វណ្ណថាន សម្រេចបានសមិទ្ធផលធំមិនធ្លាប់មាន តាំងពីចាប់អាជីពសិល្ប:

តារាចម្រៀងរ៉េបលោក វណ្ណថាន បានបង្ហាញមោទភាពជាខ្លាំង ក្រោយលោកសម្រេចបាននូវគោលដៅដ៏ធំរបស់ខ្លួនមិនធ្លាប់មាន ចាប់តាំងពីចូលប្រឡូកក្នុងវិស័យសិល្ប:ច្រើនឆ្នាំមកនោះ។ មិនតែប៉ុណ្ណោះ លោកបានចាត់ទុកថានេះ ក៏ដោយសារតែការគាំទ្ររបស់ទស្សនិកជនផងដែរ។

ចំពោះសមិទ្ធផលធំដែលតារាចម្រៀងលោកវណ្ណថាន សម្រេចគួរជាទីមោទន:សម្រាប់ខ្លួននាពេលនេះ គឺតាមរយ:ចម្រៀងបទ “កំលោះស្រុកខ្មែរ” ដែលជាការពួតដៃច្រៀងរួមគ្នាជាមួយកំពូលតារារ៉េបវ័យក្មេង លោក វណ្ណដា ខណ:ត្រឹមរយ:ពេលជាងឆ្នាំ មានអ្នកចូលទស្សនារហូត ១០០លានដង។

វណ្ណថាន បានរៀបរាប់ដោយក្តីរំភើបថា “ជាដំបូងសូមអរគុណទៅកាន់ពុកម៉ែបងប្អូនអ្នកគាំទ្រទាំងអស់សម្រាប់កាដូដ៏ធំមួយនេះ។ ចំនួនទស្សនានេះ ជាសមិទ្ធផលធំជាងគេបង្អស់ (១០០លានទស្សនា) ដែលលោកទទួលបានតាំងពីចាប់អាជីពសិល្ប:នេះមក ហើយដោយសារតែការគាំទ្ររបស់អ្នកទាំងអស់គ្នា ទើបអាចជម្រុញភាពច្នៃប្រឌិតរបស់ខ្ញុំឱ្យកាន់តែកើនខ្ពស់ឡើងកម្រិតថែមទៀតពីមួយថ្ងៃទៅមួយថ្ងៃ”។

លោកបន្តថា បើរលឹកទៅកាលពេលចេញបទនេះដំបូង លោកមិននឹកស្មានថាអ្នកគាំទ្រនឹងស្រលាញ់ចូលចិត្តខ្លាំងបែបនេះនោះទេ។ ទន្ទឹមនេះ លោកក៏មានក្តីសោមន្យរីករាយផងដែរ ដែលលោក និងតារាចម្រៀងរ៉េប វណ្ណដា អាចផលិតចេញជាបទចូលឆ្នាំមួយបទនេះ ជូនពលរដ្ឋខ្មែរបានរាំលេងសប្បាយទាំងអស់គ្នា មិនថាអ្នកនៅក្នុងស្រុក ឬក្រៅស្រុក។

ឆ្លៀតក្នុងឱកាសនេះ វណ្ណថាន ក៏បានថ្លែងអំណរគុណដល់សាធារណជន ពិសេសអ្នកគាំទ្រ និងក្រុមការងារទាំងអស់ដែ លបានចូលរួមសម្រេចសមិទ្ធផលដ៏អស្ចារ្យមួយនេះ ហើយលោកសន្យាថា នឹងខិតខំបន្តទៀតដើម្បីឱ្យតន្ត្រីខ្មែរកាន់តែល្បីល្បាញ។

គួរបញ្ជាក់ថា លោកវណ្ណថាន បច្ចុប្បន្នហាក់ក្តោបបានប្រជាប្រិយភាពខ្លាំងគួរសមផងដែរ ពីសំណាក់អ្នកគាំទ្រ ជាពិសេសគឺបទចម្រៀងដែលល្បីល្បាញខ្លាំងនោះគឺបទ “កំលោះស្រុកខ្មែរ” ដែលលោកបានច្រៀងដៃគូជាមួយកំពូលតារារ៉េបលោក វណ្ណដា ៕ អត្ថបទ៖ ចាន់រ៉ា