កូវីដ-១៩

ពលរដ្ឋព័ទ្ធចាប់អ្នកជំងឺកូវីដ-១៩ ម្នាក់ ដែលរត់ចេញពីមន្ទីរពេទ្យមកសំងំលាក់ខ្លួនក្នុងភូមិ

បានផុស

៣ years មុន

នៅ

ថ្ងៃសៅរ៍ ២២ ឧសភា ២០២១

ដោយ

ប្រជាពលរដ្ឋរស់នៅក្បែរមាត់ទន្លេបាសាក់ក្រោយយឿត្រីបេនឡានច្បារអំពៅ បាននាំគ្នាព័ទ្ធចាប់អ្នកជំងឺកូវីដ១៩ម្នាក់ ដែលរត់ចេញពីមន្ទីរពេទ្យមករស់នៅក្នុងភូមិដែលងាយនឹងឆ្លងជំងឺដ៏សាហាវនេះដល់ប្រជាពលរដ្ឋ។

ហេតុការណ៍ភ្ញាក់ផ្អើលនេះបានកើតឡើងនៅវេលាម៉ោង១៣និង១០នាទីរសៀលថ្ងៃទី២២ ខែឧសភានៅក្នុងភូមិដើមចាន់ សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍ពីលោក ជូ ចាន់នី ជំនួយការសង្កាត់ច្បារអំពៅទី២ បានឲ្យកម្ពុជាថ្មីដឹងថា នៅម៉ោងកើតហេតុ បងប្អូនប្រជាពលរដ្ឋក្នុងភូមិដើមចាន់បានរកឃើញបុរសម្នាក់ឈ្មោះ មាន ផាន់ណា អាយុ២៩ឆ្នាំ ជាប្រជាពលរដ្ឋរស់នៅក្នុងភូមិខាងលើ ប៉ុន្តែជននេះមានផ្ទុកវីរុសកូវីដ១៩ដែលត្រូវបានគ្រូពេទ្យដឹកយកទៅព្យាបាលជំងឺនៅសាលាបឋមសិក្សាផ្សារដើមថ្កូវអស់រយៈពេលមួយសប្តាហ៍មកហើយមិនទាន់បានជាសះស្បើយផង បែជាអ្នកជំងឺម្នាក់នេះព្យាយាមរត់ចេញមកលាក់ខ្លួនក្នុងភូមិធ្វើឲ្យប្រជាពលរដ្ឋមានការភ័យខ្លាចឆ្លងជំងឺកូវីដ១៩នេះ ហើយម្យ៉ាងទៀតតំបន់ដែលពួកគេរស់នៅគឺជាតំបន់ក្រហមថែមទៀត។

លោក ជូ ចាន់នី បានបញ្ជាក់ទៀតថា កាលពី៣ថ្ងៃមុន អ្នកជំងឺម្នាក់នេះបានរត់ចេញពីមន្ទីរពេទ្យម្តងរួចមកហើយ ប៉ុន្តែត្រូវបានសមត្ថកិច្ចនិងអាជ្ញាធរខណ្ឌច្បារអំពៅ ប្រើពេលសឹងពេញមួយយប់ទំរាំចាប់បាន ហើយបញ្ជូនទៅព្យាបាលវិញ។ ចៃដន្យទៅបានមួយយប់រត់មកវិញធ្វើឲ្យប្រជាពលរដ្ឋនិងអាជ្ញាធរឃ្លាំចាំចាប់ប្រើពេលអស់២យប់៣ថ្ងៃទើបរកឃើញអ្នកជំងឺរូបនេះកំពុងពួនសំងំក្នុងស៊ីទែនទឹកជាប់មាត់ទន្លេហើយប្រជាពលរដ្ឋស្រែកឲ្យចេញ ប៉ុន្តែពេលដែលរត់ចេញពីស៊ីទែនទឹក ជននេះនៅបន្តរត់ទៅពួនក្នុងផ្ទះប្រជាពលរដ្ឋទំរាំចាប់វាបាន។

តាមការបញ្ជាក់ពីលោក ជូ ចាន់នី គឺអាជ្ញាធរនិងសមត្ថកិច្ចព្យាយាមតាមចាប់អ្នកជំងឺម្នាក់នេះជាច្រើនថ្ងៃមកហើយ ទើបចាប់បានដោយមានការសហការណ៍ពីប្រជាពលរដ្ឋ ដែលលោកភ័យខ្លាចឆ្លងជំងឺកូវីដ១៩ដល់ពួកគាត់ ព្រោះជននេះមានជំងឺកូវីដ១៩។

គួរបញ្ជាក់ថា នៅពេលកំពុងព័ទ្ធចាប់អ្នកជំងឺរូបនេះ គឺប្រជាពលរដ្ឋប្រុងសម្លាប់ចោលប៉ុន្តែត្រូវបានអាជ្ញាធរចុះទៅអន្តរាគមន៍ព្រោះការប្រើហិង្សានាំឲ្យខុសទៅនឹងច្បាប់៕

អត្ថបទ ៖ នរា

Related Topics:កូវីដ-១៩