ជីវិតកម្សាន្ដ

បវរកញ្ញាកម្ពុជា សេន ស្រីឡៃ គ្រងឈុត”នាងទេពអប្សរ”លេចធ្លោខ្លាំង

បានផុស

៧ ខែ មុន

នៅ

ថ្ងៃអង្គារ ១៤ វិច្ឆិកា ២០២៣

ដោយ

បវរកញ្ញាតំណាងកម្ពុជា កញ្ញា សេន ស្រីឡៃ MissTourism Cambodia 2023 ថ្មីៗនេះ បានចាកចេញពីប្រទេសកម្ពុជាដោយនាំយកទង់ជាតិ អរិយធម៌ វប្បធម៌ ដ៏ល្អផូរផង់របស់ខ្មែរ ទៅប្រកួតនៅលើឆាកអន្តរជាតិ នៃប្រទេសម៉ាឡេស៊ី ដែលមានបវរកញ្ញាជាច្រើនប្រទេសចូលរួមបង្អួតសម្រស់ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលស្រីស្អាត សេន ស្រីឡៃ កំពុងតែមានវត្តមានដើម្បីប្រកួតនៅប្រទេសម៉ាឡេស៊ី គេសង្កេតឃើញមានអ្នកគាំទ្រ ពិសេសអ្នកនិយមតាមដានវិស័យបវរកញ្ញានៅកម្ពុជា បានផ្តល់ការលើកទឹកចិត្ត និងជូនពរឲ្យបវរកញ្ញារូបនេះជោគជ័យសម្រាប់ការប្រកួតមួយនេះ។

បើចាប់អារម្មណ៍នៅលើផេក Miss Tourism International Cambodia បានបញ្ចេញរូបភាពភ្ជាប់ជាមួយឈុតឈ្មោះថា “នាងទេពអប្សរ” ដែលមានភាពលេចធ្លោ និងអស្ចារ្យខ្លាំង។ តាមការបញ្ជាក់ ឈុតនេះ ត្រូវបានរចនាឡើងជាទម្រង់សិល្បៈសហសម័យ មានការរួមបញ្ចូល នៃគ្រឿងអលង្ការ តាមលំនាំ នៃចម្លាក់សម័យកណ្តាល និងអង្គរ ជាមួយនឹងសម្លៀកបំពាក់បែបទំនើប រួមបញ្ចូលគ្នាបង្កើតជារូបភាពថ្មីមួយ។

ការរចនាឈុត”នាងទេពអប្សរ”នេះ ធ្វើឡើងដើម្បីបង្ហាញពីភាពសម្បូរបែប នៃគំនិតច្នៃប្រឌិត និងរូបារម្មណ៍មនុស្សជំនាន់ថ្មី បុរាណ និងសម័យ ដើរទៅមុខរួមគ្នា មិនអាចខ្វះបាន ព្រោះរបស់ថ្មីមួយត្រូវបានបង្កើតថ្មីបាន ក៏ត្រូវមានរបស់ចាស់ជាគ្រឹះបុរាណអភិរក្សថែរក្សា សម័យនៅតែអភិវឌ្ឍន៍ទៅមុខជានិច្ច។

សូមបញ្ជាក់ថា ការចេញទៅប្រកួតរបស់ សេន ស្រីឡៃ នៅក្នុងកម្មវិធី Miss Tourism International 2023 នេះ នឹងនាំយកប្រទេសកម្ពុជា ទង់ជាតិ វប្បធម៌ និងអរិយធម៌ ដ៏ស្រស់ផូរផង់របស់កម្ពុជា ទៅបង្ហាញនៅលើឆាកអន្តរជាតិផងដែរ។ ជាការកត់សម្គាល់មុនពេលចេញទៅប្រកួត ស្រីឡៃ បានត្រៀមខ្លួនរួចជាស្រេចពោរពេញដោយភាពជឿជាក់ក្លាហានក្នុងនាមបវរកញ្ញាដែលតំណាងកម្ពុជា ចូលរួមប្រកួតលើឆាកអន្តរជាតិឆ្នាំនេះ៕

អត្ថបទ ៖ ចាន់រ៉ា