ព័ត៌មានអន្ដរជាតិ

ចិនប្រកាសមិនជួបជប៉ុននៅកិច្ចប្រជុំG20 ចំពេលភាពតានតឹងជុំវិញកោះតៃវ៉ាន់កើនកម្ដៅខ្លាំង

បានផុស

៨ ខែ មុន

នៅ

ថ្ងៃអង្គារ ១៨ វិច្ឆិកា ២០២៥

ដោយ

Chheang

ប្រទេសចិនបានច្រានចោលលទ្ធភាពនៃការជួបប្រជុំទ្វេភាគីជាមួយប្រទេសជប៉ុននៅកិច្ចប្រជុំកំពូល G20 នាសប្តាហ៍ក្រោយ ដែលជាសញ្ញាមួយបង្ហាញពីភាពតានតឹងផ្នែកការទូតយ៉ាងគំហុកបន្ទាប់ពីរដ្ឋាភិបាលទីក្រុងតូក្យូបានធ្វើអត្ថាធិប្បាយថ្មីៗនេះទាក់ទងនឹងកោះតៃវ៉ាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់សារព័ត៍មាន Asahi ប្រទេសចិនកាលពីថ្ងៃចន្ទទី១៧ខែវិច្ឆិកាឆ្នាំ២០២៥ បានប្រកាសថា លោក Li Qiang នាយករដ្ឋមន្ត្រីចិន នឹងមិនជួបជាមួយលោកស្រី Sanae Takaichi នាយករដ្ឋមន្ត្រីជប៉ុន នៅក្រៅកិច្ចប្រជុំកំពូល G20 ក្នុងប្រទេសអាហ្វ្រិកខាងត្បូងនោះទេ។ ការបដិសេធនេះ កើតឡើងបន្ទាប់ពីទីក្រុងប៉េកាំងបានចោទប្រកាន់ទីក្រុងតូក្យូថាបានធ្វើឲ្យខូចខាតដល់មូលដ្ឋាននយោបាយនៃទំនាក់ទំនងរបស់ប្រទេសទាំងពីរ។

អ្នកនាំពាក្យក្រសួងការបរទេសលោកស្រី Mao Ning បានថ្លែងថា ជប៉ុនគួរតែដកការអត្ថាធិប្បាយ«ខុសឆ្គង» របស់ខ្លួនលើកោះតៃវ៉ាន់ ដោយព្រមានថា ការលើកឡើងរបស់ជប៉ុនបានបង្កឲ្យមាន«ការខូចខាតធ្ងន់ធ្ងរ» ដល់ចំណងទ្វេភាគី។

វិវាទនេះបានផ្ទុះឡើងបន្ទាប់ពីលោកស្រី Sanae Takaichi បានថ្លែងទៅកាន់សភាកាលពីពេលថ្មីៗនេះថា ការវាយប្រហាររបស់ចិនលើកោះតៃវ៉ាន់អាចជំរុញឲ្យជប៉ុនឆ្លើយតបផ្នែកយោធា។ ទីក្រុងប៉េកាំង ដែលអះអាងថាកោះដែលគ្រប់គ្រងខ្លួនឯងនេះជាទឹកដីរបស់ខ្លួន បានថ្កោលទោសសេចក្តីថ្លែងការណ៍នេះថាជាការបង្កហេតុ។

ដោយសារគ្មានការចរចាត្រូវបានគ្រោងទុករវាងមហាអំណាចអាស៊ីទាំងពីរនៅកិច្ចប្រជុំ G20 ភាពប្រេះឆាជុំវិញកោះតៃវ៉ាន់ហាក់បីដូចជានឹងកាន់តែស៊ីជម្រៅ ដោយធ្វើឲ្យការទូតក្នុងតំបន់មានភាពស្មុគស្មាញ នៅពេលដែលភាពតានតឹងភូមិសាស្ត្រនយោបាយកំពុងកើនឡើង៕

ប្រែសម្រួល៖ ឈាង