ខំហ្វឹកហាត់៧ឆ្នាំ Seunghan ទម្រាំក្លាយជាតារា Kpop បែរជាត្រូវបញ្ចប់ត្រឹមរឿងបែបនេះ

កាលពីថ្មីៗនេះ ផលិតកម្ម SM Entertainment បានប្រកាសជាសាធារណៈថា Seunghan បានសម្រេចចិត្តចាកចេញពីក្រុម RIIZE ជាផ្លូវការហើយ បន្ទាប់ពីមានបញ្ហាចម្រូងចម្រាស់ពាក់ព័ន្ធនឹងការជក់បារី និង​ ត្រូវបានហ្វេនរកឃើញថា នាំសង្សារចូលសណ្ធាគារមួយកន្លែង។

ចំពោះការសម្រេចចិត្តរបស់ Seunghan មួយនេះ គឺមូលហេតុដោយសារតែលោកធ្វើដើម្បីអ្នកគាំទ្រ និង សមាជិកក្រុម RIIZE ដោយមិនចង់ឲ្យពួកគេខូចឈ្មោះដោយសារខ្លួន។ យ៉ាងណាមិញ កាលពីប៉ុន្មានថ្ងៃមុន SM បានប្រកាសអំពីការត្រឡប់មកវិញរបស់ Seunghan គិតចាប់ពីខែវិច្ឆិកា តទៅ ប៉ុន្ដែដោយសារតែការមិនពេញចិត្តរបស់អ្នកគាំទ្រពីមួយថ្ងៃទៅមួយថ្ងៃកាន់តែបង្កឲ្យមានភាពចម្រូងចម្រាស់ច្រើនឡើង។

មិនតែប៉ុណ្ណោះ ក្រុមអ្នកគាំទ្រជាច្រើនបានយកផ្កាបុណ្យសពទៅដាក់នៅមុខអាគារក្រុមហ៊ុន SM យ៉ាងច្រើនសន្ធឹកសន្ធាប់ បង្ហាញពីការប្រឆាំងដាច់ខាតចំពោះការត្រឡប់មកវិញរបស់ Seunghan។ ចុងក្រោយសមតាមបំណងមែន តារាប្រុសវ័យ២១ឆ្នាំរូបនេះ សម្រេចបញ្ចប់អាជីពរបស់ខ្លួន ដោយការចាកចេញពីក្រុមតែម្ដង។

គួររំលឹកដែរថា Seunghan គឺជាសមាជិកក្រុម RIIZE ដែលបានបង្ហាញខ្លួននៅក្នុងឆ្នាំ២០២៣ ជាមួយនឹងសមាជិក៧នាក់ គឺ Shotaro, Eunseok, Sungchan, Wonbin, Sohee, និង Anton រាប់បញ្ចូលទាំង Seunghan។
អ្វីដែលគួរឲ្យសោកស្ដាយនោះគឺ សមាជិកម្នាក់នេះ បានឆ្លងកាត់ការហ្វឹកហាត់យ៉ាងលំបាក អស់រយៈពេល៧ឆ្នាំ ទម្រាំបាន Debut ប៉ុន្ដែត្រូវអត់ន័យ ត្រឹមតែបញ្ហារឿងអាស្រូវ នាំសង្សារចូលសណ្ធាគារ ហើយនិងជក់បារី។ ទោះបីជាយ៉ាងណាក្ដី ហ្វេនៗដែលស្រឡាញ់ Seunghan នូវតែតាមគាំទ្រជានិច្ច បើទោះបីជាលោកទៅជាយ៉ាងណាក៏ដោយ៕

ប្រភព៖ koreaboo