ព័ត៌មានអន្ដរជាតិ

សកម្មភាពរោងចក្រចិន កើនឡើងជាថ្មីខែមុន ខណៈហានិភ័យនៅបន្ត

បានផុស

៣ សប្តាហ៍ មុន

នៅ

ថ្ងៃអង្គារ ១ កក្កដា ២០២៥

ដោយ

សកម្មភាពរោងចក្រនៅចិនបានបង្ហាញពីកំណើនជាថ្មីកាលពីខែមិថុនា ក្រោយធ្លាក់ចុះ ២ ខែមុននោះជាប់ៗគ្នា ទោះបីជាហានិភ័យទាំងក្នុង និងក្រៅស្រុក ដែលជះឥទ្ធិពលលើការបញ្ជាទិញ នៅបន្តក្ដី។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លទ្ធផលស្ទង់មតិប្រចាំខែរួមគ្នានៃក្រុមហ៊ុន,ឯកជន Caixin និង S&P Global បានបង្ហាញថា សន្ទស្សន៍អ្នកគ្រប់គ្រងការបញ្ជាទិញ (PMI) បានកើនឡើងដល់ ៥០,៤ នៅខែមិថុនា ធៀបនឹង ៤៨,៣ នៅខែឧសភា។ ពិន្ទុក្រោម ៥០ ជាទូទៅបង្ហាញពីការធ្លាក់ចុះ។

យ៉ាងណាមិញ PMI ប្រចាំខែមិថុនា ពីការិយាល័យស្ថិតិជាតិចិន វិញ មានត្រឹម ៤៩,៧ ពិន្ទុប៉ុណ្ណោះ ដែលនោះប្រសើរឡើងជាង ៤៩,៥ ពិន្ទុ នៅខែឧសភា។ PMI របស់ស្ថាប័នរដ្ឋចិនដដែល បង្ហាញពីការធ្លាក់ចុះសកម្មភាពរោងចក្រ ៣ ខែជាប់ៗគ្នា។

ទោះយ៉ាងណាក៏ដោយ សេដ្ឋវិទូចិនបាននិយាយថា ការផ្គត់ផ្គង់ និងតម្រូវការផលិតកម្មបានងើបឡើងវិញក្នុងខែមិថុនា ប៉ុន្តែហានិភ័យពីខាងក្រៅ ជុំវិញភាពស្រពិចស្រពិលផ្សេងៗ រួមទាំងគោលនយោបាយពន្ធគយរបស់សហរដ្ឋអាមេរិក នៅតែបន្តមាន។

ការស្ទង់មតិ Caixin បានបង្ហាញថា ការបញ្ជាទិញថ្មីសរុបបានកើនឡើងក្នុងខែមិថុនា បន្ទាប់ពីការធ្លាក់ចុះនៅខែឧសភា ដោយថៅកែរោងចក្របានលើកឡើងពីភាពប្រសើរឡើងនៃលក្ខខណ្ឌពាណិជ្ជកម្ម និងសកម្មភាពផ្សព្វផ្សាយដើម្បីជំរុញការលក់។ នោះបានជំរុញឱ្យទិន្នផលរោងចក្រឈានដល់កម្រិតខ្ពស់បំផុតចាប់តាំងពីខែវិច្ឆិកាឆ្នាំមុន៕