យក់ ឋិតរដ្ឋា ឈឺចាប់ខ្លាំង ក្រោយរងអំពើអយុត្តិធម៌

ភ្នំពេញ: តារាចម្រៀងសំនៀងមនោសញ្ចេតនា អ្នក នាង យក់ ឋិតរដ្ឋា ថ្មីៗនេះនាងបានទម្លាយនូវការឈឺចាប់ខ្លាំង និងបានប្រកាសក្តែងៗថា ខ្លួនកំពុងរងនូវភាពអយុត្តិធម៌ពីសំណាក់បុគ្គលម្នាក់។

ថ្វីត្បិតតែតារាចម្រៀងអ្នកនាង យក់ ឋិតរដ្ឋា បានប្រកាសបង្ហាញការឈឺចាប់បែបនេះ ក្តីប៉ុន្តែនាងមិនបានបញ្ជាក់ទេថារឿងរ៉ាវនោះផ្តើមចេញពីបញ្ហាអ្វីឬជា មួយបុគ្គលណាម្នាក់ឡើយពោលគឺនាងគ្រាន់តែនិយាយដោយបើកចំហថានាងនឹងស៊ូតតាំងឱ្យដល់ទីបញ្ចប់ជាមួយបុគ្គលដែលបាននឹងកំពុងកើតមានជម្លោះជាមួយខ្លួន។

ជាក់ស្តែង អ្នកនាង យក់ ឋិតរដ្ឋា បានលើកឡើង កាលពីយប់ថ្ងៃទី ២៨ ខែ ឧសភា ឆ្នាំ២០២២ ដោយខ្លឹមសារបែបនេះថា “ខ្ញុំដឹងថាខ្ញុំគ្មានលុយកាក់ច្រើនដូចអ្នកឯងដើម្បីតតាំងជាមួយអ្នកឯង តែខ្ញុំនឹងតស៊ូអោយដល់ទីបញ្ចប់បើទោះជាខ្ញុំត្រូវដើរខ្ចីបុលលុយកាក់គេក៏ដោយ គឺខ្ញុំប្រើភាពស្មោះត្រង់របស់ខ្ញុំតែមួយមុខគត់អ្នកឯងហែលទឹកភ្នែកខ្ញុំមិនរូចទេ បាបកម្មមានពិត”។

អ្នកនាង យក់ ឋិតរដ្ឋា និយាយទៀតថា ​នាង​អត់​ដែល​បានធ្វើបាបអ្នកណាទេ បាបកម្ម​មាន​ពិត ​បំពាន​នាង ហេតុអី្វបំផ្លាញនាងអ៉ីចឹង ។ តាមរយ:នេះដែរ គេឃើញមានអ្នកគាំទ្របានសួរនាំនាងជុំវិញរឿងរ៉ាវដែលកំពុងកើតឡើងនេះដែរតែអ្នកនាង យក់ ឋិតរដ្ឋា បានត្រឹមឆ្លើយខ្លីវិញថា «​​អយុតិ្តធម៌​ណាស់​ ខ្ញុំ​និយាយ​អត់​ចេញ​ទេ​»។ ដោយឡែកស្វាមីរបស់នាងគឺលោក ឃុំ ប៊ុ​ណ្ណា​ណែ​ត ក៏​បានចែករំលែកសាររបស់ភរិយាដោយបានសរសេរលើកទឹកចិត្តថា ទ្រាំទៅប្រពន្ធសម្លាញ់ មាស​សុទ្ធមិនខ្លាចភ្លើង វា​ជា​លើក​ទី​១ក្នុង​ជីវិត​របស់​យើង ៕

អត្ថបទដោយ៖ ចាន់រ៉ា