អាមេរិកបញ្ជូនទ័ព ៨០០០នាក់ជាបន្ទាន់ទៅកាន់មជ្ឈិមបូព៌ា

សហរដ្ឋអាមេរិកកំពុងតែពន្លឿនការបញ្ជូនកងកម្លាំងយោធាប្រមាណ ៨០០០នាក់ ទៅកាន់តំបន់មជ្ឈិមបូព៌ា ដើម្បីពង្រឹងប្រតិបត្តិការវាយលុកប្រឆាំងនឹងប្រទេសអ៊ីរ៉ង់ ដែលកំពុងតែមានភាពតានតឹងខ្លាំង។

តាមប្រភពព័ត៌មានពី Newsmax និង​ Anadolu ចុះ​ផ្សាយ​ថ្ងៃទី​២០​មីនា​២០២៦ ក្រុមនាវាចម្បាំង USS Boxer និងកងពលតូចម៉ារីនលេខ​១១ បានចាកចេញពីឆ្នេរសមុទ្រប៉ាស៊ីហ្វិកមុនកាលកំណត់។ សូម្បីតែមន្ត្រីជើងទឹក និងកងទ័ពម៉ារីន ក៏ត្រូវបានបញ្ជា​ឲ្យ​កាត់បន្ថយថ្ងៃឈប់សម្រាករបស់ពួកគេ ដើម្បីប្រញាប់ប្រញាល់ធ្វើដំណើរទៅកាន់សមរភូមិផងដែរ។ ការចល័តទ័ពយ៉ាងគំហុកនេះ បានកើតឡើងបន្ទាប់ពីប្រតិបត្តិការរួមគ្នារវាងអាមេរិក និងអ៊ីស្រាអែល កាលពីថ្ងៃទី២៨​កុម្ភៈ ដែលបានសម្លាប់មេដឹកនាំកំពូលអ៊ីរ៉ង់ លោក Ayatollah Ali Khamenei និងមនុស្សប្រហែល ១៣០០នាក់ផ្សេងទៀត។

យោងតាមផែនការ កងទ័ពប្រមាណ ៤០០០នាក់ នឹងធ្វើដំណើរតាមនាវាចម្បាំងធំៗចំនួន៣ គឺ USS Boxer, USS Portland និង USS Comstock។ នៅពេលដែលក្រុមនាវាទាំងនេះទៅជួបជុំគ្នាជាមួយក្រុមនាវា USS Tripoli ដែលកំពុងធ្វើដំណើរទៅស្រាប់នោះ ចំនួនកងទ័ពសរុបនឹងកើនឡើងដល់ ៨០០០នាក់ រួមជាមួយនាវាចម្បាំងវាយលុក៦គ្រឿង។ ទោះជាយ៉ាងណាក៏ដោយ មន្ទីរបញ្ចកោណមិនទាន់បានចេញសេចក្តីថ្លែងការណ៍ផ្លូវការណាមួយ លម្អិតពីចលនាទ័ពទាំងនេះនៅឡើយទេ។

ស្ថានភាពនៅតំបន់មជ្ឈិមបូព៌ាបច្ចុប្បន្នកំពុងស្ថិតក្នុងភាពវឹកវរ ខណៈដែលអ៊ីរ៉ង់បានចាប់ផ្តើមវាយបកវិញតាមរយៈការប្រើប្រាស់ដ្រូន និងមីស៊ីល បាញ់ស្រោចទៅលើប្រទេសអ៊ីស្រាអែល ហ្ស៊កដានី អ៊ីរ៉ាក់ និងបណ្តាប្រទេសនៅតំបន់ឈូងសមុទ្រជាច្រើនទៀត។ ការវាយបកនេះមិនត្រឹមតែសំដៅលើមូលដ្ឋានទ័ពអាមេរិក និងបង្កការខូចខាតដល់ហេដ្ឋារចនាសម្ព័ន្ធធ្ងន់ធ្ងរប៉ុណ្ណោះទេ ប៉ុន្តែថែមទាំងបានធ្វើ​ឲ្យ​ប៉ះពាល់ដល់ប្រព័ន្ធហោះហើរ និងទីផ្សារសកលលោកទាំងមូលទៀតផង។

រហូតមកដល់ពេលនេះ ភាគីទាំងសងខាងនៅតែបន្តបាញ់តបតគ្នាទៅវិញទៅមក ដែលធ្វើ​ឲ្យ​សភាពការណ៍កាន់តែមានភាពស្រពេចស្រពិល និងគ្រោះថ្នាក់បំផុត៕

ប្រែសម្រួល៖ ឈាង