សៃហ្វុន ផ្តាំអ្នកជំនាន់ក្រោយ កុំយកការប្រកួតប្រជែងសម្រស់ជាកន្លែងកាប់ចាក់គ្នា ឬធ្វើរឿងខ្មៅងងឹត

ឆ្លងកាត់ការប្រកួតសម្រស់ និងក្នុងនាមជារៀមច្បងបវរកញ្ញាលំដាប់រងទី១ នៃកម្មវិធី Miss Universe Cambodia 2024 កញ្ញា សៃហ្វុន បានចែករំលែកបទពិសោធ និងផ្តាំទៅកាន់បេក្ខភាពជំនាន់ក្រោយ កុំយកការប្រកួតប្រជែងសម្រស់ជាកន្លែងកាប់ចាក់គ្នា ឬធ្វើរឿងខ្មៅងងឹត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាម កញ្ញា សៃហ្វុន ការប្រកួតប្រជែងនៅលើឆាក គឺគ្រាន់តែជាការបង្ហាញសមត្ថភាព និងចំណេះដឹងរបស់បេក្ខភាពប្រឡងម្នាក់ៗប៉ុណ្ណោះ ដូច្នេះកុំយកការឈ្នះចាញ់ធ្វើជាសត្រូវក្លាយគំនុំគុំគួនគ្នា។ ម្យ៉ាងទៀត បវរកញ្ញារូបនេះ ណែនាំថា បើតាំងចិត្តថាចូលប្រកួតហើយ ត្រូវតាំងចិត្តទទួលយកការពិត និងលទ្ធផល ហើយបំពេញតួនាទី ដែលទទួលបានឱ្យបានពេញលេញ។

ជាក់ស្តែងកញ្ញា សៃហ្វុន បានសរសេរសំណេរបង្ហោះភ្ជាប់រូបភាព ២សន្លឹកជាមួយនឹងម្ចាស់មកុដ Miss Universe Cambodia 2024 កញ្ញា ចន សុទីម៉ា ដោយរៀបរាប់ថា “នៅលើឆាកយើងជាដៃគូប្រកួតប្រជែង នៅក្រោមឆាកជាមិត្តភាពដ៏ល្អ ចែករំលែករឿងល្អៗ និងបង្កើតអនុស្សាវរីយ៍ល្អៗមកកាន់គ្នាទៅវិញទៅមក ក្នុងអំឡុងពេលប្រកួត”។

បវរកញ្ញាលំដាប់រងទី១ នៃកម្មវិធី Miss Universe Cambodia 2024 កញ្ញា សៃហ្វុន បានឱ្យដឹងទៀតថា “សូមផ្ដាំទៅបងប្អូនជំនាន់ក្រោយ កុំយកការប្រកួតប្រជែងសម្រស់ទៅជាកន្លែងកាប់ចាក់គ្នា និងធ្វើរឿងខ្មៅងងឹតជាច្រើន”។

ការណែនាំនេះ ធ្វើឱ្យអ្នកស្នេហាវិស័យបវរកញ្ញាបង្ហាញការយល់ស្រប ដោយលើកឡើងថា “ចប់ការប្រកួតគួរណាយើងជាបវរកញ្ញាត្រូវទទួលស្គាល់ការពិត ទទួលយកលទ្ធផលដែលបានកើតឡើង ទោះជាប់ឬមិនជាប់ក៏ដោយ លទ្ធផលល្អឬមិនល្អក៏ដោយយើងក៏ត្រូវចេះរំងាប់ចិត្តអ្នកគាំទ្ររបស់យើងដូចគ្នា ហើយមើលខ្លួនយើងវិញថា ខ្វះខាតកន្លែងណាទើបយើងមិនអាចទទួលបានជោគជ័យ កុំដុតបន្ថែម”។

មតិផ្សេងទៀត លើកឡើងដែរថា “អ្នកខ្លះមកប្រកួតច្រើនដងនៅតែមិនជាប់បានលទ្ធផលល្អផងតែគេនូវតែព្យាយាម។បវរកញ្ញាម្នាក់ៗមកប្រកួតចំណាយច្រើនណាស់ទាំងថវិការនិងពេលវេលា។ គោលដៅមុនពេប្រកួតជាអ្វី ចប់ការប្រកួតតើចង់ឲ្យវិសយ័នេះមានរឿងមិនចេះចប់? វែកញែក ផ្លែផ្កាឲ្យគ្នាមិនចេះចប់?”៕ ចាន់រ៉ា