ព័ត៌មានអន្ដរជាតិ

ប្រឈមវិបត្តិប្រេង ប្រទេស២២ រួមទាំងសមាជិកណាតូខ្លះផង ទទូចឲ្យអ៊ីរ៉ង់បើកច្រក Hormuz

បានផុស

៣ ខែ មុន

នៅ

ថ្ងៃអាទិត្យ ២២ មីនា ២០២៦

ដោយ

ចាប់តាំងពីសង្រ្គាមនៅអ៊ីរ៉ង់ចាប់ផ្តើមកាលបីថ្ងៃទី២៨ ខែកុម្ភៈ ដោយការវាយប្រហាររបស់សហរដ្ឋអាមេរិកនិងអ៊ីស្រាអែល មានប្រទេសនៅអឺរ៉ុប រួមទាំងអាស៊ីប្រឈមនឹងការខ្វះខាតប្រេងធ្ងន់ធ្ងរដោយសារតែអ៊ីរ៉ងបានបិទច្រកសមុទ្រ Hormuz ដែលជាច្រកសម្រាប់ដឹកជញ្ជូនប្រេងយ៉ាងសំខាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រឈមវិបត្តិថាមពលនេះ ប្រទេសចំនួន ២២ បានចុះហត្ថលេខាលើសេចក្តីថ្លែងការណ៍រួមមួយ ដោយថ្កោលទោសការវាយប្រហាររបស់អ៊ីរ៉ង់លើនាវាដឹកជញ្ជូនទំនិញក្នុងឈូងសមុទ្រមួយនេះ ហើយបណ្តាប្រទេសទាំងនោះលើកឡើងថា ពួកគេនឹងចូលរួមរកវិធីសាស្រ្តសមស្រប ដើម្បីធានាឲ្យបាននូវការធ្វើនាវាចរណ៍ប្រកបដោយសុវត្ថិភាពតាមរយៈច្រកសមុទ្រ Hormuz ។

សេចក្តីថ្លែងការណ៍រួមនោះបានលើកឡើងថា៖ «យើងស្វាគមន៍ចំពោះការប្តេជ្ញាចិត្តរបស់ប្រទេសនានា ដែលកំពុងចូលរួមក្នុងការរៀបចំផែនការនេះ»។ នេះបើយោងតាមការដកស្រង់របស់ ABC ផ្សាយថ្ងៃទី២១ខែមីនា ឆ្នាំ២០២៦ ។

មិនតែប៉ុណ្ណោះ បញ្ជីឈ្មោះប្រទេសដែលចូលរួមកំពុងកើនឡើងរួមមានសមាជិកណាតូផងដែរ បន្ទាប់ពីប្រធានាធិបតី ដូណាល់ ត្រាំ បានរិះគន់ថា សមាជិកណាតូថា «កំសាក» កាលពីថ្ងៃសុក្រ។

ប្រធានាធិបតីអាមេរិករូបនេះថា៖ « ពួកគេត្អូញត្អែរពីតម្លៃប្រេងខ្ពស់ ប៉ុន្តែមិនចង់ជួយបើកច្រកសមុទ្រ Hormuz ទេ»។

ប្រទេសទាំងនោះរួមមាន អារ៉ាប់រួម ចក្រភពអង់គ្លេស បារាំង អាល្លឺម៉ង់ អ៊ីតាលី ហូឡង់ ជប៉ុន កាណាដា សាធារណរដ្ឋកូរ៉េ នូវែលសេឡង់ ដាណឺម៉ាក ឡាតវី ស្លូវេនី អេស្តូនី ន័រវែស ស៊ុយអែត ហ្វាំងឡង់ ឆែក រ៉ូម៉ានី បារ៉ែន លីទុយអានី និងអូស្ត្រាលី។

គួរបញ្ជាក់ថា សេចក្តីថ្លែងការណ៍ខាងលើមិនបានគូសបញ្ជាក់ពីការប្តេជ្ញាចិត្តជាក់លាក់ណាមួយ ដើម្បីធានាសុវត្ថិភាពផ្លូវទឹកនោះទេ។

យ៉ាងណា រដ្ឋមន្ត្រីក្រសួងការពារជាតិអ៊ីតាលី លោក Guido Crosetto បានសរសេរលើបណ្តាញសង្គម X បន្ទាប់ពីសេចក្តីថ្លែងការណ៍ថា៖ « គ្មានបេសកកម្មសង្គ្រាមទេ ហើយក៏មិនមានការចូលទៅក្នុងច្រកសមុទ្រ Hormuz ដរាបណាមិនទាន់មានបទឈប់បាញ់ និងគំនិតផ្តួចផ្តើមពីពហុភាគី»៕

ប្រែសម្រួល៖ ណឺ មិនា