ស្រ្គីបភាពយន្ត “Squid Game” វគ្គ២ កំពុងជាប់គាំង ព្រោះផលិតករស្មុគស្មាញលើរឿងមួយ

ផលិតករភាពយន្តភាគរឿង “Squid Game” លោក Hwang Dong-hyuk បង្ហាញភាពស្មុគស្មាញខ្លាំង លើការរៀបចំធ្វើឱ្យតួអង្គដែលស្លាប់រស់ឡើងវិញ សម្រាប់សាច់រឿងវគ្គ២ ដែលលោកបាននិងកំពុងសរសេរស្គ្រីប។ លោកនិយាយដូច្នេះ បន្ទាប់ពីឈ្នះពានរង្វាន់ពីកម្មវិធី Emmys ដំបូងបំផុតរបស់កូរ៉េខាងត្បូង កាលពីសប្តាហ៍មុន។

ភាពយន្ត “Squid Game” បានក្លាយជាស៊េរីដ៏ល្បីល្បាញបំផុត ដែលមានអ្នកទស្សនាច្រើនជាងគេ នៅលើ Netflix Inc មិនធ្លាប់មានពីមុន បន្ទាប់ពីការចេញផ្សាយរបស់ខ្លួន កាលពីខែកញ្ញាឆ្នាំមុន។ រឿងនេះទទួលបានប្រជាប្រិយភាពខ្លាំង រហូតដល់មានការបង្កើតនូវ memes អនឡាញរាប់មិនអស់ ព្រមទាំងសម្លៀកបំពាក់ Halloween និងការលក់ឈុតសម្លៀកបំពាក់ពណ៌បៃតងយ៉ាងសុះសាយពាសពេញពិភពលោក។

កាលពីថ្ងៃទី១៦ ខែកញ្ញា កន្លងទៅថ្មីៗនេះលោក Hwang Dong-hyuk បានផ្ដល់បទសម្ភាសន៍ជាមួយកម្មវិធីទូរទស្សន៍នៅក្នុងស្រុកមួយថា លោកបានបង្កើតហ្គេមរួចរាល់ហើយ សម្រាប់រដូវកាលទី២ ហើយក៏កំពុងសរសេរស្គ្រីបផងដែរ ប៉ុន្តែលោកក៏ស្ថិតក្នុងភាពលំបាក ស្មុគស្មាញ និងគាំងគំនិត ចំពោះតួអង្គដែលបានស្លាប់ដូចជា Ji-young និង Sae-byeok ជាដើម។ បន្ថែមពីលើនេះ លោកនិយាយបែបលេងសើចដោយធ្វើការសុំទោសចំពោះការសម្លាប់តួអង្គល្បីៗ ព្រោះលោកមិនធ្លាប់គិតនឹងផលិតវគ្គ២នោះទេ។

ទោះយ៉ាងណា ផលិតកររូបនេះ បានឱ្យដឹងថា រដូវកាលថ្មីនឹងចាប់ផ្ដើមថតនៅឆ្នាំក្រោយ ហើយចេញផ្សាយនៅឆ្នាំ ២០២៤ ៕

ប្រែសម្រួល៖ សន្យា

ចុចអាន៖ តួឯកប្រុសរឿង “Squid Game” ឈ្នះពានរង្វាន់ Emmy ដំបូងគេ ក្នុងប្រវត្តិសាស្ត្រកូរ៉េខាងត្បូង

ចុចអាន៖ តាមពិត Lisa យកឆ្កែផ្ទាល់ខ្លួនមកថត MV ព្រោះចេតនាសំខាន់មួយ