អនុប្រធានសមាគមសិល្បករខ្មែរ យល់ថា បើលុបចោលព្រឹត្តិការណ៍​ «នគរសង្ក្រាន្ត» ថៃនឹងឆក់ឱកាសធ្វើសង្គ្រាមវប្បធម៌

អ្នកស្រី នៅ សូនីតា ដែលជាតារាសម្តែង និងជាអនុប្រធានសមាគមសិល្បករខ្មែរ បានបង្ហាញក្តីព្រួយបារម្ភដោយលើកឡើងទស្សន:ថា សង្គ្រាមវប្បធម៌នឹងផ្ទុះឡើង ប្រសិនបើកម្ពុជានៅស្ងៀមគ្មានសកម្មភាពព្រឹត្តិការណ៍ ​«នគរសង្ក្រាន្ត» ព្រោះគេចិញ្ចឹមចិត្តចង់បានយូរហើយ។

ការលើកឡើងនេះ គឺស្របពេលដែលមានការខ្វែងគំនិតនឹងការរៀបចំព្រឹត្តិការណ៍​ «នគរសង្ក្រាន្ត» ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងខិតជិតឈានចូលមកដល់នាពេលឆាប់ៗខាងមុខនេះ ដោយមានមតិសាធារណជនមួយចំនួន យល់ថា កាលៈទេស:ប្រទេសជាតិបែបនេះមិនគួររៀបចំឡើយ។

អនុប្រធានសមាគមសិល្បករខ្មែររូបនេះ បានលើកឡើងជាគំនិតដូច្នេះថា “នគរសង្ក្រាន្ត បើយើងនៅស្ងៀមមិនមានសកម្មភាពនោះសង្គ្រាមវប្បធម៌នឹងផ្ទុះឡើងវិញម្តងទៀត ព្រោះគេចិញ្ចឹមចិត្តចង់បានយូរហើយ…រំលេចបង្ហាញដើម្បីវប្បធម៌ទេសចរណ៍លើកស្ទួយសេដ្ឋកិច្ចជាតិ។ អ្នកស្រី ក៏សម្តែងការអរគុណផងដែរសម្រាប់គាំទ្រមតិយោបល់របស់អ្នកស្រីលើបញ្ហានេះ។

ជាមួយគ្នានេះ មានការបញ្ចេញមតិពីអ្នកលេងហ្វេកប៊ុកនិងគាំទ្រដែរថា ថៃមិនដែលបំភ្លេចមហិច្ចតាលួចវប្បធម៌ខ្មែរធ្វើជារបស់ខ្លួនឡើយ បើមិនរៀបចំព្រឹត្តិការណ៍នគរសង្ក្រាន្ត ថ្ងៃចូលឆ្នាំទេ ថៃនឹងសប្បាយចិត្ត ព្រាះថា ឈ្នះដោយមិនបាច់ហត់។ មតិខ្លះលើកឡើងជាគំនិតគួរពិចារណាដែរថា កាន់ទុក្ខ យើងនឹងចងចាំជានិច្ច តែបុណ្យប្រពៃណីប្រចាំប្រទេសយើងតាំងពីសម័យកាលមកម្ល៉េះ ដូច្នេះគួរតែសប្បាយចិត្តណាស់ និងរៀបចំលេងដូចមុនៗ ដើម្បីរួមផ្សព្វផ្សាយវប្បធម៌ អរិយធម៌ជាតិ៕ដោយ: ចាន់រ៉ា