ឈប់រៀន ព្រោះជា Introvert! តារាស្រី Lee Ei ទម្លាយប្រវត្តិខ្លួនមុនក្លាយជាតារាសម្ដែងល្បី

បើសិនជាប្រិយមិត្តធ្លាប់បានទស្សនារឿងភាគកូរ៉េដ៏ល្បីល្បាញ Goblin ច្បាស់ជាស្គាល់មុខតួអង្គស្រីម្នាក់ ដែល Lee Ei ជាតារាសម្ដែងដ៏ឆ្នើមមួយរូប និងទទួលបានការចាប់អារម្មណ៍ជាខ្លាំង។ បើទោះបីជារូបនាង មិនធ្លាប់បានសម្ដែងជាតួឯកក្ដី ប៉ុន្ដែប្រជាប្រិយភាពរបស់នាងល្បីល្បាញមិនធម្មតានោះទេ។

បើក្រឡេកទៅមើលប្រវត្តិរបស់ Lee Ei វិញ នាងបានទម្លាយថា ខ្លួនបានឈប់រៀននៅថ្នាក់វិទ្យាល័យ មិនបានឆ្លងកាត់ការសិក្សាឲ្យចប់ចុងចប់ដើមដូចមនុស្សទូទៅនោះទេ។ នៅក្នុងនោះ នាងបានប្រាប់ពីមូលហេតុនៃការឈប់រៀននេះថា ដោយសារតែអត្តចរិតរបស់នាង មានភាពខុសប្លែកពីមនុស្សដ៏ទៃ ការទៅរៀនគឺជារឿងដ៏ពិបាកមួយ។

ការសិក្សារៀនសូត្រមិនមែនជារឿងពិបាកសម្រាប់ Lee Ei ទេ ប៉ុន្ដែការដែលនាងមិនអាចរាប់អានមិត្តភក្ដិ គឺជាមូលហេតុដ៏ធំដែលធ្វើឲ្យនាងបោះបង់ការសិក្សា។ តារាស្រីរូបនេះ បន្ដទៀតថា​ “ខ្ញុំជាមនុស្ស introvert ហើយមានបុគ្គលិកលក្ខណៈពិសេស។ ជីវិតនៅសាលាខ្លួនឯងលំបាក និងឯកោសម្រាប់ខ្ញុំ។ ខ្ញុំ​មិន​អាច​ចុះសម្រុង​ជាមួយ​មិត្តភក្តិ​បាន​ល្អ​ទេ។ អ្នកប្រាកដជាដឹងហើយថា តែងតែមានក្មេងម្នាក់ចូលចិត្តនៅតែម្នាក់ឯងនៅក្នុងថ្នាក់រៀន។”

នៅ​ពេល​សួរ​ថា តើ​ឪពុក​ម្តាយ​របស់​នាង​ប្រឆាំង​នឹង​ការ​សម្រេច​ចិត្ត​ឈប់​រៀន​ឬ​អត់ ​នោះ Lee El បាន​និយាយ​ថា៖
“ពួកគាត់ពិតជាខឹងខ្លាំងណាស់ ហើយបន្ទាប់ពីគិតបានមួយសប្តាហ៍ ប៉ារបស់ខ្ញុំបានទិញសូជូអោយខ្ញុំនៅភោជនីយដ្ឋាន gogi ក្បែរផ្ទះ ហើយគាត់បានប្រាប់ខ្ញុំថា ឯងអាចឈប់រៀនបាន ប៉ុន្តែឯងត្រូវតែចាត់ចែងជីវិតដោយខ្លួនឯង។”

ជាមួយគ្នានេះដែរ Lee Ei គឺជាមនុស្សស្រីម្នាក់ ដែលមានការតស៊ូនៅក្នុងជីវិត រូបនាងបានឆ្លងកាត់ការលំបាកច្រើនណាស់ ទម្រាំបានក្លាយជាតារាល្បីល្បាញមកដល់សព្វថ្ងៃនេះ ហើយនាងក៏បានបង្ហាញឲ្យយើងដឹងថា មនុស្សគ្រប់រូបមិនមែនមានប្រវត្តិល្អ យោងទៅតាមការងាររបស់ពួកគេនោះទេ អ្នកខ្លះតស៊ូណាស់ទម្រាំបានដូចសព្វថ្ងៃ៕