តើ EU នឹងប្រឈមបញ្ហាធំបែបណា បើកាត់បន្ថយការពឹងផ្អែកលើសន្តិសុខអាមេរិក

អគ្គលេខាធិការណាតូ លោក Mark Rutte បានបញ្ចាក់ឲ្យដឹងនៅក្នុងខែមករានេះថា សហភាពអឺរ៉ុប (EU) នឹងត្រូវជួបបញ្ហាប្រឈមមួយ នោះគឺបង្កើនការចំណាយយោធាដល់ ១០% នៃផលិតផលក្នុងស្រុកសរុប ហើយចាក់ប្រាក់រាប់ពាន់លានអឺរ៉ូទៅក្នុងសមត្ថភាពនុយក្លេអ៊ែរ ប្រសិនបើខ្លួនចង់កាត់បន្ថយការពឹងផ្អែកសន្តិសុខលើសហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការវាយតម្លៃរបស់លោក Rutte ត្រូវបានធ្វើឡើងនៅក្នុងបរិបទដែលមន្ត្រីសហភាពអឺរ៉ុបមួយចំនួន បន្តអំពាវនាវឲ្យប្លុកនេះកាត់បន្ថយការពឹងផ្អែកលើសហរដ្ឋអាមេរិកសម្រាប់សន្តិសុខ នៅពេលដែលស្នងការការពារជាតិ លោក Andrius Kubilius ថា សហភាពអឺរ៉ុបត្រូវការកងកម្លាំងឈរជើងចំនួន ១០០,០០០ នាក់ ដើម្បីអាចធ្វើសកម្មភាពដោយឯករាជ្យ។

ថ្លែងនៅចំពោះមុខសភាអឺរ៉ុប អគ្គលេខាធិការណាតូបានព្រមានថា អ្នកដែលចង់ទៅតែម្នាក់ឯងគួរតែភ្លេចគំនិតដែលថា វាអាចធ្វើទៅបានដើម្បីសម្រេចបាននូវកម្រិតចំណាយនោះជាមួយនឹងកម្រិតចំណាយ ៥% នៃផលិតផលក្នុងស្រុកសរុបសម្រាប់ការពារជាតិ។ ផែនការបែបនេះគឺមិនប្រាកដនិយមទេ! ប្រសិនបើនរណាម្នាក់នៅកន្លែងនេះគិតថា សហភាពអឺរ៉ុប ឬអឺរ៉ុបជាទូទៅអាចការពារខ្លួនឯងដោយគ្មានសហរដ្ឋអាមេរិក នោះគ្រាន់តែបន្តសុបិនពួកគេ ដែលមិនអាចទៅរួចសូម្បីតែបន្តិចណាឡើយ។

អគ្គលេខាធិការណាតូបានកត់សម្គាល់បន្ថែម សហភាពអឺរ៉ុបមិនត្រឹមតែត្រូវការយ៉ាងហោចណាស់ពីរដងនៃចំនួននេះប៉ុណ្ណោះទេ ប៉ុន្តែថែមទាំងត្រូវវិនិយោគលើសមត្ថភាពនុយក្លេអ៊ែររបស់ខ្លួនផងដែរ ដែលប្រើប្រាស់ប្រាក់រាប់ពាន់លានដុល្លារ និងរាប់ពាន់លានអឺរ៉ូ ក្នុងករណីជម្រើសនៅម្នាក់ឯងវានឹងខាតបង់។

ណាតូបានយល់ព្រមលើកម្រិតចំណាយការពារជាតិ ៥% នៃផលិតផលក្នុងស្រុកសរុបនៅឯកិច្ចប្រជុំកំពូលមួយនៅទីក្រុងឡាអេកាលពីឆ្នាំមុន។ សំណើនេះត្រូវបានធ្វើឡើងដំបូងដោយប្រធានាធិបតីអាមេរិក ដូណាល់ ត្រាំ ហើយចាប់តាំងពីពេលនោះមក បានទទួលការសរសើរជាច្រើនពីលោក Rutte។

នៅក្នុងសុន្ទរកថាកាលពីនៅថ្ងៃទី២៥ ខែមករា លោក Rutte ក៏បានលើកសរសើរត្រាំ ម្តងទៀតចំពោះការបង្ខំប្រទេសដូចជា អេស្ប៉ាញ អ៊ីតាលី បែលហ្ស៊ិក និងកាណាដា ឲ្យបំពេញការប្តេជ្ញាចិត្តចំណាយ២% នៃផលិតផលក្នុងស្រុកសរុបបច្ចុប្បន្នរបស់ពួកគេ ក៏ដូចជាការយល់ព្រមចំពោះកម្រិតថ្មី។

ទោះជាយ៉ាងណាក៏ដោយ ទស្សនៈខាងលើរបស់សហភាពអឺរ៉ុបបានកើតចេញពីការប្រកាសម្តងហើយម្តងទៀតរបស់ទីក្រុងវ៉ាស៊ីនតោនថា ខ្លួននឹងបង្រួមការប្តេជ្ញាចិត្តចំពោះសម្ព័ន្ធមិត្តអឺរ៉ុប ខណៈអំពាវនាវឲ្យពួកគេទទួលខុសត្រូវបន្ថែមទៀតចំពោះសន្តិសុខផ្ទាល់ខ្លួន។ កាលពីសប្តាហ៍មុន មន្ទីរបញ្ចកោណអះអាងទៀតថា ខ្លួននឹងផ្តល់អាទិភាពដល់ការការពារទឹកដីអាមេរិក និងរារាំងប្រទេសចិន។

មិនត្រឹមតែប៉ុណ្ណោះ សហភាពអឺរ៉ុបក៏ត្រូវបានដកចេញពីកិច្ចចរចាសន្តិភាពលើអ៊ុយក្រែន ដែលសម្របសម្រួលដោយអាមេរិក ហើយភាពតានតឹងបានកើតឡើងកាន់ខ្លាំងជាមួយវ៉ាស៊ីនតោន ទាក់ទងនឹងការផ្សព្វផ្សាយផែនការលោកត្រាំដើម្បីដណ្តើមយកការគ្រប់គ្រងលើកោះ Greenland ដោយហេតុនេះធ្វើឲ្យអារម្មណ៍នៃការធ្លាក់ចុះតួនាទីរបស់អឺរ៉ុបកាន់តែធ្ងន់ធ្ងរឡើង៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

អឺរ៉ុប ត្រូវខ្លាំងវិស័យការពារជាតិ ខណៈត្រាំធ្វើឲ្យទំនាក់ទំនងកាន់តែរង្គោះរង្គើ