លោកត្រាំ​ប្រាប់​ថា លោកស៊ី«ដឹងពីផលវិបាក» បើ​ហ៊ាន​វាយតៃវ៉ាន់

ប្រធានាធិបតីអាមេរិក លោក ដូណាល់ ត្រាំ បាននិយាយថា មេដឹកនាំចិន លោក ស៊ី ជីនពីង «ដឹងពីផលវិបាក» នៃសកម្មភាពយោធាប្រឆាំងនឹង​កោះតៃវ៉ាន់ ទោះបីជាលោកបដិសេធ​និយាយថាតើសហរដ្ឋអាមេរិកនឹងធ្វើអន្តរាគមន៍ផ្នែកយោធាដែរឬទេ បើចិនបានឈ្លានពានលើកោះដែលគ្រប់គ្រងដោយខ្លួនឯងនោះ។

នៅក្នុងបទសម្ភាសន៍មួយដែលត្រូវបានចាក់ផ្សាយកាលពីថ្ងៃអាទិត្យ​ទី​២​ខែ​វិច្ឆិកា​នៅលើកម្មវិធី«60 Minutes» របស់ CBS លោកត្រាំ​បានរំលឹកឡើងវិញថា តៃវ៉ាន់មិនត្រូវបានពិភាក្សាក្នុងអំឡុងពេលកិច្ចប្រជុំរបស់គាត់ជាមួយលោក​ស៊ី កាលពីសប្តាហ៍មុននៅក្នុង​ប្រទេសកូរ៉េខាងត្បូងទេ។

លោកត្រាំ បាន​លើក​ឡើង​ថា លោកមានទំនុកចិត្តថា លោកស៊ី​ នឹងមិនធ្វើសកម្មភាពប្រឆាំងនឹងកោះតៃវ៉ាន់ ក្នុងអំឡុងពេល​លោក​ធ្វើជាប្រធានាធិបតី​ឡើយ។ លោកត្រាំ បាន​ប្រាប់​ថា «គាត់បាននិយាយដោយបើកចំហ ហើយប្រជាជនរបស់គាត់បាននិយាយដោយចំហនៅឯកិច្ចប្រជុំថា យើងនឹងមិនធ្វើអ្វីទាំងអស់ ខណៈពេលដែលលោកត្រាំ​ជាប្រធានាធិបតី ដោយសារតែពួកគេដឹងពីផលវិបាក»។

នៅពេល​ត្រូវ​​គេ​សួរ​ថា​តើ​លោក​នឹង​បញ្ជា​​ឲ្យ​​មាន​ការ​ឆ្លើយ​តប​ខាង​យោធា​របស់​អាមេរិក​ប្រសិនបើ​ចិន​ឈ្លានពាន​កោះ​តៃវ៉ាន់ឬ​អត់ លោកត្រាំ​ គ្រាន់​តែ​​ផ្តល់​ការ​ព្រមាន​ដោយ​ប្រយោល។ មេ​ដឹក​នាំ​អាមេរិក​វ័យ​៧៩​ឆ្នាំ​បាន​បញ្ជាក់​ថា «អ្នកនឹងដឹងថាវាកើតឡើងឬអត់។ ហើយគាត់យល់ចម្លើយចំពោះរឿងនោះ។ ខ្ញុំមិនអាចបង្ហើប​ពី​រឿង​សម្ងាត់​​របស់ខ្ញុំបានទេ។ ភាគីម្ខាងទៀតដឹងហើយ»។

ការអត្ថាធិប្បាយនេះ បានឆ្លុះបញ្ចាំងពីគោលនយោបាយ«ភាពមិនច្បាស់លាស់ជាយុទ្ធសាស្ត្រ»របស់ទីក្រុងវ៉ាស៊ីនតោន ដែលមានគោលបំណងរារាំងទីក្រុងប៉េកាំងពីការប្រើប្រាស់កម្លាំងប្រឆាំងនឹងតៃវ៉ាន់ ខណៈពេលដែលរារាំងទីក្រុងតៃប៉ិពីការប្រកាសឯករាជ្យជាផ្លូវការ។

ក្នុងអំឡុងពេលកិច្ចប្រជុំដាច់ដោយឡែកមួយកាលពីថ្ងៃសុក្រនៅ​ប្រទេសម៉ាឡេស៊ី រដ្ឋមន្ត្រីការពារជាតិចិនលោក Dong Jun បានប្រាប់សមភាគី​អាមេរិក​លោក​ Pete Hegseth ថា «ការបង្រួបបង្រួមភាគីទាំងពីរនៃច្រកសមុទ្រតៃវ៉ាន់ គឺជានិន្នាការប្រវត្តិសាស្ត្រដែលមិនអាច​ប្រកែក​បាន» ហើយបានជំរុញ​ឲ្យ​សហរដ្ឋអាមេរិក «ធ្វើសកម្មភាពដោយប្រុងប្រយ័ត្ន» និងប្រឆាំងនឹងឯករាជ្យភាពរបស់តៃវ៉ាន់។

ការកត់សម្គាល់របស់លោកត្រាំ ផ្ទុយទៅនឹងអ្នកកាន់តំណែងមុនរបស់គាត់គឺ លោក ចូ បៃដិន ដែលបានស្នើម្តងហើយម្តងទៀតថា ទីក្រុងវ៉ាស៊ីនតោននឹងការពារតៃវ៉ាន់នៅក្នុងព្រឹត្តិការណ៍នៃការវាយប្រហាររបស់ចិន ដោយទាត់ចោល​នូវ​​ភាពមិនច្បាស់លាស់អស់​ជាច្រើនទសវត្សរ៍​របស់​អាមេរិក​ចំពោះ​តៃវ៉ាន់។

សូម​ជម្រាប​ថា ទោះបី​សហរដ្ឋអាមេរិកបានបញ្ចប់ទំនាក់ទំនងការទូតជាផ្លូវការជាមួយទីក្រុងតៃប៉ិក្នុងឆ្នាំ១៩៧៩​​ក៏ដោយ ក៏មហា​អំណាច​មួយ​នេះ​​នៅ​​រក្សាទំនាក់ទំនងមិនផ្លូវការយ៉ាងជិតស្និទ្ធ និងអនុវត្ត​​​ច្បាប់ទំនាក់ទំនងតៃវ៉ាន់ ដើម្បីផ្តល់អាវុធការពារដើម្បីជួយកោះនេះរក្សាសមត្ថភាពការពារខ្លួន៕

ដោយ៖ ឈាង