ព័ត៌មានអន្ដរជាតិ

ថៃស្នើទៅអាមេរិក ឱ្យកំណត់ពន្ធលើទំនិញខ្លួនត្រឹម ១០%

បានផុស

១ year មុន

នៅ

ថ្ងៃចន្ទ ៣០ មិថុនា ២០២៥

ដោយ

កាសែតថៃ The Nation បានស្រង់សម្ដីប្រភពពីក្រសួងហិរញ្ញវត្ថុថៃដោយមិនបង្ហាញឈ្មោះថា ក្រុមការងារចរចាពន្ធថៃ បានស្នើទៅសហរដ្ឋអាមេរិកសុំពេលបន្ថែមដើម្បីការចរចា និងបញ្ចុះអត្រាពន្ធឱ្យនៅត្រឹម ១០ ភាគរយ ដូចគ្នានឹងអត្រាពន្ធមូលដ្ឋានដែលអាមេរិកដាក់លើប្រទេសមួយចំនួន។

*រដ្ឋមន្ត្រីក្រសួងហិរញ្ញវត្ថុ លោក Pichai Chunhavajira*

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខណៈពន្ធគយបដិការដែលប្រធានាធិបតីអាមេរិក ដូណាល់ ត្រាំ ពន្យារពេលអនុវត្ត ៩០ ថ្ងៃ គ្រោងនឹងចូលជាធរមានជាថ្មីនាថ្ងៃ ៩ កក្កដាខាងមុខនោះ ប្រភពពីក្រសួងដដែលបាននិយាយថា វាមានលទ្ធភាពខ្ពស់ដែលសហរដ្ឋអាមេរិកអាចព្រមបន្ថែមពេលចរចាហួសកាលកំណត់ ៩០ ថ្ងៃ ដើម្បីអនុញ្ញាតឱ្យមានពេលចរចាបន្ថែមជាលម្អិត។

ប្រភពបន្តថា ដើមឡើយ សហរដ្ឋអាមេរិកបានស្នើដំឡើងពន្ធលើទំនិញថៃពី ១០ ភាគរយ ទៅ ១៨ ភាគរយ ដែលទាបជាងអត្រាដើម ៣៦ ភាគរយ ប៉ុន្តែរួមបញ្ចូលនូវលក្ខខណ្ឌផ្សេងៗលើសពីពន្ធគយ។

គួរកត់សម្គាល់ថា ថ្មីៗនេះមានសេចក្ដីរាយការណ៍ថា សហរដ្ឋអាមេរិកកំណត់ដាក់ពន្ធលើថៃ ១៨ ភាគរយ ប៉ុន្តែរដ្ឋមន្ត្រីក្រសួងហិរញ្ញវត្ថុ លោក Pichai Chunhavajira បានច្រាលចោលនូវព័ត៌មាននេះ។ លោក Pichai បាននិយាយថា លោកគ្រោងធ្វើដំណើរទៅសហរដ្ឋអាមេរិកអាមេរិកក្នុងនាមជាប្រធានក្រុមចរចាថៃ ដើម្បីចូលរួមការចរចា ដែលអាមេរិកបានយល់ព្រម នៅសប្តាហ៍នេះ។

រដ្ឋមន្ត្រីដដែល បានកត់សម្គាល់ថា ការចរចាត្រូវបានផ្លាស់ប្តូរជាបន្តបន្ទាប់ក្នុងរយៈពេលប៉ុន្មានខែកន្លងមក ដោយសារតែសហរដ្ឋអាមេរិកបានចាត់តាំងអ្នកចរចានៅកម្រិតផ្សេងៗ រួមទាំងនាយកដ្ឋានពាណិជ្ជកម្ម អ្នកតំណាងពាណិជ្ជកម្មសហរដ្ឋអាមេរិក (USTR) និងសូម្បីតែលេខាធិការរតនាគារ។

បើតាម លោក Pichai ថៃបានពិភាក្សាជាមួយសហរដ្ឋអាមេរិកនាពេលកន្លងមក ដោយផ្ដោតលើអត្រាពន្ធគយ របាំងពាណិជ្ជកម្មមិនមែនពន្ធគយ ការបង្កើនការនាំចូលរបស់សហរដ្ឋអាមេរិក ការដោះស្រាយការក្លែងបន្លំនៃប្រភពដើមទំនិញ និងការដោះស្រាយបញ្ហាដឹកជញ្ជូនទំនិញកាត់ប្រទេសដៃគេចពន្ធ និងជំរុញការវិនិយោគថៃនៅអាមេរិកជាដើម៕