ព័ត៌មានជាតិ

តាំងពីឆ្នាំ ២០០៨ គយបានអនុវត្តការធ្វើទំនើបកម្ម និងកិច្ចសម្រួលការធ្វើពាណិជ្ជកម្មនៅកម្ពុជា

បានផុស

១២ នាទី មុន

នៅ

ថ្ងៃសៅរ៍ ៤ កក្កដា ២០២៦

ដោយ

ក្នុងវេទិកាគយ និងសម្ព័ន្ធសមាគមសហគ្រាសធុនតូច និងមធ្យមដែលបានរៀបចំឡើងកាលពីពេលថ្មីៗនេះ មន្រ្តីអគ្គនាយកដ្ឋានគយ និងរដ្ឋាករកម្ពុជា បានធ្វើបទបង្ហាញទាក់ទងនឹងកិច្ចការសម្របសម្រួលពាណិជ្ជកម្ម និងការធ្វើទំនើបកម្មប្រព័ន្ធគយនៅកម្ពុជា។

លោក ហួង រតនា ប្រធានការិយាល័យនៃអគ្គនាយកដ្ឋានគយនិងរដ្ឋាករកម្ពុជាបានបញ្ជាក់ថា កិច្ចការសំខាន់ៗរបស់អគ្គនាយកដ្ឋានគយនិងរដ្ឋាករលើកិច្ចការសម្របសម្រួលការធ្វើពាណិជ្ជកម្ម ផ្ដោតលើសសរស្ដម្ភធំៗចំនួនបី គឺក្របខណ្ឌកិច្ចសម្រួលពាណិជ្ជកម្ម ការធ្វើទំនើបកម្មរដ្ឋបាលគយ និងការគាំទ្រសម្រួលដល់ការនាំចេញ-នាំចូលរបស់សហគ្រាសធុនតូច និងមធ្យម (SMEs) នៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងក្របខណ្ឌកិច្ចសម្រួលពាណិជ្ជកម្ម កម្ពុជាបានអនុវត្តការងារកិច្ចសម្រួលពាណិជ្ជកម្មស្របតាមគោលការណ៍របស់អង្គការពាណិជ្ជកម្មពិភពលោក (WTO) និងអង្គការគយពិភពលោក (WCO) តាមរយៈការធ្វើសាមញ្ញកម្មនីតិវិធី និងការគ្រប់គ្រងហានិភ័យ។

លោក ហួង រតនា បានបញ្ជាក់ថា ចាប់តាំងពីឆ្នាំ២០០៨ មក អគ្គនាយកដ្ឋានគយបានធ្វើទំនើបកម្ម ដោយបានកែប្រែពីការបំពេញបែបបទតាមទម្រង់ក្រដាសស្នាម មកជាប្រព័ន្ធស្វ័យប្រវត្តកម្មទិន្នន័យគយ អាស៊ីគុដា (ASYCUDA) និងបានបន្តអភិវឌ្ឍមុខងារថ្មីៗជាបន្តបន្ទាប់។

ប្រព័ន្ធបញ្ជរតែមួយជាតិ (National Single Window) ក៏បានដាក់ឱ្យដំណើរការជាផ្លូវការនៅក្នុងខែឧសភា ឆ្នាំ២០២៤ ក្រោមអធិបតីភាពសម្តេចធិបតីនាយករដ្ឋមន្ត្រី។ ប្រព័ន្ធនេះតភ្ជាប់ក្រសួង និងស្ថាប័នពាក់ព័ន្ធទាំងអស់ ដើម្បីឱ្យអាជីវករអាចស្នើសុំវិញ្ញាបនបត្រ អាជ្ញាប័ណ្ណ ឬលិខិតអនុញ្ញាតនាំចេញ-នាំចូលផ្សេងៗតាមរយៈប្រព័ន្ធតែមួយនេះបានយ៉ាងលឿន។

ប្រព័ន្ធឆ្លងកាត់គយអាស៊ាន (ACTS) ក៏ត្រូវបានដាក់ឱ្យអនុវត្តតាំងពីឆ្នាំ២០២០ ដើម្បីសម្រួលដល់ការដឹកជញ្ជូនទំនិញឆ្លងកាត់រវាងប្រទេសនានានៅក្នុងតំបន់អាស៊ាន។

ពាក់ព័ន្ធយន្តការគាំទ្រសហគ្រាសធុនតូច និងមធ្យម (SMEs) អនុញ្ញាតិឲ្យមានការបំពេញបែបបទមុនទំនិញមកដល់ ដែលជួយជំរុញឱ្យ SMEs អាចរៀបចំបំពេញបែបបទគយជាមុនសិន ទម្រាំទំនិញមកដល់។ លើសពីនេះ ក៏មានការផលិតវីដេអូខ្លីៗក្រោមគម្រោង (RT4D) ដើម្បីចែករំលែកចំណេះដឹង និងបទពិសោធន៍អំពីរបៀបនៃការស្នើសុំ ឬបែបបទនាំចេញសម្រាប់ SMEs ផងដែរ។

ការដាក់ឲ្យដំណើរការកម្មវិធីទូរស័ព្ទដៃ «តារាងពន្ធគយ» ជួយឱ្យអាជីវករអាចឆែកមើលលេខកូដទំនិញ និងដឹងថាទំនិញនោះជាប់អាជ្ញាប័ណ្ណពីក្រសួងណាមួយ។

ការបង់ពន្ធក៏ត្រូវបានរៀបចំតាមប្រព័ន្ធអនឡាញ ដើម្បីកាត់បន្ថយហានិភ័យ និងការចំណាយពេលវេលាក្នុងការកាន់សាច់ប្រាក់ទៅបង់នៅមាត់ច្រក ឬធនាគារផ្ទាល់។

បន្ថែមពីនេះ អគ្គនាយកដ្ឋានគយបានបង្កើតយន្តការ តាមរយៈវេទិការាជរដ្ឋាភិបាល-វិស័យឯកជន ដើម្បីដោះស្រាយរាល់បញ្ហាចម្ងល់នានារបស់ SMEs។

អគ្គនាយកដ្ឋានគយ បានដាក់ឲ្យដំណើរការកម្មវិធីប្រតិបត្តិករសេដ្ឋកិច្ចទទួលបានការអនុញ្ញាត (AEO) ចាប់ពីចុងឆ្នាំ២០២៣ ដល់ឆ្នាំ២០២៦។ បច្ចុប្បន្នមាន ១២ ក្រុមហ៊ុន ដែលមានអនុលោមភាពខ្ពស់ និងរក្សាបាននូវប្រព័ន្ធសុវត្ថិភាពសន្តិសុខក្នុងខ្សែច្រវាក់ផ្គត់ផ្គង់ ទទួលបានឋានៈជា (AEO) រួមមានទាំងអ្នកនាំចេញ អ្នកនាំចូល និងអ្នកដឹកជញ្ជូន។

លោក ហួង រតនា បានអះអាងថា កម្ពុជាជាប្រទេសតែមួយគត់ក្នុងតំបន់អាស៊ាន ដែលផ្តល់ការលើកទឹកចិត្ត និងជំរុញឱ្យ SMEs ចូលរួមចុះឈ្មោះដើម្បីក្លាយជា (AEO) ដើម្បីទទួលបានអត្ថប្រយោជន៍លើកទឹកចិត្តសម្របសម្រួលពិសេសពីស្ថាប័នគយ។

ក្រុមហ៊ុន (AEO) នៅកម្ពុជាទទួលបានការទទួលស្គាល់ និងការលើកទឹកចិត្តទៅវិញទៅមកជាមួយបណ្តាប្រទេសក្នុងអាស៊ាន ហើយថ្មីៗនេះនៅក្នុងកិច្ចប្រជុំគយអាស៊ានលើកទី៣៥ កម្ពុជាក៏បានចុះហត្ថលេខាលើកិច្ចព្រមព្រៀងទទួលស្គាល់គ្នាទៅវិញទៅមកជាមួយរដ្ឋបាលគយចិនផងដែរ។

បើតាមម ជន្ទល់ដ៏សំខាន់សម្រាប់កិច្ចការសម្របសម្រួលពាណិជ្ជកម្មរបស់អគ្គនាយកដ្ឋានគយផ្ដោតលើ ភាពសាមញ្ញ ភាពស៊ីចង្វាក់គ្នា ស្តង់ដាររួម និងតម្លាភាព៕