កាណាដាត្រៀមវិធានការសងសឹក លើការដំឡើងពន្ធដែកថែបដល់ ៥០% របស់ ត្រាំ

ប្រទេសកាណាដាកំពុងត្រៀមពីវិធានការសងសឹង លើការដំឡើងពន្ធដែកថែបរបស់ប្រធានាធិបតីអាមេរិក ដូណាល់ ត្រាំ ដែល​បង្កការរំខានបន្ថែមទៀតសម្រាប់សេដ្ឋកិច្ចពិភពលោក និងជំរុញឱ្យ​មានការពន្លឿនការចរចាពន្ធជាមួយសហរដ្ឋអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។ ​

ការវិវត្តចុងក្រោយនេះ កើតឡើងក្រោយ​លោក ត្រាំ ប្រកាសដំឡើងពន្ធលើដែកថែប​ និងអាលុយមីញ៉ូម នាំចូលដល់ ៥០ ភាគរយ ពីអត្រាចាស់ត្រឹម ២៥ ភាគរយ ដោយចូលធរមាន​កាលពីថ្ងៃពុធ ម្សិលមិញ។ ចំណាត់ការរបស់សហរដ្ឋអាមេរិក នឹង​ប៉ះពាល់ខ្លាំងជាងគេដល់ដៃគូពាណិជ្ជកម្មអាមេរិកសំខាន់ៗ រួមមាន​កាណាដា ម៉ិកស៊ិក និងចិន ខណៈកាណាដា ​ឈរនៅលើកំពូលតារាង ជាប្រទេសផ្គត់ផ្គង់ដែកថែប និងអាលុយមីញ៉ូមទៅកាន់សហរដ្ឋអាមេរិក ច្រើនជាងគេ។

នាយករដ្ឋមន្ដ្រីកាណាដា លោក​ Mark Carney បាននិយាយថា ​កាណាដា ត្រៀមខ្លួនរួចជាស្រេច ដើម្បីវាយបកប្រឆាំងនឹងសហរដ្ឋអាមេរិក ប្រសិនបើកិច្ចពិភាក្សាជាមួយទីក្រុងវ៉ាស៊ីនតោន ដើម្បីដកពន្ធរបស់លោក ត្រាំ មិនបានសម្រេច។

លោក Carney បានប្រាប់សភាយ៉ាងដូច្នេះថា៖ «យើងកំពុងស្ថិតក្នុងការចរចារដ៏តឹងតែងជាមួយ​អាមេរិក ហើយទន្ទឹមនឹងនោះ ក៏កំពុង​រៀបចំវិធានការសងសឹក ប្រសិនបើការចរចាទាំងនោះមិនជោគជ័យ»។​

ការប្រកាសយ៉ាងដូច្នេះរបស់លោក Carney គឺស្រដៀងគ្នានឹង​សហភាពអឺរ៉ុប (EU)។ យ៉ាងណាមិញ ​មន្រ្តីចរចាពាណិជ្ជកម្មរបស់​ EU លោក Maros Sefcovic និងតំណាងពាណិជ្ជកម្មអាមេរិក លោក​ Jamieson Greer បាននិយាយថា កិច្ចប្រជុំរបស់ពួកគេនៅទីក្រុងប៉ារីសកាលពីថ្ងៃពុធ គឺមានលក្ខណៈស្ថាបនា និងមាន​វឌ្ឍនភាព។

យ៉ាងណាមិញ លទ្ធផលជាដុំកំភួនទាំងរវាង EU ឬ កាណាដា ជាមួយសហរ្ឋអាមេរិក មិនទាន់កើតចេញជាផ្លែផ្កា អ្វីនៅឡើយទេ។

គួរគូសបញ្ជាក់ថា ចាប់តាំងពីឡើងកាន់អំណាចអាណត្តិ ២ មក​ លោក ត្រាំ បានផ្តោតលើការយកពន្ធលើការនាំចូលរបស់សហរដ្ឋអាមេរិកពីប្រទេសផ្សេង​ៗ ដែលបានរំខានដល់ពាណិជ្ជកម្មពិភពលោក និងធ្វើឱ្យទីផ្សារហិរញ្ញវត្ថុរង្គោះរង្គើ៕