ខេត្តរតនគិរី​បើកយុទ្ធនាការបាញ់ថ្នាំ ទ្រង់ទ្រាយធំ​ ខណៈអ្នកឆ្លងកើនដល់ ៣៦៤ នាក់

រដ្ឋបាលខេត្តរតនគិរី បានសហការជាមួយក្រុមហ៊ុនអង្គរហ្គ្រីន បើកយុទ្ធនាការបាញ់ថ្នាំកំចាត់មេរោគកូវីដ ខណៈដែល​រលក​ចម្លងជំងឺដ៏កាចសាហាវនេះ កំពុងរាតត្បាតធ្ងន់ធ្ងរនៅក្នុងភូមិសាស្រ្តខេត្តរតនគិរី ដែលបង្កឲ្យមានការព្រួយបារម្ភជាខ្លាំងសម្រាប់ប្រជាពលរដ្ឋក្នុងខេត្តទាំងមូល។

នៅរសៀលថ្ងៃទី២៧ ខែមិថុនា ឆ្នាំ២០២១ ក្នុងយុទ្ធនាការបាញ់ថ្នាំទ្រង់ទ្រាយធំ បានធ្វើឡើងបន្ទាប់ពីមានការគាំទ្រពីក្រុមហ៊ុនអង្គរហ្គ្រីនអិនវេសមេន។

ការបាញ់ថ្នាំកំចាត់មេរោគនេះ ជាជំហ៊ានដំបូងក្រុមការងារ បានបាញ់ថ្នាំជុំវិញផ្សារ ព្រមទាំងមណ្ឌលធ្វើចត្តាឡីស័ក វិទ្យាល័យភូមិថ្មី និងមួយផ្នែកខ្លះក្នុងបុរីលឹម ប៊ុណ្ណា ស្ថិតនៅក្នុងសង្កាត់ឡាបានសៀក ក្រុងបានលុង។

បើទោះជាយ៉ាងណា ប្រជាពលរដ្ឋ ក្នុងខេត្តរតនគិរី នៅតែមានការព្រួយបារម្មយ៉ាងខ្លាំង ចំពោះការផ្ទុះជំងឺដ៏កាចសាហាវនេះ ពីព្រោះពួកគាត់នៅពុំទាន់ទទួលបានការចាក់វ៉ាក់សាំងការពារជំងឺកូវីដ១៩ នៅឡើយទេ។ ដូច្នេះពួកគាត់ ស្នើសុំដល់រាជរដ្ឋាភិបាល ឲ្យជួយពន្លឿនការចាក់វ៉ាក់សាំង ដល់ពួកគាត់ នៅក្នុងខេត្តរតនគិរី៕

អត្ថបទ៖វុទ្ធឦសាន