កម្ពុជា ស្នើ​អឺរ៉ុបពង្រីកយុទ្ធសាស្ត្រគាំទ្រ​​បរិវត្តកម្មឧស្សាហកម្ម ខណៈខ្លួនត្រៀមចាកចេញពីឋានៈជាប្រទេសអភិវឌ្ឍន៍តិចតួចរបស់កម្ពុជា

រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MISTI) លោកហែម វណ្ណឌី បានស្នើឱ្យសហភាពអឺរ៉ុប ផ្តោតយុទ្ធសាស្រ្តគាំទ្រកម្ពុជា ឱ្យកាន់តែស៊ីជម្រៅ ទាំងក្នុងកម្មវិធីបច្ចុប្បន្ន និងកម្មវិធីអនាគតរបស់ខ្លួន ខណៈដែលកម្ពុជាកំពុងត្រៀមចាកចេញពីឋានៈជាប្រទេសអភិវឌ្ឍន៍តិចតួចនៅចុងឆ្នាំ២០២៩។

សំណើរបស់លោក​ហែម វណ្ណឌី ធ្វើឡើងកាលពីថ្ងៃទី១៧ ខែមិថុនា ក្នុងកិច្ចប្រជុំបច្ចេកទេសជាមួយគណៈប្រតិភូសហភាពអឺរ៉ុប ដែលដឹកនាំដោយលោក Koen Everaert នៅទីស្តីការក្រសួង។ លោករដ្ឋមន្រ្តីលើកឡើងថា ខណៈកម្ពុជាកំពុងធ្វើដំណើរ​ឈានទៅមុខមួយជំហានម្តងៗ ដោយជំហានបន្ទាប់ នឹងផ្តោតលើការបង្កើតតម្លៃបន្ថែម តាមរយៈការកែច្នៃផលិតផលកសិកម្ម និងឧស្សាហូបនីយកម្ម មុននឹងឈានដល់ដំណាក់កាលកំណើនដែលផ្អែកលើសេវាកម្ម។”

លោកថា៖ “យើងខ្ញុំស្នើឱ្យ Team Europe មិនត្រឹមតែបន្តកម្មវិធីគាំទ្រដែលកំពុងដំណើរការប៉ុណ្ណោះទេ ប៉ុន្តែសូមពិនិត្យមើលឱ្យកាន់តែស៊ីជម្រៅ និងចំគន្លឹះនៃបញ្ហា – តើមានអ្វីផ្សេងទៀតដែលយើងត្រូវធ្វើនាពេលនេះ ដើម្បីឱ្យ ២០២៩ កម្ពុជាអាចសម្រេចជោគជ័យ»។

លោក ហែម វណ្ណឌី ក៏បានអំពាវនាវឱ្យសហភាពអឺរ៉ុបគាំទ្រកម្ពុជាបន្ថែមក្នុងវិស័យដែលជាគន្លឹះសម្រាប់ឧស្សាហូបនីយកម្ម ពិសេសពាក់ព័ន្ធនឹងលក្ខណ្ឌតម្រូវទីផ្សារ និងបទប្បញ្ញត្តិបច្ចេកទេស ដោយផ្តោតលើកការអភិវឌ្ឍហេដ្ឋារចនាសម្ព័ន្ធគុណភាពជាតិ ការជំរុញផលិតភាព ភាពប្រកួតប្រជែង និងសមត្ថភាពរបស់សហគ្រាសធុនតូចនិងមធ្យម ដើម្បីចូលរួមក្នុងខ្សែច្រវាក់តម្លៃនៃឧស្សាហកម្មធុនធំ។

យោងតាម MISTI គណៈប្រតិភូសហភាពអឺរ៉ុបបានជម្រាបជូនអំពីយុទ្ធសាស្ត្រអឺរ៉ុបរួម កម្មវិធី Global Gateway និងគំនិតផ្តួចផ្តើមអឺរ៉ុបរួម-ដំណាក់កាលទី២ (TEI 2) ដែលគ្រោងវិនិយោគប្រមាណ ៥០០ លានអឺរ៉ូ លើកម្មវិធីចំនួន ២៥ រហូតដល់ឆ្នាំ២០២៧។ គណៈប្រតិភូក៏បានរំលេចនូវគម្រោង និងសមិទ្ធផលជោគជ័យសំខាន់ៗ ដែលបង្ហាញពីការប្តេជ្ញាចិត្តរបស់សហភាពអឺរ៉ុប ក្នុងការជំរុញកិច្ចសហប្រតិបត្តិការ និងការអភិវឌ្ឍប្រកប​ដោយ​ចីរភាពនៅកម្ពុជា។

គម្រោងសំខាន់មួយរបស់ Team Europe ដែលត្រូវបានរំលេចជាសមិទ្ធផលជោគជ័យក្នុងកិច្ចប្រជុំនេះ គឺគម្រោងសាងសង់រោងចក្រប្រព្រឹត្តិកម្មទឹកស្អាតបាក់ខែង ក្រោមកម្មវិធី Global Gateway ដែលគាំទ្រដោយរដ្ឋាភិបាលបារាំង តាមរយៈទីភ្នាក់ងារអភិវឌ្ឍន៍បារាំង (AFD) ។ ជាមួយនឹងការវិនិយោគរួមរបស់សហភាពអឺរ៉ុបជាង ៦០០លានអឺរ៉ូ សម្រាប់ដំណាក់កាលទាំង៣ គម្រោងនេះ​នឹងបង្កើនសមត្ថភាពផលិតទឹកស្អាតរបស់រដ្ឋាករទឹកស្វយ័តក្រុងភ្នំពេញទ្វេដង ពី ០,៦ លាន ទៅ ១,២ លានម៉ែត្រគូបក្នុងមួយថ្ងៃ ដោយពង្រីក និងកែលម្អបណ្តាញប្រវែងជាង ៥.០០០ គីឡូម៉ែត្រ និងភ្ជាប់បណ្តាញទឹកស្អាតដល់គ្រួសារជាង ៥០០.០០០ តំណ រួមទាំងសម្រាប់តំបន់ឧស្សាហកម្ម៕