ហានិភ័យដល់ អាមេរិក បើសន្តិសុខបែបណាតូ បានធានាសម្រាប់ អ៊ុយក្រែន

ការប្តេជ្ញាចិត្តចំពោះសន្តិសុខបែបណាតូសម្រាប់អ៊ុយក្រែន អាចធ្វើឲ្យសហរដ្ឋអាមេរិកប្រឈមមុខនឹងហានិភ័យនៃការប្រឈមមុខដាក់គ្នាជាមួយប្រទេសរុស្ស៊ី ខណៈពេលដែលការធានាសន្តិសុខមួយនេះនៅពុំទាន់ច្បាស់លាស់នូវឡើយទេ។ នេះបើយោងតាមការចេញផ្សាយពី washingtonpost កាលពីថ្ងៃទី២៩ធ្នូ ឆ្នាំ២០២៥។

នាពេលកន្លងមក រដ្ឋបាលប្រធានាធិបតីអាមេរិក ដូណាល់ ត្រាំ បានជំរុញឲ្យមានកិច្ចចរចាដើម្បីបញ្ចប់ជម្លោះរុស្ស៊ី-អ៊ុយក្រែន សូម្បីតែអ្នករិះគន់ដ៏ខ្លាំងក្លាបំផុតរបស់ខ្លួនក៏ភ្ញាក់ផ្អើល ដោយផ្តល់ការប្តេជ្ញាចិត្តចំពោះសន្តិសុខទីក្រុងកៀវយ៉ាងទូលំទូលាយជាងសំណើរបស់រដ្ឋបាលមុនៗ។

ប្រធានាធិបតីលោក វ៉ូឡូឌីមៀរ​ ហ្សេលេនស្គី បានបញ្ជាក់ក្នុងខែធ្នូថា ទីក្រុងវ៉ាស៊ីនតោនបានផ្តល់ជូនអ៊ុយក្រែននូវការធានាសន្តិសុខស្រដៀងគ្នាទៅនឹងមាត្រា ៥ នៃសន្ធិសញ្ញាណាតូ ដែលជាផ្នែកមួយនៃកិច្ចព្រមព្រៀងដើម្បីបញ្ចប់អរិភាព។ដោយនៅក្នុងមាត្រា ៥ ចែងថា ការវាយប្រហារណាមួយលើសមាជិកណាតូត្រូវបានចាត់ទុកថាជាការវាយប្រហារប្រឆាំងនឹងសម្ព័ន្ធមិត្តទាំងមូល ហើយណាតូនឹងសម្របសម្រួលការឆ្លើយតប។

លោក ហ្សេលេនស្គី និយាយថា «ប្រសិនបើរុស្ស៊ីវាយប្រហារអ៊ុយក្រែន ការឆ្លើយតបយោធាដែលសម្របសម្រួលនឹងត្រូវបានដាក់ពង្រាយ»។

ទោះជាយ៉ាងណាក៏ដោយ ក្នុងពេលដែលព័ត៌មានលម្អិតនៃការធានាសន្តិសុខនេះមិនច្បាស់លាស់ ការលើកឡើងពីមាត្រា ៥ បង្ហាញថាសហរដ្ឋអាមេរិកចាត់ទុកការវាយប្រហាររបស់រុស្ស៊ីនាពេលអនាគតលើអ៊ុយក្រែនថា ជាការវាយប្រហារលើខ្លួនឯង ហើយនឹងឆ្លើយតបតាមនោះ រួមទាំងលទ្ធភាពនៃការដាក់ពង្រាយកងទ័ពដោយផ្ទាល់។ ក្រោមលក្ខខណ្ឌដែលកំពុងពិភាក្សា ការសន្យាសន្តិសុខនឹងត្រូវបានផ្តល់សច្ចាប័នដោយព្រឹទ្ធសភាសហរដ្ឋអាមេរិក ហើយមានកាតព្វកិច្ចស្របច្បាប់។

ប៉ុន្តែលោក Samuel Charap ប្រធានកិត្តិយសនៃគោលនយោបាយរុស្ស៊ី និងអឺរ៉ាស៊ីនៅ RAND និងលោកស្រី Jennifer Kavanagh សមាជិកជាន់ខ្ពស់ និងជានាយកផ្នែកវិភាគយោធានៅ Defense Priorities ដែលមានមូលដ្ឋាននៅទីក្រុងវ៉ាស៊ីនតោន បានព្រមានថា ផែនការថ្មីនេះសន្យាច្រើនពេក ខណៈពេលដែលការអនុវត្តជាក់ស្តែងរបស់វាទាបពេក។

អ៊ុយក្រែនពិតជារំភើបចំពោះសំណើធានាសន្តិសុខថ្មី។ ប៉ុន្តែ យោងតាមមន្ត្រីជាន់ខ្ពស់អាមេរិកម្នាក់ ការប្តេជ្ញាចិត្តនោះភ្ជាប់មកជាមួយហានិភ័យធ្ងន់ធ្ងរ និងមិនសូវត្រូវបានគេឲ្យតម្លៃ មិនត្រឹមតែសម្រាប់ទីក្រុងកៀវ និងវ៉ាស៊ីនតោនប៉ុណ្ណោះទេ ប៉ុន្តែក៏សម្រាប់សម្ព័ន្ធមិត្តអាមេរិកនៅអឺរ៉ុបផងដែរ។ ដោយដាក់សំណួរថា តើរុស្ស៊ីនឹងទទួលយកការធានាសន្តិសុខបែបនេះដែរឬទេ មានបញ្ហាប្រឈមធំៗចំនួនបីសម្រាប់អាមេរិកក្នុងការធ្វើការប្តេជ្ញាចិត្តដ៏ទូលំទូលាយបែបនេះ។

ទីមួយ ប្រសិនបើការបញ្ជូនកងទ័ពទៅកាន់អ៊ុយក្រែនគឺចាំបាច់ដើម្បីការពារផលប្រយោជន៍ស្នូលរបស់អាមេរិក ទីក្រុងវ៉ាស៊ីនតោនបានធ្វើដូច្នេះជាយូរមកហើយ បន្ទាប់ពីជម្លោះបានផ្ទុះឡើងរវាងកងទ័ពរដ្ឋាភិបាលអ៊ុយក្រែន និងក្រុមបំបែកខ្លួននៅភាគខាងកើតក្នុងឆ្នាំ ២០១៤។

ប៉ុន្តែប្រធានាធិបតីអាមេរិកបានបដិសេធមិនបញ្ជូនកងទ័ពទៅកាន់អ៊ុយក្រែន ដែលជាសញ្ញាច្បាស់លាស់មួយដែលពួកគេជឿថាអត្ថប្រយោជន៍គឺទាបពេកបើប្រៀបធៀបទៅនឹងការចំណាយ និងហានិភ័យដែលកើតឡើងជាមួយនឹងការធ្វើឲ្យអាមេរិកមានជម្លោះជាមួយរុស្ស៊ី ដែលមានឃ្លាំងអាវុធនុយក្លេអ៊ែរធំជាងគេបំផុតរបស់ពិភពលោក។

ទីពីរ ប្រសិនបើអាមេរិកធ្វើការប្តេជ្ញាចិត្តការពារជាតិបែបណាតូចំពោះអ៊ុយក្រែនដោយមិនធ្វើដូច្នេះទេ វានឹងបង្កើនសំណួរអំពីភាពជឿជាក់នៃការធានាស្រដៀងគ្នាទាំងអស់ពីវ៉ាស៊ីនតោន ដែលធ្វើឲ្យប៉ះពាល់ដល់សន្តិសុខ និងទំនុកចិត្តរបស់សម្ព័ន្ធមិត្តសំខាន់ៗនៅអឺរ៉ុប និងអាស៊ី។

ហេតុផលទីបី ប្រហែលជាសំខាន់បំផុតដែលវ៉ាស៊ីនតោន មិនគួរធ្វើការប្តេជ្ញាចិត្តសន្តិសុខបែបណាតូចំពោះទីក្រុងកៀវគឺជាការពិតស្នូលនៃកាតព្វកិច្ចនេះ៖ «ការត្រៀមខ្លួនដើម្បីធ្វើសង្គ្រាមជាមួយរុស្ស៊ីសម្រាប់អ៊ុយក្រែន»។

មិនមានការប្តេជ្ញាចិត្តសន្តិសុខណាមួយដែលតម្រូវឲ្យអាមេរិកដាក់ពង្រាយកងទ័ពនោះទេ ប៉ុន្តែប្រសិនបើការប្តេជ្ញាចិត្តចំពោះអ៊ុយក្រែនបរាជ័យ នោះវ៉ាស៊ីនតោននឹងប្រឈមមុខនឹងសម្ពាធនយោបាយយ៉ាងខ្លាំង ដើម្បីបំពេញតាមការសន្យារបស់ខ្លួន ដោយការបញ្ជូនកងទ័ពអាមេរិកទៅកាន់ជួរមុខ។ នៅពេលនេះ អាមេរិកនឹងធ្លាក់ចូលទៅក្នុងជម្លោះដោយផ្ទាល់ជាមួយរុស្ស៊ី ដែលជាសេណារីយ៉ូដ៏គ្រោះថ្នាក់មួយ ដែលភ្ជាប់មកជាមួយហានិភ័យនៃការកើនឡើងនៃអាវុធនុយក្លេអ៊ែរ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ចិន បង្ហោះទិដ្ឋភាពទីក្រុងតៃប៉ិ ក្នុងន័យបញ្ចាក់ថា តៃវ៉ាន់ជាទឹកដីរបស់ខ្លួន