ព័ត៌មានអន្ដរជាតិ

អាន់វ៉ា ជួបតាមទូរស័ព្ទរួចហើយជាមួយនាយករដ្ឋមន្ត្រីកម្ពុជានិងថៃ ប៉ុន្តែមិនទាន់ឯកភាពគ្នា

បានផុស

៧ ខែ មុន

នៅ

ថ្ងៃពុធ ១០ ធ្នូ ២០២៥

ដោយ

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានបង្ហោះសារលើបណ្តាញសង្គមហ្វេសប៊ុករបស់លោក នៅថ្ងៃទី១០ខែធ្នូឆ្នាំ២០២៥នេះ ឲ្យដឹងថា លោកបានភ្ជាប់និយាយតាមទូរស័ព្ទជាមួយនាយករដ្ឋមន្រ្តីកម្ពុជា និងថៃ ដើម្បីពិភាក្សាអំពីភាពតានតឹងដែលកំពុងកើតមាននៅតាមព្រំដែនរួមគ្នារបស់ប្រទេសទាំងពីរកាលពីម្សិលមិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសារក្នុងបណ្តាញសង្គម ដោយភ្ជាប់ជាមួយរូបថតរបស់លោក ជាមួយនាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត និង លោក អានុទីន ឆានវីរៈគុល នាយករដ្ឋមន្ត្រីថៃ ដោយរៀបរាប់និងកោតសរសើរចំពោះភាគីកម្ពុជានិងថៃថា មានភាពបើកចំហ និងឆន្ទៈរបស់មេដឹកនាំទាំងពីរក្នុងការបន្តការចរចាក្នុងគោលបំណងបន្ធូរបន្ថយភាពតានតឹង និងទប់ស្កាត់ការយល់ច្រលំដែលអាចធ្វើឲ្យស្ថានការណ៍កាន់តែធ្ងន់ធ្ងរឡើង។

ទោះមានការសន្ទនាបែបនេះក៏ដោយ លោក អាន់វ៉ា បានបញ្ជាក់ថា ខណៈពេលដែលដំណោះស្រាយច្បាស់លាស់មិនទាន់ឈានដល់ការឯកភាពគ្នា ការចូលរួមការទូតប្រកបដោយនិរន្តរភាពបានធានាថាមិនមានឧបទ្ទវហេតុធ្ងន់ធ្ងរទៀតទេកើតឡើងក្នុងអំឡុងពេលម៉ោងដ៏សំខាន់ទាំងនេះ។

លោក អាន់វ៉ា បានរៀបរាប់ថា៖«ម៉ាឡេស៊ីនឹងបន្តគាំទ្រការសន្ទនាដោយសន្តិភាព ដំណោះស្រាយផ្អែកលើច្បាប់អន្តរជាតិ និងពង្រឹងកិច្ចសហប្រតិបត្តិការក្នុងតំបន់ដើម្បីការពារស្ថិរភាព និងសន្តិសុខនៃតំបន់របស់យើងទាំងអស់គ្នា»៕

រ៉ាន់ រើយ