ប៉ូគីមថេង សុតធីតា សុំទោសអភិបាលខណ្ឌ ឬស្សីកែវ និងស្នើសុំដកពាក្យបណ្តឹងចេញពីតុលាការ

បន្ទាប់ដឹងនូវកំហុសឆ្គងរបស់ខ្លួនបវរកញ្ញា ប៉ូគីមថេង សុតធីតា ដែលជាម្ចានស់ម្កុដ Miss Grand Cambodia 2021 បានចេញមុខសុំទោសជាសាធារណ:ទៅកាន់អភិបាលខណ្ឌឬស្សីកែវ និងបានអង្វរសុំឲ្យលោកអភិបាលខណ្ឌមេត្តាអនុគ្រោះដកពាក្យបណ្ដឹងដែលប្តឹងនាងទៅតុលាការកាលពីថ្មីៗកន្លងទៅ ។

បើយោងតាមខ្លឹមសារដែលកញ្ញា ប៉ូគីមថេង សុតធីតា សរសេរភ្ជាប់ជាមួយវីដេអូបង្ហោះសុំទោសលោកអភិបាលខណ្ឌ​ឬស្សីកែវ បានលើកឡើងថា “នាងខ្ញុំ ប៉ូគឹមថេង សុតធីតា សូមគោរពសូមទោសដល់ឯងឧត្តមអភិបាលខណ្ឌឫស្សីកែវ តាមរយ: Video មួយនេះជាសាធារណ:“ ។ នៅក្នុងវីដេអូសុំទោសនោះ បវរកញ្ញា ប៉ូគីមថេង សុតធីតា បានរៀបរាប់ដោយការដឹងកំហុសថា នាងខ្ញុំសុំទោសជាសាធារណ: ទៅកាន់អភិបាលខណ្ឌឬស្សីកែវ ដែលកាលពីថ្ងៃទី០៨ និងទី១៤ ខែកក្កដា ឆ្នាំ២០២២ កន្លងទៅ ដែលនាងខ្ញុំបានធ្វើការ live វីដេអូនិយាយទៅធ្វើឲ្យប៉ះពាល់កិត្តិយស និងសេចក្តីថ្លៃថ្នូរ របស់លោកអភិបាល។

បវរកញ្ញា ប៉ូគីមថេង សុតធីតា បានបញ្ជាក់ថា មូលហេតុដោយសារតែនាងខ្ញុំភ័យព្រួយបារម្ភនៅក្នុងការខ្លាចបាត់បង់នូវទ្រព្យសម្បត្តិ ក៏ដូចជាដីធ្លីដែលជាកម្មសិទ្ធិផ្ទាល់ខ្លួនរបស់នាងខ្ញុំក្រុមគ្រួសារ និងម្ដាយរបស់នាងខ្ញុំទើបបានជានាងខ្ញុំធ្វើការឡាយប៉ះពាល់និយាយទៅដល់កិត្តិយស និងសេចក្ដីថ្លៃថ្នូររបស់លោកអភិបាលខណ្ឌឫស្សីកែវ។ ដូច្នេះនាងខ្ញុំសូមសំ ណូមពរទៅដល់លោកអភិបាលខណ្ឌឫស្សីកែវ សូមឲ្យលោកមេត្តាជួយដកពាក្យបណ្ដឹងដែលចុះនៅថ្ងៃទី២៨ ខែកក្កដា ឆ្នាំ២០២២ មកកាន់រូបនាងខ្ញុំ ទៅកាន់អយ្យការអមសាលាដំបូងរាជធានីភ្នំពេញ ដែលមានមេធាវី គុណ សុធី ជាតំណាងសាលាខណ្ឌឫស្សីកែវ ។

ប៉ូគីមថេង សុតធីតា បន្តទៀតថា នាងខ្ញុំសូមមេត្តាឲ្យលោកអភិបាលខណ្ឌជួយដកពាក្យបណ្ដឹងដែលធ្វើមកកាន់រូបនាងខ្ញុំផង ហើយនាងខ្ញុំ និងក្រុមគ្រួសារក៏សូមអភ័យទោសដល់លោកអភិបាលខណ្ឌ ហើយក៏សង្ឃឹមថា លោកអភិបាលខណ្ឌ​នឹងមានការអាណិតមេត្តាសន្ដោសប្រណីដល់រូបនាងខ្ញុំផង។

សូមបញ្ជាក់ថា ការចេញមុខសុំទោសរបស់បវរកញ្ញា ប៉ូគីមថេង សុតធីតា នាពេលនេះ បានធ្វើឡើងបន្ទាប់ពីពេលថ្មីៗកន្លងមក នាងបានចេញមុខបង្ហោះសារ និងបានធ្វើការ live វីដេអូតាមបណ្តាញសង្គមហ្វេសប៊ុកដោយធ្វើការរិះគន់ធ្ងន់ៗនិងចោទប្រកាន់ទៅលើអភិបាលខណ្ឌឬស្សីកែវ យ៉ាងចាស់ដៃ ក្រោយមានការបញ្ជាកម្លាំងឲ្យចុះរុះរើនូវរបង និងវាយកម្ទេច​ហាងដែលសាងសង់រំលោភលើចំណីផ្លូវដែលជារបស់រដ្ឋ ខណ:ដែល សុតធីតា គិតថា ជាកម្មសិទ្ធិស្របច្បាប់របស់នាង។

កាលនោះកញ្ញា ប៉ូគីមថេង សុតធីតា បានចោទប្រកាន់លោកអភិបាលខណ្ឌឫស្សីកែវ ថា បានប្រើប្រាស់អំពើហិង្សា និង គម្រាមកំហែងមកលើប្រជាពលរដ្ឋក្នុងសហគមន៍ និងដឹកនាំកម្លាំងទៅបំផ្លាញទ្រព្យសម្បិត្តិរបស់ខ្លួនជាច្រើនលើកច្រើន សាររហូតមានការចុះផ្សាយតាមបណ្តាសារព័ត៌មានជាហូរហែ ។ យ៉ាងណាដោយសារមើលឃើញពីកំហុសរបស់ខ្លួននាពេលកន្លងមកនោះ ទើបបវរកញ្ញារូបនេះក៏បានចេញមុខសុំទោសជាសាធារណៈ និងបានស្នើសុំឲ្យលោកអភិបាលខណ្ឌដើម្បីដកពាក្យបណ្តឹង ដែលបានប្តឹងនាងទៅតុលាពីបទបរិហារកេរ្តិ៍ ៕

អត្ថបទ៖ ចាន់រ៉ា