ព័ត៌មានជាតិ

កម្ពុជាកំពុងបង្ហាញអំពីសក្ដានុពលនានា និងសម្បត្តិបេតិកភណ្ឌក្នុងពិព័រណ៍ពិភពលោក ២០២៥នៅជប៉ុន

បានផុស

១៦ នាទីutes មុន

នៅ

ថ្ងៃពុធ ២១ ឧសភា ២០២៥

ដោយ

លោក សំហេង បូរ៉ា រដ្ឋលេខាធិការក្រសួងពាណិជ្ជកម្ម បានឱ្យដឹង សម្រាប់ការចូលរួមរបស់កម្ពុជានៅក្នុងព្រឹត្តិការណ៍ពិព័រណ៍ពិភពលោក នៅជប៉ុន លើកនេះ គឺកម្ពុជាបានកំពុងបង្ហាញរាល់គ្រប់សក្កានុពលរបស់ខ្លួន រួមទាំងសម្បត្តិបេតិកភណ្ឌរបស់ជាតិខ្មែរ និងវិស័យសក្តានុពលនានាដើម្បីទាក់ទាញវិនិយោគិនផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសជាមួយ«កម្ពុជាថ្មី» លោក សំហេង បូរ៉ា បានលើកឡើងថា ពាក់ព័ន្ធការរៀបចំពិព័រណ៍ពិភពលោក ត្រូវមានការផ្សារភ្ជាប់ច្រើន ដោយក្នុងនោះជាតម្រូវការរបស់ពិព័រណ៍ពិភពលោក គឺនៅតាមពន្លាជាតិនីមួយៗត្រូវតែមានចំណុចពាក់ព័ន្ធនិងវប្បធម៌ ការអភិវឌ្ឍន៍ សក្ដានុពលរបស់ប្រទេសជាតិ និងការរីកចម្រើនរបស់ប្រទេសនីមួយៗ ក៏ដូចជាពាណិជ្ជកម្ម និងសេដ្ឋកិច្ចជាដើម។

លោកថា៖« ជាក់ស្តែង ក្នុងការចូលរួមក្នុងពិព័រណ៍ពិភពលោក ២០២៥ អូសាកានេះ កម្ពុជាបានរៀបចំសាងសង់ពន្លាជាតិកម្ពុជាដោយរំលេចអំពី “ប្រាសាទកោះកេរ” ជាគោល ដែលជាតំបន់បេតិកភណ្ឌពិភពលោក របស់អង្គការយូណេស្កូ។ ការណ៍នេះ បានឆ្លុះបញ្ចាំងពីការយកចិត្តទុកដាក់របស់កម្ពុជា ក្នុងការអភិរក្សបេតិកភណ្ឌ វប្បធម៌ដ៏សម្បូរបែប និងបង្ហាញពីស្នាដៃស្ថាបត្យកម្ម និងសិល្បៈបុរាណខ្មែរដ៏ល្អឯក»។

លោកបានថ្លែងបន្ថែមទៀតថា៖« កម្ពុជាក៏នឹងនាំយកថែវនៃប្រាសាទអង្គរទៅដាក់បង្ហាញដល់ពិភពលោក ឱ្យកាន់តែស្កាល់ច្បាស់ពីបេតិកភណ្ឌជាតិរបស់យើង។ ជាងនេះទៀតដើម្បីបង្ហាញពីភាពរីកចម្រើន និងការអភិវឌ្ឍន៍របស់កម្ពុជា កម្ពុជាក៏បានប្រើប្រាស់បច្ចេកវិទ្យាថ្មីៗជាច្រើន ដើម្បីរំលេចថាកម្ពុជាយើង មានបេតិកភណ្ឌដ៏សំខាន់ មានប្រសាទដ៏រឹងមាំ ដែលនេះជាគ្រឹះដើម្បីរីកចម្រើន និងមានការរៀបចំជាវាលស្រែដាំដុះស្រូវនៅក្នុងពន្លាបន្ថែម មានភ្លើងបភ្លឺបង្ហាញចេញជាស្រូវដ៏ស្រស់ស្អាតផងដែរ»។

«នៅក្នុងបរិវេណនៃពន្លារបស់កម្ពុជា គឺមិនបានរៀបចំបែបជាបុរាណសុទ្ធ ឬបែបណានោះទេ ព្រោះគោលបំណងដែលកម្ពុជាចូលរួមនៅក្នុងពិព័រណ៍ពិភពលោកលើកនេះ គឺបង្ហាញពីគ្រប់សក្ដានុពលរបស់កម្ពុជា បេតិកភណ្ឌដ៏ស្រស់ស្អាតរបស់យើង និងមានការបូកបញ្ចូលទាំងភាពទាន់សម័យ»។ លោកបន្ថែមបែបនេះ។

លោក សំហេង បូរ៉ា បានបន្ថែមថា ពាក់ព័ន្ធនិងពាណិជ្ជកម្មវិញម្តង ក៏មានបង្ហាញពីកសិផល ផលិតផលកែច្នៃ និងសម្លៀកបំពាក់ជាដើមដែលសុទ្ធសឹងតែជាផលិតផលដែលផលិតឡើងដោយស្នាដៃប្រជាពលរដ្ឋកម្ពុជាផ្ទាល់។

ប្រទេសជប៉ុន ជាម្ចាស់ផ្ទះទទួលរៀបចំពិព័រណ៍ពិភពលោក ២០២៥ អូសាកា ក្រោមប្រធានបទ “រៀបចំ សង្គមសម្រាប់អនាគតដើម្បីជីវិតរស់នៅ” ដែលនឹងប្រព្រឹត្តទៅចាប់ពីថ្ងៃទី១៣ ខែមេសា ឆ្នាំ២០២៥ ដល់ ថ្ងៃទី១៣ ខែតុលា ឆ្នាំ២០២៥ ដោយមានរយៈពេល ៦ខែ នៅលើផ្ទៃដីទំហំ ១ ៥៤ហិកតា ដោយទទួលបានការ អនុញ្ញាតពីការិយាល័យពិព័រណ៍អន្តរជាតិ (Bureau International des Epositions-BIE) នៃប្រទេសបារាំង និងមានប្រទេសចូលរួមជាផ្លូវការចំនួន ១៥៨ប្រទេស និងអង្គការអន្តរជាតិធំៗចំនួន៧៕