លោក យុត្ថារ៉ា ឆានី នឹកគ្រប់អនុស្សាវរីយ៍គ្រាចូលសិល្ប:ដំបូង តែមិនអាចវិលត្រឡប់

តារាសម្តែងជើងចាស់ ធ្លាប់មានប្រជាប្រិយភាព និងទទួលបានការគាំទ្រច្រើន នាអំឡុងចុងទសវត្សរ៍ឆ្នាំ៨០ និងដើមទសវត្សរ៍ឆ្នាំ ៩០ លោក យុត្ថារ៉ា ឆានី កាលពីពេលថ្មីៗ កន្លងទៅគេចាំបានថា លោកដាច់ចិត្តទម្លាយប្រា​ប់ច្បាស់ៗ អំពីមូលហេតុ ដែលធ្វើឲ្យកាន់តែឃ្លាតឆ្ងាយសិល្ប:។

បើតាមការកត់សម្គាល់ តារាសម្តែងប្រុសជើងចាស់ លោក យុត្ថារ៉ា ឆានី គឺអំឡុងពេលមួយរយ:ពេលប៉ុន្មានឆ្នាំចុងក្រោយនេះ លោកហាក់ដូចជាស្ងប់ស្ងាត់ និងរយាលឆ្ងាយពីសិល្បៈស្ទើរតែទាំងស្រុក ខណ: កន្លងមកមានអ្នកគាំទ្រមួយចំនួន តែងតែសួរនាំចង់ដឹងអំបញ្ហានេះផងដែរ។ ប៉ុន្តែជាចម្លើយ គឺត្រូវបានលោក យុត្ថារ៉ា ឆានី បញ្ជាក់ថា ដោយសារលោកមិនចង់រងនូវគំនាបផ្លូវចិត្តណាមួយទៀតនោះទេ។

ថ្វីត្បិតបច្ចុប្បន្នលោក យុត្ថារ៉ា ឆានី ត្រូវបានដកខ្លួនឆ្ងាយពីសិល្ប:ក៏ពិតមែន តែលោកនៅតែរំលឹកដល់អនុស្សាវរីយ៍ចាស់​ៗជាច្រើនគ្រាចូលប្រឡូកវិថីនេះដំបូង។ ជាក់ស្តែងមុននេះ លោក យុត្ថារ៉ា ឆានី បង្ហោះរូបភាពជាច្រើនសន្លឹកអមដោយសំណេរ​ថា «គ្រប់សកម្មភាពគ្រប់អនុស្សាវរីយ៍ តែងតែនៅដិតជាប់ក្នុងអារម្មណ៍ តែមិនអាចវិលត្រឡប់ទៅរកអតីតកាល ដែលដូចនៅក្នុងរូបភាពបានឡើយ»។

សូមបញ្ជាក់ថា លោក យុត្ថារា ឆានី គឺជាតារាសម្ដែងដ៏ល្បីល្បាញ​មួយរូប នាអំឡុង​ចុងទសវត្សរ៍​ឆ្នាំ​ ៨០និងដើមទសវត្សរ៍ឆ្នាំ ៩០ រួមជំនាន់ជាមួយលោក ទេព រិន្ទដារ៉ូ និងអ្នកនាង អម្ពរទេវី ជាដើម។ ប៉ុន្តែគិតមកដល់ពេលបច្ចុប្បន្នលោក យុត្ថារ៉ា ឆានី កាន់តែឃ្លាតឆ្ងាយខ្លាំងពីអាជីពសិល្ប: ដោយងាកទៅចាប់មុខជំនួញណែនក្នុងដៃ៕

អត្ថបទ៖ ចាន់រ៉ា