្ថយការនាំចូលផលិតផលពីប្រទេសដទៃ៕