ត្រាំ ត្រៀមស្ដាប់ផែនការថ្មី ដើម្បី​វាយអ៊ីរ៉ង់ បញ្ចប់ភាពទាល់ច្រកនៃសង្រ្គាម

ស្ថានការណ៍សង្រ្គាមរវាងសហរដ្ឋអាមេរិក និងអ៊ីរ៉ង់ កំពុងឈានចូលដល់ដំណាក់កាលដ៏ស្រួចស្រាវជាថ្មី បន្ទាប់ពីមានសេចក្ដីរាយការណ៍ថា ប្រធានាធិបតី ដូណាល់ ត្រាំ នឹងទទួលយកការធ្វើបទបង្ហាញពីផែនការយោធាថ្មីៗ នៅថ្ងៃព្រហស្បតិ៍នេះ។

យោងតាមរបាយការណ៍​ពី Axios ចុះផ្សាយ​ថ្ងៃទី​៣០ ខែមេសា ឆ្នាំ២០២៦ មេបញ្ជាការកងទ័ពអាមេរិកប្រចាំតំបន់មជ្ឈិមបូព៌ា លោក Brad Cooper នឹងក្លាយជាអ្នកនាំយកជម្រើសវាយប្រហារផ្សេងៗ ទៅដាក់លើតុរបស់លោក ត្រាំ ដែលនេះជាសញ្ញាបង្ហាញថា វ៉ាស៊ីនតោនកំពុងពិចារណាយ៉ាងម៉ត់ចត់ ក្នុងការបើកប្រតិបត្តិការយោធាទ្រង់ទ្រាយធំឡើងវិញ ដើម្បីបំបែកភាពទាល់ច្រកក្នុងការចរចា ឬក៏ដើម្បីផ្ដាច់ព្រ័ត្រសង្រ្គាមនេះតែម្ដង។

នៅពីក្រោយឆាកនៃផែនការនេះ កងទ័ពអាមេរិក បានត្រៀមយុទ្ធសាស្ត្រវាយប្រហារបែប «ខ្លីតែខ្លាំង» ដោយគ្រោងនឹងទម្លាក់គ្រាប់បែកលើគោលដៅហេដ្ឋារចនាសម្ព័ន្ធសំខាន់ៗរបស់អ៊ីរ៉ង់។ គោលបំណងធំនៃយុទ្ធសាស្ត្រនេះ គឺដើម្បីបង្ខំឲ្យរដ្ឋាភិបាលទីក្រុងតេហេរ៉ង់ យល់ព្រមត្រឡប់មកតុចរចាវិញ ជាមួយនឹងជំហរទន់ភ្លន់ជាងមុន ជាពិសេសលើបញ្ហាអាវុធនុយក្លេអ៊ែរ។

ក្រៅពីការវាយប្រហារតាមអាកាស ក៏មានផែនការមួយទៀតដែលផ្ដោតលើការគ្រប់គ្រងផ្នែកខ្លះ នៃច្រកសមុទ្រហ័រមូស ដើម្បីបើកផ្លូវឲ្យនាវាដឹកជញ្ជូនទំនិញអាចធ្វើដំណើរបានឡើងវិញ ដែលជម្រើសនេះអាចនឹងត្រូវប្រើប្រាស់កងទ័ពជើងគោកផងដែរ។ បន្ថែមពីនេះ អាមេរិកក៏កំពុងគិតគូរពីប្រតិបត្តិការពិសេស ដើម្បីចូលទៅកាន់កាប់ និងគ្រប់គ្រងឃ្លាំងផ្ទុកសារធាតុអ៊ុយរ៉ាញ៉ូមរបស់អ៊ីរ៉ង់ កុំឲ្យមានការផលិតអាវុធគ្រោះថ្នាក់។

ទោះបីជាមានជម្រើសយោធាជាច្រើននៅក្នុងដៃក៏ដោយ លោក ត្រាំ ធ្លាប់បានបង្ហើបថា លោកហាក់មានទំនុកចិត្តលើការប្រើប្រាស់កងទ័ពជើងទឹក ដើម្បីបិទខ្ទប់សេដ្ឋកិច្ចអ៊ីរ៉ង់ ច្រើនជាងការទម្លាក់គ្រាប់បែក។ លោកយល់ថា ការបិទផ្លូវសមុទ្រគឺជាឧបករណ៍ដ៏មានឥទ្ធិពលបំផុត ក្នុងការដាក់សម្ពាធ ប៉ុន្តែលោកនឹងមិនរារែកឡើយក្នុងការប្រើកម្លាំងបាយ ប្រសិនបើអ៊ីរ៉ង់នៅតែរឹងរូសមិនព្រមចុះចាញ់។ ជាមួយគ្នានេះ ក្រុមអ្នករៀបចំផែនការយោធាអាមេរិក ក៏កំពុងប្រុងប្រយ័ត្នខ្ពស់ ចំពោះលទ្ធភាពដែលអ៊ីរ៉ង់អាចនឹងវាយបកសងសឹកលើកងទ័ពអាមេរិក ដែលឈរជើងក្នុងតំបន់នោះវិញដែរ។

រឿងដែលគួរឲ្យ​ចាប់អារម្មណ៍បំផុតនោះគឺ កាលពីចុងខែកុម្ភៈ កន្លងទៅ លោក Cooper ក៏ធ្លាប់បានធ្វើបទបង្ហាញស្រដៀងគ្នានេះជូនលោក ត្រាំ ផងដែរ ពោលគឺតែពីរថ្ងៃប៉ុណ្ណោះ មុនពេលអាមេរិក និងអ៊ីស្រាអែលបើកឆាកប្រយុទ្ធលើ​អ៊ីរ៉ង់។ ប្រភពជិតស្និទ្ធនឹងសេតវិមាន បានបង្ហើបថា ការពិភាក្សានៅថ្ងៃព្រហស្បតិ៍នេះ អាចនឹងក្លាយជាចំណុចរបត់ដ៏សំខាន់មួយទៀត ក្នុងការសម្រេចចិត្តរបស់លោក ត្រាំ ថាតើត្រូវបន្តបទឈប់បាញ់ ឬក៏ត្រូវបញ្ជាឲ្យ​កងទ័ពបើកការវាយលុកជាថ្មី៕

ប្រែសម្រួល៖ ឈាង