ឥណ្ឌូណេស៊ី សម្រេចកិច្ចព្រមព្រៀងទិញប្រព័ន្ធមីស៊ីល BrahMos ពីប្រទេសឥណ្ឌា

ប្រទេសឥណ្ឌូណេស៊ីបានឈានដល់កិច្ចព្រមព្រៀង​ផ្លូវការជាមួយប្រទេសឥណ្ឌា ដើម្បីទិញប្រព័ន្ធមីស៊ីល BrahMos យកទៅ​ប្រើប្រាស់ នេះបើយោងតាមការបញ្ជាក់របស់អ្នកនាំពាក្យក្រសួងការពារជាតិលោក Rico Ricardo Sirait កាលពីថ្ងៃទី៩ ខែមីនា ឆ្នាំ​២០២៦ ដែល​ចេញ​​ផ្សាយ​ដោយ​ទីភ្នាក់ងារ​ព័ត៌មាន​រ៉យទ័រ។

ទោះបីជាតម្លៃសរុបនៃកិច្ចព្រមព្រៀងនេះមិនទាន់ត្រូវបានបង្ហាញជាសាធារណៈក៏ដោយ ក៏​ក្រុមហ៊ុន BrahMos ដែលជាក្រុមហ៊ុនវិនិយោគរួមគ្នារវាងរដ្ឋាភិបាលឥណ្ឌា និងរុស្ស៊ី ធ្លាប់បានបង្ហើបថា ការពិភាក្សាជាមួយទីក្រុងហ្សាការតា កន្លងមក គឺមានទំហំទឹកប្រាក់ចន្លោះពី ២០០លាន ទៅ ៣៥០លានដុល្លារ។

ការបញ្ជាទិញនេះ គឺជាជំហានយុទ្ធសាស្ត្រមួយក្នុងគោលបំណងធ្វើទំនើបកម្មគ្រឿងយុទ្ធោបករណ៍ និងពង្រឹងសមត្ថភាពការពារជាតិរបស់ឥណ្ឌូណេស៊ី ជាពិសេសនៅក្នុងវិស័យដែនសមុទ្រតែម្ដង។ កិច្ចព្រមព្រៀងនេះបានដើរតាមគន្លងរបស់ប្រទេសហ្វីលីពីន ដែលបានក្លាយជាអតិថិជនបរទេសដំបូងគេបង្អស់របស់ក្រុមហ៊ុននេះកាលពីឆ្នាំ២០២២។ រហូតមកដល់ពេលនេះ ទាំងក្រុមហ៊ុន BrahMos និងក្រសួងការពារជាតិឥណ្ឌា នៅមិនទាន់បានចេញសេចក្តីថ្លែងការណ៍លម្អិតបន្ថែមជុំវិញការបញ្ចប់កិច្ចព្រមព្រៀងជាស្ថាពរនេះនៅឡើយទេ៕

ប្រែសម្រួល៖ ឈាង