បាងកក ជាប់លេខ១៤លើលោក ជាទីក្រុង មានការបំពុលខ្យល់ខ្លាំងបំផុត

អស់រយៈពេលរាប់សប្តាហ៍មកហើយ ប្រទេសថៃត្រូវគ្របដណ្តប់ដោយខ្យល់ពុលកម្រិតប៉ះពាល់ធ្ងន់ធ្ងរដល់សុខភាព ដល់ថ្នាក់ឥឡូវនេះ រាជធានីបាងកក បានជាប់ចំណាក់ថ្នាក់លេខ១៤ ក្នុងចំណោមទីក្រុងដែលរងការបំពុលខ្លាំងបំផុតនៅលើពិភពលោក។

យោងតាមក្រុមហ៊ុនបច្ចេកវិទ្យាសុខភាពខ្យល់របស់ប្រទេសស្វីស IQAir បានបង្ហាញនៅថ្ងៃសុក្រទី៣០ខែមករាឆ្នាំ២០២៦ថា បាងកក ឈរនៅលំដាប់ទី១៤ ក្នុងតារាង ដោយមានសន្ទស្សន៍គុណភាពខ្យល់ (AQI) ក្នុងកម្រិត១៥៤ ដែលជាកម្រិតគ្រោះថ្នាក់ពណ៌ក្រហម ប៉ះពាល់ខ្លាំងដល់សុខភាព។

ក្នុងតារាងនោះ ទីក្រុងដែលមានការបំពុលខ្យល់ខ្លាំងបំផុតលើពិភពលោក ដាកា នៃប្រទេសបង់ក្លាដែស ដែល AQI ឈានដល់ ២០៤ ជាកម្រិតពណ៌ស្វាយ ដែលមិនល្អខ្លាំង ប៉ះពាល់ធ្ងន់ធ្ងរ ចៀសវាងការចេញក្រៅផ្ទះ។

លេខ២គឺ ទីក្រុងកូវ៉ែត នៃប្រទេសកូវ៉ែត​ ដែល AQI មានកម្រិត១៩៦, លេខ៣ ដែលី ប្រទេសឥណ្ឌា ​(១៩៥), លេខ៤ ឡាហ័រ ប្រទេសប៉ាគីស្ថាន (១៩៤) និងលេខ៥ ទីក្រុង គែរ ប្រទេសអេហ្ស៊ីប (១៩២)។

អ្វីដែលគួរឲ្យកត់សម្គាល់គឺថា ក្នុងតារាងទីក្រុងទាំង២០នេះ គឺមានទីក្រុងនៅអាស៊ីអាគ្នេយ៍ត្រឹមតែ២ប៉ុណ្ណោះ ពោលគឺក្រៅពីបាងកក គឺមាន ហាណូយនៃប្រទេសវៀតណាម ដែល AQI មានកម្រិត១៦២។ ទោះបីជាយ៉ាងណាក៏ដោយ ក្នុងនោះ មិនមានរាជធានីភ្នំពេញនៃ ប្រទេសកម្ពុជានោះទេ៕

អត្ថបទ៖ សុខ សុវណ្ណ