ព័ត៌មានអន្ដរជាតិ

អ៊ីស្រាអែល រង់ចាំការអនុញ្ញាតពីអាមេរិក និងវាយអ៊ីរ៉ង់ឱ្យត្រឡប់ទៅយុគថ្ម ដូចត្រាំ ធ្លាប់លើកឡើង

បានផុស

២ ខែ មុន

នៅ

ថ្ងៃសុក្រ ២៤ មេសា ២០២៦

ដោយ

ក្រោយបទឈប់បាញ់សហរដ្ឋអាមេរិក-អ៊ីរ៉ង់នៅតែមានភាពផុយស្រួយ រដ្ឋមន្ត្រីក្រសួងការពារជាតិអ៊ីស្រាអែល លោក Israel Katz លើកឡើងកាលពីថ្ងៃទី២៣ ខែមេសា ថា អ៊ីស្រាអែលត្រៀមខ្លួនរួចជាស្រេច ក្នុងការបន្តសង្គ្រាមប្រឆាំងនឹងអ៊ីរ៉ង់ ខណៈអ៊ីស្រាអែលកំពុងរង់ចាំភ្លើងខៀវពីសហរដ្ឋអាមេរិក ដើម្បីកម្ទេចអ៊ីរ៉ង់ឲ្យរលំរលាយត្រឡប់ទៅយុគសម័យថ្មវិញ ដូចដែល លោក ត្រាំ ធ្លាប់លើកឡើងនៅមុនបទឈប់បាញ់ផ្តើមកាលថ្ងៃទី៧ខែមេសា។

យោងទីភ្នាក់ងារព័ត៌មាន AFP លោក Katz និយាយនៅក្នុងសេចក្តីថ្លែងការណ៍ជាវីដេអូមួយថា៖ « កងកម្លាំងរបស់អ៊ីស្រាអែល IDF បានត្រៀមខ្លួនរួចជាស្រេចទាំងការពារនិងវាយលុក ហើយគោលដៅបានដៅរួចហើយ»។

រដ្ឋមន្ត្រីក្រសួងការពារជាតិអ៊ីស្រាអែល លោក Israel Katz ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្ថែមថា៖ « យើងកំពុងរង់ចាំភ្លើងខៀវពីសហរដ្ឋអាមេរិក! ជាដំបូង និងសំខាន់បំផុត គឺបញ្ចប់ខ្សែរាជវង្ស លោក ខាមេណៃ… លើសពីនេះទៀត ដើម្បីនាំអ៊ីរ៉ង់ត្រឡប់ទៅសម័យងងឹត និងយុគសម័យថ្មវិញ ដោយការបំផ្លាញរោងចក្រថាមពល អគ្គិសនីសំខាន់ៗ និងរុះរើហេដ្ឋារចនាសម្ព័ន្ធសេដ្ឋកិច្ចជាតិរបស់ពួកគេ»។

គួរបញ្ជាក់ថា ការវាយប្រហារលើកដំបូងរវាងសហរដ្ឋអាមេរិក និងអ៊ីស្រាអែលលើអ៊ីរ៉ង់ នៅថ្ងៃទី២៨ ខែកុម្ភៈ បានបំផ្លាញហេដ្ឋារចនាសម្ព័ន្ធអ៊ីរ៉ង់ជាច្រើន និងសម្លាប់មេដឹកនាំកំពូលអ៊ីរ៉ង់ លោក អាយ៉ាតូឡាស់ អាលី ខាមេណៃ (Ayatollah Ali Khamenei) ផងដែរ ខណៈបច្ចុប្បន្នកូនប្រុសរបស់ខ្លួន គឺ លោក Mojtaba Khamenei ឡើងស្នងតំណែងបន្ត ប៉ុន្តែមកទល់ពេលនេះ មិនទាន់បង្ហាញខ្លួនជាសាធារណៈនៅឡើយទេ។ ការណ៍នេះ នាំឱ្យមានការសង្ស័យពីស្ថានភាពរបស់អ្នកស្នងតំណែងរូបនោះ ថានៅរស់ឬអត់។

មិនតែប៉ុណ្ណោះ លោក Katz បន្ថែមថា៖ « លើកនេះ! ពេលមានការវាយប្រហារបន្ត វានឹងខុសគ្នាពីមុន និងសាហាវ ហើយវាជាការវាយប្រហារដ៏សាហាវនៅចំណុចរសើបបំផុត បន្ទាប់ពីការវាយប្រហារដ៏ធំសម្បើម របបភេរវកម្មអ៊ីរ៉ង់បានរងទុក្ខរួចទៅហើយ ហើយវានឹងរង្គោះរង្គើ និងបំផ្លាញគ្រឹះរបស់ពួកគេ»។

ដោយឡែក ប្រធានាធិបតីអាមេរិក លោក ដូណាល់ ត្រាំ បញ្ជាក់កាលពីថ្ងៃទី២១ ខែមេសា ពីការបន្តបទឈប់បាញ់ដោយគ្មានពេលកំណត់រវាងសហរដ្ឋអាមេរិកនិងអ៊ីរ៉ង់ ចូលជាធរមាននៅថ្ងៃទី៨ ខែមេសា ដើម្បីបង្កើតទីសុវត្ថិភាពមួយសម្រាប់ចរចាជាមួយទីក្រុងតេហេរ៉ង់៕

ប្រែសម្រួល៖ ណឺ មិនា