ព័ត៌មានអន្ដរជាតិ

រុស្ស៊ីវាយអ៊ុយក្រែនខ្លាំងបំផុតដោយដ្រូនជាង១ពាន់គ្រឿងត្រឹម២ថ្ងៃចុងក្រោយ បន្ទាប់ពីពូទីនថា សង្គ្រាមជិតចប់

បានផុស

២ ខែ មុន

នៅ

ថ្ងៃសុក្រ ១៥ ឧសភា ២០២៦

ដោយ

រុស្ស៊ីបានធ្វើការវាយប្រហារតាមអាកាសដ៏ធំបំផុតក្នុងរយៈពេលពីរថ្ងៃ ចាប់តាំងពីការចាប់ផ្តើមសង្គ្រាមនៅអ៊ុយក្រែន ដោយបានវាយប្រហាររដ្ឋធានីកៀវនិងទីក្រុងដទៃទៀតដោយដ្រូនជាង១ពាន់គ្រឿង ថែមទាំងមីស៊ីលជាច្រើនគ្រាប់។ នេះបើតាមមន្ត្រីអ៊ុយក្រែនលើកឡើងកាលពីថ្ងៃព្រហស្បតិ៍ និងចុះផ្សាយដោយភ្នាក់ងារសារព័ត៌មានរ៉យទ័រ នៅថ្ងៃទី១៥ ខែឧសភា ឆ្នាំ២០២៦ ។

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី និយាយថា រុស្ស៊ីបានបាញ់ដ្រូនចំនួន ១ ៥៦៧គ្រឿង ចាប់តាំងពីដើមថ្ងៃពុធ។

រុស្ស៊ីវាយអ៊ុយក្រែនដោយដ្រូននិងមីស៊ីល។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីអ៊ុយក្រែននិយាយថា ជនស៊ីវិលយ៉ាងហោចណាស់មាន ២៧នាក់ ត្រូវសម្លាប់ក្នុងរយៈពេលពីរថ្ងៃ។

ដោយឡែក ប្រធានាធិបតីរុស្ស៊ី លោក វ្ល៉ាឌីមៀ ពូទីន លើកឡើងកាលពីថ្ងៃសៅរ៍ថា៖ « សង្គ្រាមដែលសម្លាប់មនុស្សរាប់រយរាប់ពាន់នាក់ និងបានបំផ្លិចបំផ្លាញផ្នែកខ្លះនៃប្រទេសអ៊ុយក្រែនអស់រយៈពេលជាង៤ឆ្នាំ កំពុងតែឈានដល់ទីបញ្ចប់ហើយ»។

លោក ហ្សេលេនស្គី ថា មិនមានដំណឹងវិជ្ជមានអំពីការបញ្ចប់សង្គ្រាមនោះទេ ខណៈទីក្រុងមូស្គូបានប្រើប្រាស់ដ្រូនវាយប្រហារជាង ៦៧០គ្រឿង និងមីស៊ីល ៥៦គ្រាប់ពេញមួយយប់ កាលពីម្សិលមិញ(ទី១៤)។

លោកលើកឡើងថា៖ « ទាំងនេះមិនមែនជាសកម្មភាពដែលជឿថាសង្គ្រាមកំពុងឈានដល់ទីបញ្ចប់នោះទ។ វាជារឿងសំខាន់ដែលដៃគូ(អន្តរជាតិនិងសម្ព័ន្ធមិត្ត) មិនត្រូវនៅស្ងៀមលើការវាយប្រហារនេះទេ ហើយវាក៏សំខាន់ដូចគ្នា ក្នុងការបន្តគាំទ្រការការពារដែនអាកាសរបស់យើង»។

លោក ហ្សេលេនស្គីបន្តថា ទីក្រុងកៀវគឺជាគោលដៅសំខាន់នៃការវាយប្រហារពេញមួយយប់។

សេវាសង្គ្រោះបន្ទាន់រដ្ឋអ៊ុយក្រែនថា មនុស្សយ៉ាងហោចណាស់ ២១នាក់ រួមទាំងកុមារ ៣នាក់ ត្រូវបានសម្លាប់នៅក្នុងរដ្ឋធានី។

នៅក្នុងសេចក្តីថ្លែងការណ៍មួយចេញផ្សាយបន្ទាប់ពីម៉ោង ១២ អធ្រាត្រ សេវាសង្គ្រោះបន្ទាន់ថា ប្រតិបត្តិការជួយសង្គ្រោះកំពុងបន្តពេញមួយថ្ងៃ។

ជុំវិញបញ្ហានេះ ទីក្រុងមូស្គូមិនទាន់ធ្វើការអត្ថាធិប្បាយភ្លាមៗ លើការវាយប្រហារនៅថ្ងៃព្រហស្បតិ៍នោះទេ៕

សម្រួល៖ ណឺ មិនា