អង់គ្លេស ប្រកាសបញ្ជូនទ័ពថែមទៀតទៅមជ្ឈិមបូព៌ា 

ចក្រភពអង់គ្លេស បានប្រកាសពីការបញ្ជូនទ័ពបន្ថែមទៀតទៅកាន់តំបន់មជ្ឈិមបូព៌ា ដើម្បីជួយសម្ព័ន្ធមិត្ត ទប់ទល់នឹងការវាយប្រហាររបស់អ៊ីរ៉ង់។

សេចក្តីប្រកាសនេះ ត្រូវបានធ្វើឡើងដោយរដ្ឋមន្ត្រីក្រសួងការពារជាតិអង់គ្លេស John Healey អំឡុងដំណើរទស្សនកិច្ចទៅកាន់តំបន់ឈូងសមុទ្រ កាលពីថ្ងៃអង្គារទី៣១ខែមីនាឆ្នាំ២០២៦។ 

តាមការផ្សាយរបស់ Sky News, ក្នុងដំណើរនោះ លោក Healey បានបញ្ជាក់យ៉ាងច្បាស់ថា ក្រុមការងារ និងប្រព័ន្ធការពារអាកាសបន្ថែមបានទៅដល់ប្រទេសបារ៉ែននិងគុយវ៉ែតហើយ ព្រមទាំងបញ្ជាក់ពីផែនការដាក់ពង្រាយប្រព័ន្ធមីស៊ីលការពារអាកាស Sky Sabre នៅក្នុងប្រទេសអារ៉ាប៊ីសាអូឌីត និងការពង្រីកប្រតិបត្តិការរបស់យន្តហោះចម្បាំង Typhoon នៅក្នុងប្រទេសកាតាផងដែរ។

លោក Healey និយាយថា៖ «ការវាយប្រហារដ៏កាចសាហាវរបស់អ៊ីរ៉ង់ នៅតែបន្តគំរាមកំហែងដល់សម្ព័ន្ធមិត្ត និងផលប្រយោជន៍របស់យើងនៅក្នុងតំបន់មជ្ឈិមបូព៌ា ដែលចាំបាច់បំផុតត្រូវតែការពារ»។

យ៉ាងណា លោកមិនបញ្ជាក់ឡើយថាតើកងទ័ពអង់គ្លេសប៉ុន្មាននាក់ទៀត ដែលនឹងត្រូវបញ្ជូនទៅ ប៉ុន្តែបច្ចុប្បន្នអង់គ្លេសមានកងទ័ពប្រហែល ១ ០០០នាក់រួចហើយ កំពុងឈរជើងក្នុងតំបន់ រួមទាំងនៅប្រទេសស៊ីបផងដែរ។

សេចក្តីប្រកាសនេះធ្វើឡើង បន្ទាប់ពីលោកនាយករដ្ឋមន្ត្រី Keir Starmer បញ្ជាក់ថា ទោះទ័ពអង់គ្លេសនឹងមិនចូលរួមក្នុងសង្គ្រាមដោយផ្ទាល់នៅលើដីក៏ដោយ ប៉ុន្តែការគាំទ្រតាមផ្លូវអាកាស និងប្រព័ន្ធការពារមីស៊ីលកំពុងស្ថិតក្នុងកម្រិតអាសន្នខ្ពស់បំផុត៕

អត្ថបទ៖ សុខ សុវណ្ណ