អារ៉ាប់រួម គ្រោងបង្កកទ្រព្យសម្បត្តិ​​រាប់ពាន់លាន​របស់អ៊ីរ៉ង់​

យោងតាមកាសែត Wall Street Journal (WSJ) បានរាយការណ៍កាលពីថ្ងៃព្រហស្បតិ៍ទី៥មីនាថា អារ៉ាប់រួម (UAE) កំពុងថ្លឹងថ្លែងពីការបង្កកទ្រព្យសម្បត្តិអ៊ីរ៉ង់រាប់ពាន់លានដុល្លារនៅអារ៉ាប់រួម​ ដែលជា​ការសម្រេច​មួយអាចរារាំងការចូល​ប្រើប្រាស់រូបិយប័ណ្ណបរទេស និងពាណិជ្ជកម្មសកលរបស់ទីក្រុងតេហេរ៉ង់ ក្នុងអំឡុងពេលជម្លោះយោធារវាងសហរដ្ឋអាមេរិក និងអ៊ីស្រាអែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍ បានបន្ថែមថា ប្រសិនបើការសម្រេចចិត្ត​នេះត្រូវបានអនុវត្ត ការចូលទៅកាន់ប្រភពរូបិយប័ណ្ណបរទេសដ៏រឹងមាំ និងបណ្តាញពាណិជ្ជកម្មសកលរបស់សាធារណរដ្ឋអ៊ីស្លាមអ៊ីរ៉ង់​នឹងត្រូវបានដាក់កម្រិតយ៉ាងខ្លាំង។

ប្រភព WSJ បានលើកឡើងថា មន្ត្រីអារ៉ាប់រួមបានជូនដំណឹងដោយសម្ងាត់ដល់អ៊ីរ៉ង់ អំពីលទ្ធភាពនៃការអនុវត្តវិធានការទាំងនេះ។ នេះត្រូវបានមើលឃើញថាជាការព្រមានដែលមាន​ទម្ងន់​បំផុត​នៅក្នុងបរិបទនៃជម្លោះដែលកំពុងកើនឡើងរវាងសហរដ្ឋអាមេរិក អ៊ីស្រាអែល និងអ៊ីរ៉ង់នៅមជ្ឈិមបូព៌ា។

អារ៉ាប់រួមជាយូរមកហើយគឺជា «ច្រកទ្វារហិរញ្ញវត្ថុ» និងពាណិជ្ជកម្មដ៏សំខាន់បំផុតរបស់អ៊ីរ៉ង់នៅក្នុងតំបន់ ដូច្នេះការបង្កកទ្រព្យសម្បត្តិពីទីក្រុងអាប៊ូដាប៊ី នឹងក្លាយជាការវាយប្រហារយ៉ាងធ្ងន់ធ្ងរដល់សេដ្ឋកិច្ចដែលហត់នឿយរួចទៅហើយរបស់ទីក្រុងតេអេរ៉ង់។

អ្នកវិភាគជឿថា ប្រសិនបើទ្រព្យសម្បត្តិរបស់អ៊ីរ៉ង់នៅក្នុងមជ្ឈមណ្ឌលហិរញ្ញវត្ថុដូចជាទីក្រុងឌូបៃត្រូវបានបង្កក សកម្មភាពនាំចូល និងនាំចេញ និងប្រតិបត្តិការប្តូរប្រាក់បរទេសរបស់ទីក្រុងតេហេរ៉ង់នឹងស្ទើរតែជាប់គាំង។ នេះនឹងមិនត្រឹមតែជំរុញអតិផរណានៅក្នុងប្រទេសអ៊ីរ៉ង់ដល់កម្រិតដែលមិនអាចគ្រប់គ្រងបានប៉ុណ្ណោះទេ ប៉ុន្តែវាក៏ធ្វើឲ្យចុះខ្សោយសមត្ថភាពរបស់ខ្លួនក្នុងការផ្តល់ហិរញ្ញប្បទានដល់ប្រតិបត្តិការយោធាផងដែរ។

ទោះជាយ៉ាងណា បច្ចុប្បន្ននេះ រដ្ឋាភិបាលអ៊ីរ៉ង់មិនទាន់មានការឆ្លើយតបជាផ្លូវការចំពោះព័ត៌មានខាងលើនៅឡើយទេ ប៉ុន្តែទីផ្សារហិរញ្ញវត្ថុក្នុងតំបន់កំពុងតាមដានយ៉ាងដិតដល់នូវរាល់ចលនាពីទីក្រុងអាប៊ូដាប៊ី សម្រាប់ស្ថិរភាពសេដ្ឋកិច្ចនៃតំបន់ឈូងសមុទ្រទាំងមូល។ ប្រសិនបើបទបញ្ជាបង្កកទ្រព្យសម្បត្តិចូលជាធរមានជាផ្លូវការ ផែនទីពាណិជ្ជកម្មមជ្ឈិមបូព៌ានឹងត្រូវគូរឡើងវិញ ហើយអ៊ីរ៉ង់នឹងធ្លាក់ចូលទៅក្នុងភាពឯកោផ្នែកហិរញ្ញវត្ថុដែលមិនធ្លាប់មានពីមុនមកក្នុងប្រវត្តិសាស្ត្រសម័យទំនើប៕

អត្ថបទ៖ សាង ស្រីល័ក្ខ