កូវីដ-១៩

ក្នុង១ថ្ងៃខេត្តបន្ទាយមានជ័យប្រកាសរកឃើញអ្នកឆ្លងជំងឺកូវីដ-១៩ថ្មីជិត៦០នាក់បន្ថែមទៀត

បានផុស

៥ years មុន

នៅ

ថ្ងៃពុធ ៥ ឧសភា ២០២១

ដោយ

រដ្ឋបាលខេត្តបន្ទាយមានជ័យបានប្រកាសរកឃើញករណីឆ្លងកូវីដ-១៩ចំនួន៥៧នាក់បន្ថែមទៀតខណៈខេត្តមួយនេះកំពុងផ្ទុះជំងឺកូវីដ-១៩យ៉ាងធ្ងន់ធ្ងរ។

បើតាមរដ្ឋបាលខេត្តបន្ទាយមានជ័យ ក្នុងចំណោមអ្នកឆ្លងជំងឺកូវីដទាំង៥៧នាក់នោះ ក្នុងនោះមាន៥១នាក់ឆ្លងនៅសង្កាត់ប៉ោយប៉ែត ៥០នាក់រស់នៅឃុំកំពង់ស្វាយ និង១នាក់ទៀតរស់នៅឃុំព្រះពន្លាស្រុកសេរីសោភ័ណ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋបាលខេត្តបន្ទាយមានជ័យបានអំពាវនាវដល់អ្នកជាប់ពាក់ព័ន្ធផ្ទាល់និងប្រយោលជាមួយអ្នកជំងឺខាងលើត្រូវរាយការណ៍មកអាជ្ញាធរ និងធ្វើតេស្តរកកូវីដ-១៩ និងធ្វើចត្តាឡីស័ករយៈពេល១៤ថ្ងៃឲ្យបានត្រឹមត្រូវតាមវិធានរបស់ក្រសួងសុខាភិបាល។

បន្ថែមពីនេះរដ្ឋបាលខេត្តបានណែនាំឱ្យអ្នកពាក់ព័ន្ធត្រូវតាមដានសុខភាពជាប្រចាំនិងវាស់កម្តៅ១ថ្ងៃ២ដងស្នាក់នៅបន្ទប់ដាច់ដោយឡែកតែឯងនិងធ្វើអនាម័យជាប្រចាំពាក់ម៉ាស និងរក្សាគន្លាតសុវត្តិភាពឲ្យបានជាង១ម៉ែត្រកន្លះ ហើយក្នុងករណីមានបញ្ហាសុខភាពប្រែប្រួលខុសប្រក្រតីដូចជាក្តៅខ្លួន ក្អក កណ្តាស់ ហៀរសំបោរ ថប់ដង្ហើម សូមប្រញាប់រាយការណ៍ទៅអាជ្ញាធរជាបន្ទាន់។

ដោយសារស្ថានភាពឆ្លងជំងឺកូវីដ-១៩ធ្ងន់ធ្ងរនោះ ខេត្តបន្ទាយមានជ័យបានសម្រចបិទខ្ទប់ និងដាក់ភូមិមួយចំនួនជាតំបន់ក្រហមនៅក្នុងភូមិសាស្ត្រសង្កាត់ប៉ោយប៉ែតក្រុងប៉ោយប៉ែត និងបិទកាស៊ីណូទាំងអស់ដើម្បីទប់ស្កាត់ការឆ្លងរាលដាលជំងឺកូវីដ-១៩។ ជាងនេះទៀតក្រសួងសុខាភិបាលកាលពីម្សិលមិញបានកំណត់យកភូមិសាស្ត្រខេត្តបន្ទាយមានជ័យ ជាខេត្តទី៧ដែលជាប់កាតព្វកិច្ចពាក់ម៉ាសនិងកាតព្វកិច្ចរក្សាគម្លាតសុវត្តិភាពផងដែរ។

បើតាមក្រសួងសុខាភិបាល គិតត្រឹមថ្ងៃទី០៤ ខែឧសភា ឆ្នាំ២០២១នេះ ខេត្តបន្ទាយមានជ័យ មានអ្នកជំងឺកូវីដ-១៩ចំនួន៦១៦នាក់ ជាសះស្បើយចំនួន៦៨នាក់ និង៥៤៨នាក់កំពុងសម្រាកព្យាបាលនៅមន្ទីរពេទ្យ៕

អត្ថបទ ៖ សំអឿន

Related Topics:កូវីដ-១៩ រដ្ឋបាលខេត្តបន្ទាយមានជ័យ

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា