ញឹម ច័ន្ទថន ប្រកាសចែកទានយាយតាជួបការខ្វះខាតជាង ១០០នាក់ ក្នុងឱកាសថ្ងៃខួបកំណើត ៤៥ឆ្នាំ ស្អែកនេះ

ដើម្បីជាការចូលរួមចែករំលែកនូវក្តីស្រលាញ់នាក្នុងឱកាសថ្ងៃអបអរខួបកំណើតតារាសម្តែង និងចម្រៀងកញ្ញា ញឹម ច័ន្ទថន បានប្រកាសត្រៀមចែកទានដល់លោកតាលោកយាយប្រមាណជាង ១០០នាក់ ។

តារាស្រីកញ្ញា ញឹម ច័ន្ទថន បានបញ្ជាក់ឱ្យដឹងថា សម្រាប់ទីតាំងដែលនាងត្រូវចែកអំណោយជូនដល់លោកតាលោកយាយ គឺនៅថ្ងៃទី ១៣ខែមីនា ស្អែកនេះ នៅទីតាំងរមណីយដ្ឋានប្រវត្តិសាស្ត្រវត្តភ្នំ ហើយនាងក៏សង្ឃឹមមានការចូលរួមចំណែកពីសប្បុរសជនផងដែរ។

កញ្ញា ញឹម ច័ន្ទថន បានរៀបរាប់ថា ជំរាបសួរលោកយាយលោកតាអ៊ំពូមីងទាំងអស់ជាទីគោរព និងជាទីស្រលាញ់នាឱកាសថ្ងៃខួបកំណើតរបស់នាងខ្ញុំនៅថ្ងៃទី១៣ ខែមីនា ឆ្នាំ២០២៥ ខាងមុខនេះ នាងខ្ញុំបានរៀបចំនូវសម្ភារៈប្រើប្រាស់មានដូចជា, ក្រម៉ានិងថវិការបន្តិចបន្តួច និងមានអាហារគុយទាវសុខភាពរបស់នាងខ្ញុំផ្ដល់រួមទាំងទឹកសុទ្ធ ដើម្បីចែកជូនដល់លោកយាយលោកតាចំនួន ១០០នាក់ ដែលប្រព្រឹត្តទៅនៅរមណីយដ្ឋានប្រវត្តិសាស្ត្រវត្តភ្នំ។

តារាចម្រៀង ញឹម ច័ន្ទថន បានបន្ថែមថាសូមចូលរួមចែករំលែកសេចក្តីស្រលាញ់ជាមួយនឹងថ្ងៃដ៏មានអត្ថន័យនៃពិធីខួបកំណើតរបស់នាងផង។ តារាស្រី ញឹម ច័ន្ទថន គិតមកដល់ពេលនេះ នាងមានអាយុ ៤៥ឆ្នាំហើយ ខណ:នៅមិនទាន់មានដំណឹងយកស្វាមីនៅឡើយទេ។

សូមបញ្ជាក់ដែរថា តារាសម្តែងនិងចម្រៀងកញ្ញា ញឹមច័ន្ទថន បើគិតមកដល់ពេលនេះ នាងបានចូលប្រឡូកក្នុងវិស័យសិល្ប:មានរយ:ពេលប្រមាណជាង ២០ឆ្នាំហើយ ខណ:បច្ចុប្បន្ននៅតែប្រជាប្រិយភាពគួរសម៕ អត្ថបទ៖ ចាន់រ៉ា