ព័ត៌មានអន្ដរជាតិ

បក្សប្រឆាំងថៃបង្ហាញកង្វល់សេដ្ឋកិច្ច ជុំវិញមាតុភូមិនិវត្តន៍របស់ពលករខ្មែរ

បានផុស

១១ ខែ មុន

នៅ

ថ្ងៃព្រហស្បតិ៍ ២១ សីហា ២០២៥

ដោយ

គណបក្សប្រជាជន (PP) ដែលជាគណបក្សប្រឆាំងដ៏ធំបំផុតនៅក្នុងប្រទេសថៃ បានលើកឡើងពីកង្វល់សេដ្ឋកិច្ច ជុំវិញតែការធ្វើមាតុភូមិនិវត្តន៍របស់ពលករខ្មែរដោយសារតែជម្លោះព្រំដែនរវាងប្រទេសទាំង២ ដោយព្រមានពីការរំខានធ្ងន់ធ្ងរលើវិស័យជាច្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមាជិកសភា និងជាអនុប្រធានបក្ស PP លោក Rangsiman Rome ដែលជាប្រធានគណៈកម្មាធិការសភាសន្តិសុខជាតិផងដែរនោះ បានប្រាប់អ្នកកាសែតកាលពីថ្ងៃពុធ ក្រោយកិច្ចប្រជុំរបស់គណៈកម្មាធិការថា គណៈកម្មាធិការបានផ្ដោតលើផលប៉ះពាល់ដែលកើតចេញពីការវិលត្រឡប់ចូលស្រុករបស់ពលករកម្ពុជា។

លោកថា មានតែប្រហែល ១០ ភាគរយ នៃពលករខ្មែរប្រមាណ ៣០០ ០០០ នាក់ ប៉ុណ្ណេះ ដែលបន្តនៅក្នុងប្រទេសថៃ ខណៈតួលេខពិតប្រកដអាចខ្ពស់ជាងនេះ បើរាប់ទាំងពលករដែលគ្មានឯកសារធ្វើការត្រឹមត្រូវ។ តួលេខនេះ តិចជាងតួលេខរបស់ក្រសួងការងារកម្ពុជាដែលថា ពលករខ្មែរជិត ៩០០ ០០០ នាក់បានវិលចូលស្រុក គិតត្រឹមថ្ងៃ ៨ សីហា។

យ៉ាងណាក៏ដោយ លោក Rangsiman បាននិយាយថា មាតុភូមិនិវត្តន៍របស់ពលករខ្មែរ កំពុងបង្កផលប៉ះពាល់ខ្លាំងដល់វិស័យផលិតកម្មថៃ ជាពិសេសវិស័យកសិកម្ម និងសំណង់ ដែលនេះហើយទាមទារឱ្យរដ្ឋាភិបាលមានដំណោះស្រាយបន្ទាន់។

កាលពីថ្ងៃអង្គារ គណៈរដ្ឋមន្រ្តីថៃបានអនុម័តលើផែនការនាំយកពលករពីស្រីលង្កា ដើម្បីបំពេញកង្វះខាតកម្លាំងពលកម្ម ខណៈក្រសួងការងារថៃលើកឡើងពីការយកពលករពីប្រទេសផ្សេងៗទៀតផងដែររួមទាំងវៀតណាម ឡាវ មីយ៉ាន់ម៉ា ហ្វីលីពីន ឥណ្ឌូណេស៊ី និងបង់ក្លាដែស ជាដើម។ ប៉ុន្តែអ្នកជំនាញមើលឃើញថា បញ្ហានេះមិនអាចដោះស្រាយភ្លាមៗបានទេ។

លោក Rangsiman បាននិយាយថា ផលប៉ះពាល់សេដ្ឋកិច្ចពីជម្លោះព្រំដែនកម្ពុជា-ថៃ វាធ្ងន់ធ្ងររួចស្រាប់ទៅហើយ ហើយប្រសិនបើភាពប្រសើរឡើងតាមព្រំដែនត្រូវបានជាប់គាំងនោះ នោះនឹងបង្កឱ្យមានការខូចខាតរយៈពេលយូរ៕