Lin Chiling ចង់ចូលនិវត្តន៍ ដោយសារមើលកូនហត់ពេក

តារាសម្ដែងនិងម៉ូដែលជនជាតិតៃវ៉ាន់ Lin Chiling វ័យ ៤៨ ឆ្នាំ បានប្រកាសថា មានគម្រោងចូលនិវត្តន៍ពីវិស័យសិល្បៈ ក្នុងកម្មវិធីរបស់ Kevin Tsai ថ្មីៗនេះ ។

Chiling មានស្វាមីជាតារាប៉ុបជនជាតិជប៉ុនឈ្មោះ Akira ពួកគេរៀបការតាំងពីឆ្នាំ ២០១៩ មកម្ល៉េះ ជាពិសេសមានកូនប្រុសម្នាក់ដែលកើតក្នុងខែមករា ឆ្នាំ២០២២ ទៀតផង ។ ក្រោយមានគ្រួសារ នាងមិនសូវចេញមុខក្នុងវិថីសិល្បៈប៉ុន្មានទេ Chiling ទទួលត្រឹមតែការងារថតទស្សនាវដ្ដី និងចូលរួមកម្មវិធីខ្លះៗប៉ុណ្ណោះ ។

ខណៈពេលកំពុងសន្ទនាជាមួយ Kevin ពីកូនប្រុសរបស់នាង Chiling សារភាពថា ខ្លួនមិនមានរាងកាយរឹងមាំដូចមុនឡើយ គ្រាន់តែមើលកូនប្រុសអាយុជាងមួយខួបក៏ហត់នឿយដែរ ។ បន្ទាប់មក Kevin ក៏សួរនាងថា “តើ Chiling នឹងចូលសិល្បៈវិញទេ ពេលកូនពេញវ័យ?” ស្រាប់តែនាងតបថា ដល់វេលានោះខ្លួនប្រហែលជាចាស់ពេកហើយ “ខ្ញុំសង្ឃឹមថានឹងនៅតែជា Chiling Jie Jie ក្នុងបេះដូងគ្រប់គ្នា ។ នាថ្ងៃអនាគត ពេលសក់ខ្ញុំស គ្រប់គ្នានឹងចងចាំខ្ញុំជាមួយនឹងសក់ខ្មៅ បុគ្គលិកលក្ខណៈដ៏កក់ក្ដៅរបស់ខ្ញុំ និងស្នាមញញឹម” ។

យ៉ាងណាតារាសម្ដែងរូបនេះនៅតែព្រមចេញមុខជាសាធារណៈដើម្បីកម្មវិធីសប្បុរសធម៌ ណាមួយនាងបានបង្កើតមូលនិធិសប្បុរសធម៌ផ្ទាល់ខ្លួនដូចគ្នា គឺ Chiling Charity Foundation ក្នុងឆ្នាំ ២០១១ ដើម្បីរៃអង្គាសថវិកាសម្រាប់កុមារត្រូវការជំនួយ ៕

ប្រែសម្រួល ៖ វារី

ប្រភព ៖ 8days

ចុចអាន ៖ អតីតតារាហុងកុង Michelle Reise ត្រូវមហាជនរិះគន់ ព្រោះពាក់រ៉ូបមិនអ៊ុត