កិច្ចប្រជុំគណៈកម្មការចម្រុះនៃកិច្ចព្រមព្រៀងពាណិជ្ជកម្មសេរីកម្ពុជា-ចិនលើកទី២នឹងធ្វើឡើងនាខែកញ្ញា​

​កម្ពុជានឹង​រៀបចំកិច្ចប្រជុំគណៈកម្មការចម្រុះនៃកិច្ចព្រមព្រៀងពាណិជ្ជកម្មសេរីកម្ពុជា-ចិន(CCFTA) លើកទី២ ដែលគ្រោងនឹងរៀបចំឡើងនៅថ្ងៃទី៩ ខែកញ្ញា ឆ្នាំ២០២៥ នៅខេត្តសៀមរាប នាពេលខាងមុខ បន្ទាប់ពីកិច្ចព្រមព្រៀងពាណិជ្ជកម្មសេរីនេះត្រូវបានប្រទេសទាំងពីរអនុវត្តន៍អស់រយៈពេលជាង ឆ្នាំមកហើយ។

ផែនការនៃការរៀបចំកិច្ចប្រជុំគណៈកម្មការចម្រុះនៃកិច្ចព្រមព្រៀងពាណិជ្ជកម្មសេរីកម្ពុជា-ចិនលើកទី២ត្រូវបានក្រសួងពាណិជ្ជកម្មដែលជាប្រធានគណៈកម្មការចម្រុះអនុវត្តកិច្ចព្រមព្រៀងសេរីកម្ពុជា-ចិនបានដឹកនាំកិច្ចប្រជុំអន្តរក្រសួង-ស្ថាប័ន ដើម្បីពិគ្រោះយោបល់ ពិនិត្យ និងរៀបចំសេចក្ដីព្រាងរបៀបវារៈ

កាលពី២៤ ខែកក្កដា ឆ្នាំ២០២៥ នៅទីស្តីការក្រសួងពាណិជ្ជកម្ម លោក សុខ សុភ័ក្រ្ត រដ្ឋលេខាធិការ ​ បានដឹកនាំកិច្ចប្រជុំអន្តរក្រសួង-ស្ថាប័នដើម្បីប្រមូលធាតុចូលសំខាន់ៗ ក្នុងការកំណត់របៀបវារៈនៃកិច្ចប្រជុំសំដៅធ្វើយ៉ាងពង្រីកការនាំចេញផលិផលកសិកម្មរបស់កម្ពុជាទៅកាន់ទីផ្សារយក្សនៅអាស៊ីមួយនេះឱ្យបានកាន់តែច្រើន។

CCFTA បានចូលជាធរមានតាំងពីថ្ងៃទី១មករា ឆ្នាំ២០២២​ ដែលលបានបើកផ្លូវឱ្យកម្ពុជា​អាចនាំចេញទំនិញ​ជាង៣០០មុខ ​ទៅកាន់ទីផ្សារចិនដោយពុំជាប់ពន្ធ។ ​

លោក សុខ សុភ័ក្រ្ត ធ្លាប់បានលើកឡើងកន្លងមកថា ក្នុងចំណោមមុខទំនិញជាង៣០០មុខនេះ គឺមានផលិតផលកសិកម្ម៩៥ភាគរយ ត្រូវរួចពន្ធសម្រាប់ការនាំចេញទៅចិន។ ប៉ុន្តែ ផលិតផលគ្រឿងចក្រ និងយានយន្តផ្សេងៗវិញ ចិននៅតែបន្តយកពន្ធនាំចូលដដែល។

បើយោងតាមក្រសួងកសិកម្មគិតមកដល់បច្ចុប្បន្ននេះ ​កសិផលរបស់កម្ពុជាសំខាន់ចំនួន៩មុខ ​ត្រូវបានអនុញ្ញាតឱ្យ​នាំចេញ ដោយផ្ទាល់ទៅចិនរួមមាន អង្ករ កន្ទក់អង្ករ ចំណិតដំឡូងមីក្រៀម ពោត ផ្លែចេក ស្វាយ ផ្លែមៀន ម្រេច និងផ្លែទុរេនដែលជាកសិផលទី៩ត្រូវបានគយចិនអនុញ្ញាតឱ្យធ្វើការនាំចេញកាលពីដើមខែកក្កដាថ្មីៗនេះ។​

នៅឆមាសទី១ ឆ្នាំ ២០២៥ ការដោះដូរទំនិញរវាងកម្ពុជា-ចិនមាន​ទំហំ​ទឹក​ប្រាក់ ៩,២៧ ពាន់​លាន​ដុល្លារ កើនឡើង ២៦,៩% ធៀបនឹងរយៈពេលដូចគ្នា កាល​ពីឆ្នាំ ២០២៤ ដែលមាន​ត្រឹម​តែ ៧,៣១ ពាន់លានដុល្លារ។ ក្នុងនោះ កម្ពុ​ជានាំចេញទៅចិនចំនួនជាង ៧៥០ លានដុល្លារ ធ្លាក់ចុះ ៧,៩% ចំណែក​ឯចិន​នាំ​ចូល​មកវិញជាង ៨,៥២ ពាន់លានដុល្លារ កើនឡើង ៣១,២%។ នេះបើ​យោង​​តាមអគ្គនា​យកដ្ឋាន​គយ និង​​រដ្ឋាករ​កម្ពុជា ​(GDCE)។

ទិន្នន័យខាងលើបង្ហាញថា នៅក្នុងឆមាសទី១ ឆ្នាំ ២០២៥ កម្ពុជាមាន​ឱនភាពពាណិជ្ជកម្មជា​មួយ​ចិន​ប្រមាណ ៧,៧៧ ពាន់លានដុល្លារ ខណៈរយៈពេលដូចគ្នាក្នុងឆ្នាំ ២០២៤ មាន ៥,៦៨ ពាន់​លានដុល្លារ។

យោងតាមក្រសួងពាណិជ្ជកម្ម នៅក្នុងឆ្នាំ ២០២៤ ពាណិជ្ជកម្មទ្វេភាគីរវាងកម្ពុជា-ចិន សម្រេចបាននូវទំហំទឹកប្រាក់ ១៥,១៨ ពាន់លានដុល្លារ កើនឡើង ២៣,៨ ភាគរយ ធៀបនឹងឆ្នាំ ២០២៣ ក្នុងនោះ​កម្ពុជានាំចេញទំនិញទៅចិន មានតម្លៃ ១,៧៥ ពាន់លានដុល្លារ កើនឡើង ១៨,៤ ភាគរយ និងទំនិញចិននាំចូលមកកម្ពុជាមានតម្លៃ ១៣,៤៣ ពាន់លានដុល្លារ កើនឡើង ២៤,៦ ភាគរយ៕

​