ព័ត៌មានអន្ដរជាតិ

EU ព្រម បញ្ចេញមូលនិធិរាប់ពាន់លានដុល្លារ ឲ្យហុងគ្រី វិញ ក្រោយបង្កកច្រើនឆ្នាំ

បានផុស

១ ខែ មុន

នៅ

ថ្ងៃសៅរ៍ ៣០ ឧសភា ២០២៦

ដោយ

ទីបំផុត សហភាពអឺរ៉ុប (EU) យល់ព្រមបញ្ចេញមូលនិធិរាប់ពាន់លានដុល្លាដែលធ្លាប់ត្រូវបានបង្កក ទៅឱ្យហុងគ្រីវិញហើយ បន្ទាប់ពីប្រធានគណៈកម្មការអឺរ៉ុប លោកស្រី Ursula von der Leyen មើលឃើញថា មានវឌ្ឍនភាពយ៉ាងឆាប់រហ័ស និងជាក់ស្តែងលើកំណែទម្រង់រចនាសម្ព័ន្ធ ក្រោមការដឹកនាំថ្មីរបស់រដ្ឋាភិបាលក្រុង ប៊ុយដាប៉ែស។ នេះបើយោងតាមភ្នាក់ងារសារព័ត៌មានតួកគី Anadolu ផ្សាយថ្ងៃទី២៩ ខែឧសភា ឆ្នាំ ២០២៦។

បន្ទាប់ពីកិច្ចប្រជុំមួយនៅទីក្រុងព្រុចសែល ជាមួយនាយករដ្ឋមន្ត្រីហុងគ្រី លោក Peter Magyar, លោកស្រី von der Leyen ថ្លែងថា៖ «ប្រទេសហុងគ្រីបានអនុវត្តកំណែទម្រង់ថ្មី ក្នុងគោលបំណងពង្រឹងការការពារ ប្រឆាំងអំពើពុករលួយ ការកែលម្អសេវាកម្មសាធារណៈ និងពង្រឹងក្របខ័ណ្ឌនីតិរដ្ឋ»។

លោក Peter Magyar និង លោកស្រី von der Leyen។ រូបភាព៖ Euractiv

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រីបន្ថែមថា៖ «ការផ្លាស់ប្តូរទាំងនេះ រួមមានទាំងការសម្រេចចិត្តរបស់ហុងគ្រី ក្នុងការចូលរួមជាមួយការិយាល័យរដ្ឋអាជ្ញាសាធារណៈអឺរ៉ុប ការពង្រឹងអាជ្ញាធរសុចរិតភាពជាតិ ការកែសម្រួលច្បាប់លទ្ធកម្ម និងការលុបចោលរចនាសម្ព័ន្ធដែលមានហានិភ័យខ្ពស់ សម្រាប់រដ្ឋ»។

យោងតាម លោកស្រី von der Leyen ជំហានទាំងនេះ រួមផ្សំជាមួយនឹងផែនការវិនិយោគដែលបានព្រមព្រៀងគ្នាក្រោមក្របខ័ណ្ឌស្តារឡើងវិញរបស់សហភាពអឺរ៉ុប អនុញ្ញាតឱ្យមានការបញ្ចេញមូលនិធិបន្តិចម្តងៗ។

លោកស្រីថា៖ « ខ្ញុំពិតជារីករាយណាស់ក្នុងការប្រកាសថា យើងអាចបញ្ចេញទឹកប្រាក់ជិត ១១ពាន់លានដុល្លារ សម្រាប់ប្រទេសហុងគ្រី ចំណែកមូលនិធិសម្ព័ន្ធភាពចំនួន ៤.៨ប៊ីលានបន្ថែមទៀត នឹងភ្ជាប់ទៅដំណាក់កាលសំខាន់ៗនៃលក្ខខណ្ឌនានា»។

គួរបញ្ជាក់ថា ភាពតានតឹងរវាង EU និងហុងគ្រី ចាប់ផ្តើមតាំងពីឆ្នាំ ២០១០ មក ពេលដែលប្លុកនេះ ចោទប្រកាន់រដ្ឋាភិបាលរបស់ អតីតមេដឹកនាំហុងគ្រី លោក Viktor Orban ពីបទលើកកម្ពស់គោលនយោបាយអភិរក្សនិយមប្រឆាំងនឹងច្បាប់ EU។

ក្រោយមក គណបក្ស Tisza របស់ លោក Magyar បានឈ្នះ ក្នុងការបោះឆ្នោតសភាថ្ងៃទី១២ ខែមេសា ឆ្នាំ២០២៦ ដោយបញ្ចប់ការគ្រប់គ្រងរយៈពេល ១៦ឆ្នាំ របស់លោក Orban ៕

សម្រួល៖ ណឺ មិនា