ផ្ទុះខ្លាំង! ឥណ្ឌា ចាប់ស្វា ៦០ក្បាលធ្វើចត្តាឡីស័ក និងធ្វើតេស្តរកកូវីដ

សត្វស្វាចំនួន៦០ក្បាល ត្រូវបានដាក់ឲ្យធ្វើចត្តាឡីស័ក បន្ទាប់ពីពួកគេត្រូវបានគេចាប់នៅសង្កាត់ភាគខាងត្បូងទីក្រុងដែលី ដែលកំពុងប្រយុទ្ធប្រឆាំងនឹងការឆ្លងរាលដាលយ៉ាងខ្លាំងនៃជំងឺកូវីដ-១៩។

សត្វទាំងនេះ ត្រូវធ្វើចត្តាឡីស័ករយៈពេល១៤ថ្ងៃ មុនពេលពួកគេត្រូវបានលែងចូលទៅក្នុងដែនជម្រកសត្វព្រៃ Asola Bhatti។

ក្រុមមន្រ្តីបាននិយាយថា សត្វស្វាមិនទាន់បង្ហាញរោគសញ្ញាណាមួយនៅឡើយទេ ហើយកំពុងធ្វើតេស្តនិងធ្វើចត្តាឡីស័ក ដើម្បីជាការប្រុងប្រយ័ត្នជាមុន។

រឿងនេះបានកើតឡើងពីរសប្តាហ៍ បន្ទាប់ពីសត្វតោប្រាំបីក្បាលនៅសួនសត្វ Hyderabad ធ្វើតេស្តវិជ្ជមាន វីរុសកូវីដ-១៩។

មន្រ្តីព្រៃឈើក្រុងដែលីអះអាងថា ពួកគេចង់ទប់ស្កាត់ការចម្លងរវាងសត្វស្វានិងសត្វដទៃទៀត រួមទាំងខ្លារខិន ឆ្កែព្រៃនិងកាំប្រមាផងដែរ នៅឯដែនជម្រកសត្វព្រៃ។

គួរបញ្ជាក់ថា នៅថ្ងៃព្រហស្បតិ៍នេះ ក្រសួងសុខាភិបាលឥណ្ឌាបានប្រកាសថា មានករណីឆ្លងជំងឺកូវីដ-១៩ ចំនួន២៧៦,១០០ករណីដែលនាំឲ្យករណីសរុបកើនដល់ ២៥,៧៧២,៤៤០ករណី ខណៈអ្នកស្លាប់សរុបកើនដល់២៨៧,១២២នាក់៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ពលរដ្ឋឥណ្ឌា នៅតែទៅមុជទឹកទន្លេគង្គា ទោះសពអ្នកស្លាប់ដោយសារកូវីដ បន្តអណ្តែតស្អុយរលួយពេញទន្លេ រាល់ថ្ងៃ