ប្រកាស​បង​ប្អូន​ ខណ្ឌ​ចំការមន ខណ្ឌ៧មករា ខណ្ឌ​ច្បារអំពៅ អាចទៅចាក់​វ៉ាក់សាំងបាន ចាប់ពីថ្ងៃ​២៥​ឧសភា​តទៅ

ភ្នំពេញ៖ សាលារាជធានីភ្នំពេញបានប្រកាស ឲ្យពលរដ្ឋចាប់ពីអាយុ១៨ឆ្នាំឡើងទៅ រស់នៅក្នុងខណ្ឌចំការមន ខណ្ឌ៧មករា និងខណ្ឌច្បារអំពៅ ទៅទទួលការចាក់វ៉ាក់សាំងការពារជំងឺកូវីដ‑១៩ សម្រាប់ដូសទី១ ចាប់ពីថ្ងៃទី២៥ខែឧសភាដល់ថ្ងៃទីថ្ងៃទី០៧ខែមិថុនាឆ្នាំ២០២១ និងសម្រាប់ដូសទី២ចាប់ពីថ្ងៃទី៨ខែមិថុនាដល់ថ្ងៃទី២១ខែមិថុនាឆ្នាំ ២០២១ តាមការអញ្ជើញរបស់អាជ្ញាធរមូលដ្ឋាន។

យោងតាមសេចក្តីជួនដំណឹងរបស់សាលារាជធានីភ្នំពេញ ចុះថ្ងៃទី២៣ឧសភានេះបានឲ្យដឹងថា ប្រជាពលរដ្ឋដែលមានអាយុចាប់ពី១៨ឆ្នាំឡើង រស់នៅទាំង៣ខណ្ឌខាងលើ អាចទៅទទួលវ៉ាក់សាំងនៅតាមទីតាំងដូចខាងក្រោម។

ខណ្ឌចំការមន៖

-អ្នករស់នៅសង្កាត់​ផ្សារដើមថ្កូវ ត្រូវចាក់នៅសាលាបឋមសិក្សា អ្នកឧកញ៉ាមហាភក្តី ហ៊ុន នាង បឹងត្របែកខាងត្បូង និងវិទ្យាល័យ ហ៊ុនសែនប៊ុនរ៉ានី ផ្សារដើមថ្កូវ
-សង្កាត់ទូលទំពូងទី១ ចាក់នៅនៅវិទ្យាល័យ ទួលទំពូង 
-សង្កាត់ទួលទំពូងទី២ ចាក់នៅសាលាបឋមសិក្សា អ្នកឧកញ៉ាមហាភក្តី ហ៊ុន នាង ទួលទំពូងទី២   
-សង្កាត់បឹងត្របែក ចាក់នៅសាលាបឋមសិក្សា អ្នកឧកញ៉ាមហាភក្តី ហ៊ុននាង បឹងត្របែកខាងកើត  
-សង្កាត់ទន្លេបាសាក់ ចាក់នៅសាលាបឋមសិក្សាសុធារស និងវិទ្យាល័យបឹងត្របែក

ខណ្ឌ៧ មករា៖

-អ្នករស់នៅ សង្កាត់បឹងព្រលិតនិងសង្កាត់វាលវង់ ត្រូវចាក់នៅ សាលាបឋមសិក្សា សំពៅមាស
-សង្កាត់មនោរម្យ សង្កាត់អូឫស្សីទី ២និងសង្កាត់អូឬស្សីទី៣ ចាក់នៅសាលាបឋមសិក្សាបាក់ទូកមណ្ឌល១  សង្កាត់អូឬស្សីទី១ សង្កាត់អូឬស្សីទី៤និងសង្កាត់មិត្តភាព ចាក់នៅសាលាបឋមសិក្សាបាក់ទូកបណ្ឌល២

ខណ្ឌច្បារអំពៅ៖

-អ្នករស់នៅសង្កាត់ច្បារអំពៅទី១ ចាក់នៅសាលាបឋមសិក្សាច្បារអំពៅទី១
-សង្កាត់ច្បារអំពៅទី២ ចាក់នៅវត្តពោធិ៍ព្រះបាត្រហៅវត្តច្បារអំពៅ
-សង្កាត់និរោធ ចាក់នៅវិទ្យាល័យច្បារអំពៅ  ទីលានកីឡាបុរីប៉េងហួតនិងសាលាបឹងឈូកប្រជុំវង្ស
-សង្កាត់ព្រែកប្រា ចាក់នៅអនុវិទ្យាល័យព្រែកប្រាលើ 
-សង្កាត់វាលស្បូវចាក់នៅសាលាបឋមសិក្សាវាលស្បូវ 
-សង្កាត់ព្រែកឯងចាក់នៅវិទ្យាល័យព្រែកឯង 
-សង្កាត់ក្បាលកោះ ចាក់នៅសាលាបឋមសិក្សាយកបាត្រ
-សង្កាត់ព្រែកថ្មីចាក់នៅវិទ្យាល័យព្រែកថ្មី

បើតាមសាលារាជធានីភ្នំពេញ ដើម្បីជំរុញការចាក់វ៉ាក់សាំងឲ្យបានលឿននិងឆាប់រហ័ស សម្រាប់ប្រជាពលរដ្ឋដែលមានអាយុចាប់ពី ១៨ ឆ្នាំឡើងទៅ រាជរដ្ឋាភិបាលកម្ពុជាបានដាក់ចេញនូវយុទ្ធនាការជាតិចាក់វ៉ាក់សាំងការពារជំងឺកូវីដ‑១៩ ដោយប្រើប្រាស់កម្លាំងសរុបនិងមធ្យោបាយសរុបរបស់ជាតិ សំដៅបង្កើតឲ្យមានភាពស៊ាំសហគមន៍ទប់ទល់នឹងការឆ្លងរាលដាលនៃជំងឺកូវីដ‑១៩។

ផ្អែកតាមផែនការមេសម្រាប់យុទ្ធនាការចាក់វ៉ាក់សាំងប្រជាពលរដ្ឋទាំងអស់ ដែលមានអាយុចាប់ពី ១៨ឆ្នាំឡើងទៅនៅក្នុងរាជធានីភ្នំពេញនិងទទួលបានការចាក់វ៉ាក់សាំងគ្រប់គ្នាៗទៅតាមកម្មវិធីជំហានការងារយ៉ាងយូរ បំផុតក្នុងអំឡុងខែមិថុនាឆ្នាំ២០២១ ។

រហូតមកដល់ពេលនេះសាលារាជធានីភ្នំពេញ កំពុងតែសម្រុកវ៉ាក់សាំងជូនដល់ប្រជាពលរដ្ឋចំនួន៨ខណ្ឌរួមមាន ខណ្ឌមានជ័យ, ខណ្ឌដង្កោ, ខណ្ឌកំបូល, ខណ្ឌពោធិ៍សែនជ័យ, ខណ្ឌឫស្សីកែវ ខណ្ឌទួលគោក ខណ្ឌបឹងកេងកង និងខណ្ឌសែនសុខ ។

សាលារាជធានីភ្នំពេញសូមក្រើនរំលឹកនិងអំពាវនាវសារជាថ្មីម្ដងទៀតចំពោះប្រជាពលរដ្ឋដែលត្រូវទទួលយកវ៉ាក់សាំងការពារជំងឺកូវីដ‑១៩ ត្រូវរក្សាឲ្យបានជាដាច់ខាតនូវគម្លាតសុវត្ថិភាពសង្គមពាក់ម៉ាសតម្រងជួរចៀសវាងការឈរប្រជ្រៀតគ្នាណែនណាន់តាន់តាប់ដោយត្រូវប្រកាន់ភ្ជាប់ការចូលរួមអនុវត្តនូវវិធានការរដ្ឋាភិបាលនិងវិធានការ៣ការពារនឹង៣កុំរបស់សម្ដេចអគ្គមហាសេនាបតីជោហ៊ុនសែនហ៊ុនសែនដោយឈរលើស្មារតីស្រឡាញ់ជាតិសហគមន៍គ្រួសារនិងអាយុជីវិតផ្ទាល់ខ្លួនក្នុងឆន្ទៈរួមគ្នាជាធ្លុងមួយដើម្បីឈានទៅកាត់ផ្ដាច់និងលុបបំបាត់ការឆ្លងរាលដាលជំងឺកូវីដ‑១៩ក្នុងព្រឹត្តិការណ៍សហគមន៍២០កុម្ភៈឆ្នាំ២០២១នៅរាជធានីភ្នំពេញឲ្យបានឆាប់ៗខាងមុខនេះ៕

អត្ថបទ៖ សំអឿន