គយ៖ មុខទំនិញក្រៅពីបន្លែ ផ្លែឈើ និងប្រេងឥន្ធនៈ និងឧស្ម័នឥន្ធនៈនៅតែ​អនុញ្ញាត​ឱ្យនាំចូលពីថៃមកកម្ពុជា

​​

អគ្គនាយកដ្ឋានគយនិងរដ្ឋាករកម្ពុជា (GDCE) បានធ្វើការបញ្ជាក់ដល់បណ្តាម្ចាស់អាជីវកម្ម និងធុរជនចំពោះមុខទំនិញដែលកម្ពុជានៅតែបន្តអនុញ្ញាតឱ្យ​នាំចូលពីប្រទេសថៃជាធម្មតា លើកឡើងដែលមុខទំនិញបន្លែ ផ្លែឈើ និងប្រេងឥន្ធនៈ និងឧស្ម័នឥន្ធនៈដែលត្រូវបានរដ្ឋាភិបាលហាមឃាត់ ក្រោយថៃបានធ្វើការបិទច្រកទ្វារព្រំដែនជាឯកតោភាគី។

យោងតាមសេចក្តីជូនដំណឹងរបស់ GDCE នៅថ្ងៃទី១៦ ខែកក្កដា ឆ្នាំ២០២៥ ​ អគ្គនាយកដ្ឋានគយនិងរដ្ឋាករកម្ពុជា មានកិត្តិយសសូមជម្រាបជូនអាជីវករ/ពាណិជ្ជករ ធុរជននិង សាធារណជនមេត្តាជ្រាបថា មុខទំនិញមានប្រភពដើមពីប្រទេសថៃ ដែលជាប់បម្រាមនាំចូលមកកម្ពុជាមានដូចជា៖ ក. បន្លែ និងផ្លែឈើ   និង ខ. ប្រេងឥន្ធនៈ និងឧស្ម័នឥន្ធនៈ (ប្រេងសាំង, ប្រេងម៉ាស៊ូត, ឧស្ម័នរាវសម្រាប់ដុត (LPG) និង (LNG),ប្រេងខ្មៅ, និង ប្រេងសាំងយន្តហោះ (Jet-A1)។

GDCE ថា៖« ដោយឡែក មុខទំនិញផ្សេងទៀត ក្រៅពីមុខទំនិញក្នុងចំណុច ក និង ខ ខាងលើ មិនមែនជាកម្មវត្ថុនៃការ ហាមឃាត់ការនាំចូលទេ។ អាជីវករ/ពាណិជ្ជករ នៅបន្តនាំចូលបានជាធម្មតាដោយបំពេញបែបបទ និងនីតិវិធីកំណត់ ដោយលិខិតបទដ្ឋានជាធរមាន»។

ចំពោះតម្រាយផ្លូវ និងមធ្យោបាយដឹកជញ្ជូនទំនិញនាំចូលមកកម្ពុជា អាជីវករ/ពាណិជ្ជករអាចប្រើប្រាស់មធ្យោបាយ ដឹកជញ្ជូនផ្សេងៗ និងតាមមាត់ច្រកផ្លូវការនានា លើកលែងតែមាត់ច្រកព្រំដែនផ្លូវគោកកម្ពុជា-ថៃ ដែលត្រូវបានបិទជា ឯកតោភាគីដោយយោធាថៃ។

«អគ្គនាយកដ្ឋានគយនិងរដ្ឋាករកម្ពុជា នឹងបន្តតាមដាន និងធ្វើបច្ចុប្បន្នភាពជូនអាជីវករ/ពាណិជ្ជករ ធុរជននិង សាធារណជនអំពីស្ថានការ និងការវិវត្តនានាពាក់ព័ន្ធនឹងវិធានការខាងលើនេះ។ អាស្រ័យហេតុនេះ សូម អាជីវករ/ពាណិជ្ជករ ធុរជន និងសាធារណជន មេត្តាជ្រាប និងចូលរួមអនុវត្តប្រកបដោយ ស្មារតីទទួលខុសត្រូវខ្ពស់»។ នេះបើយោងតាម GDCE ៕