រដ្ឋបាលខេត្តរតនគិរី រកឃើញអ្នកវិជ្ជមានកូវីដ១៩ ចំនួន១៥​នាក់ថ្មីបន្ថែម

រដ្ឋបាលខេត្តរតនគិរី បានចេញសេចក្តីប្រកាសព័ត៌មាន ពីការរកឃើញអ្នកឆ្លងជំងឺកូវីដ១៩ចំនួន១៥នាក់ថ្មីបន្ថែម កាលពីថ្ងៃទី៧ ខែកក្កដា ឆ្នាំ២០២១។ នេះបើយោងតាមសេចក្តីប្រកាសព័ត៌មាន រដ្ឋបាលខេត្តចេញប្រកាសព័ត៌មាននៅថ្ងៃទី៨ ខែកក្កដា ឆ្នាំ២០២១។

ក្រុមការងារឆ្លើយតបបន្ទាន់មន្ទីរសុខាភិបាល នៃរដ្ឋបាលខេត្ត បានធ្វើតេស្តរហ័ស បន្តរកឃើញអ្នកវិជ្ជមានកូវីដ១៩។

សេចក្ដីប្រកាសព័ត៌មាន រដ្ឋបាលខេត្តរតនគិរី បានបញ្ជាក់ថា អ្នកវិជ្ជមានជំងឺកូវីដ១៩ ដែលទើបរកឃើញថ្មីនេះ ធ្លាប់បានប៉ះពាល់ផ្ទាល់ជាមួយអ្នកវិជ្ជមានជំងឺកូវីដ១៩ ដែលបានរកឃើញនាពេលកន្លងមក ហើយអាជ្ញាធរខេត្តតម្រូវឱ្យបុគ្គលទាំងនោះ មកធ្វើតេស្ដសំណាក និងមួយចំនួនទៀត មានអាការៈមិនស្រួលខ្លួន បានស្ម័គ្រចិត្តមកធ្វើតេស្ដសំណាក ដោយខ្លួនឯង។

រដ្ឋបាលខេត្តរតនគិរី បន្ដអំពាវនាវដល់សាធារណជនទាំងអស់ ដែលធ្លាប់បានពាក់ព័ន្ធដោយផ្ទាល់ និងប្រយោល ជាមួយអ្នកវិជ្ជមាន ដែលបានរកឃើញកន្លងមក សូមស្ម័គ្រចិត្តធ្វើតេស្ដសំណាក ឬដាក់ខ្លួនឲ្យនៅដោយឡែកពីអ្នកដទៃ ព្រមទាំងតាមដានសុខភាពជាប្រចាំ ក្នុងករណីមានការសង្ស័យសូមរាយការណ៍ទៅកាន់អាជ្ញាធរមានសមត្ថកិច្ចជាបន្ទាន់។

រដ្ឋបាលខេត្តរតនគិរី បានបញ្ជាក់ថា ជាលទ្ធផលធ្វើតេស្តរហ័ស ក្នុងចំណោមសំណាក៧០៥នាក់ រកឃើញវិជ្ជមាន កូវីដ ១៩ ចំនួន ១៥នាក់ នៅថ្ងៃទី៧ ខែកក្កដា ឆ្នាំ២០២១ និងអ្នកព្យាបាលជាសះស្បើយ ចំនួន២៩នាក់ ហើយអ្នកទាំងនោះ ត្រូវបានឲ្យវិលត្រឡប់ទៅផ្ទះវិញ និងតម្រូវឲ្យធ្វើចត្តាឡីស័កនៅផ្ទះដោយខ្លួនឯងចំនួន ១៤ថ្ងៃបន្ថែមទៀត។

គិតត្រឹមថ្ងៃទី៨ ខែកក្កដា នៅក្នុងខេត្តរតនគិរី រកឃើញអ្នកវិជ្ជមានកូវីដ១៩ សរុបចំនួន៥៩៧នាក់ ព្យាបាលជាសះស្បើយសរុបចំនួន ១៣១នាក់ និងស្លាប់៤នាក់៕ វុទ្ធឦសាន