បន្ថយថ្លៃ​ដើម​ដឹកជញ្ជូន កម្ពុជាជំរុញ​គម្រោង​អភិវឌ្ឍន៍​មជ្ឈមណ្ឌលភស្តុភារកម្មភ្នំពេញ​ឲ្យ​ចេញរូបរាង​ឲ្យបាន​ឆាប់

រដ្ឋាភិបាល​កម្ពុជា​កំពុង​ជំរុញ​ល្បឿននៃគម្រោងអភិវឌ្ឍន៍មជ្ឈមណ្ឌលភស្តុភារកម្មភ្នំពេញ​ឲ្យ​ចេញ​រូបរាង​ឲ្យបាន​​ឆាប់ ដើម្បីពង្រឹងវិស័យដឹកជញ្ជូន និងភស្តុភារកម្មនៅក្នុងប្រទេស។

លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និង​ជា​ប្រធានគណៈកម្មការជំរុញការអនុវត្តគម្រោង PPLC កាលពី​រសៀល​ម្សិលមិញនេះ បានដឹកនាំកិច្ចប្រជុំពាក់ព័ន្ធនឹងគម្រោងអភិវឌ្ឍន៍មជ្ឈមណ្ឌលភស្តុភារកម្មភ្នំពេញ (Phnom Penh Logistics Complex – PPLC) ដោយមានការចូលរួមពីរដ្ឋមន្ត្រីក្រសួងសាធារណការ និងដឹកជញ្ជូន, ថ្នាក់ដឹកនាំក្រុមប្រឹក្សាអភិវឌ្ឍន៍កម្ពុជា, ថ្នាក់ដឹកនាំក្រសួងសាធារណការ និងដឹកជញ្ជូន, ថ្នាក់ដឹកនាំក្រសួងសេដ្ឋកិច្ច និងហិរញ្ញវត្ថុ, ថ្នាក់ដឹកនាំក្រុមហ៊ុន YCH Group ព្រមទាំងមន្ត្រីជំនាញពាក់ព័ន្ធ។

ក្នុង​កិច្ចប្រជុំបាន​ពិនិត្យ និងពិភាក្សាលើវឌ្ឍនភាពនិងទិសដៅនៃគម្រោងអភិវឌ្ឍន៍មជ្ឈមណ្ឌលភស្តុភារកម្មភ្នំពេញ PPLC ក្នុងគោលបំណងពន្លឿនការអភិវឌ្ឍគម្រោងឱ្យលេចចេញជារូបរាង្គនាពេលឆាប់ៗខាងមុខ។

បើតាម​មន្រ្តី​ពាក់ព័ន្ធ​បាន​ឲ្យ​ដឹង​ថា កិច្ចប្រជុំដែល​រៀបចំ​កាល​ពី​ម្សិលមិញនេះ​ក្នុងគោលបំណងដើម្បី ពិនិត្យពិភាក្សា​លើ​បច្ចុប្បន្នភាព និងវឌ្ឍនភាពនៃគម្រោងអភិវឌ្ឍន៍មជ្ឈមណ្ឌលភស្តុភារកម្មភ្នំពេញ (PPLC) ជាមួយក្រុមហ៊ុន YCH Group ដែលជាភាគីអភិវឌ្ឍគម្រោង មុននឹងបន្តនីតិវិធីជំហានបន្ទាប់នាពេលខាងមុខ។

តាម​រយៈ​​គម្រោង​អភិវឌ្ឍន៍មជ្ឈមណ្ឌលភស្តុភារកម្មភ្នំពេញ PPLC នឹងចូលរួមលើកកម្ពស់ភាពប្រកួតប្រជែងវិស័យភស្តុភារកម្មក្នុងតំបន់ និងការទាក់ទាញវិនិយោគបរទេសឱ្យចូលរួមអភិវឌ្ឍន៍វិស័យឡូជីស្ទីក និងឧស្សាហកម្មនៅកម្ពុជាជាបន្តបន្ទាប់ សំដៅលើកកម្ពស់ការអភិវឌ្ឍសេដ្ឋកិច្ចជាតិ និងការបង្កើតការងារជូនប្រជាពលរដ្ឋបន្ថែមទៀត ព្រមទាំងការកាត់បន្ថយថ្លៃចំណាយដឹកជញ្ជូន និងឡូជីស្ទីក។

គម្រោងអភិវឌ្ឍន៍មជ្ឈមណ្ឌលភស្តុភារកម្មភ្នំពេញ (PPLC) គឺជាគំនិតផ្តួចផ្តើមដ៏សំខាន់របស់រាជរដ្ឋាភិបាលកម្ពុជា ដើម្បីពង្រឹងវិស័យដឹកជញ្ជូន និងភស្តុភារកម្មនៅក្នុងប្រទេស។ គម្រោងនេះមានគោលបំណងកាត់បន្ថយថ្លៃដើមដឹកជញ្ជូន ធ្វើឱ្យប្រសើរឡើងនូវប្រសិទ្ធភាព និងបង្កើនសមត្ថភាពប្រកួតប្រជែងក្នុងវិស័យភស្តុភារកម្មរបស់កម្ពុជាទៅក្នុងតំបន់៕