ព័ត៌មានអន្ដរជាតិ

សេតវិមាន៖ លោក ត្រាំ និងលោក ស៊ី ឯកភាពគ្នាលុបបំបាត់អាវុធនុយក្លេអ៊ែរ នៅកូរ៉េខាងជើង

បានផុស

២ ខែ មុន

នៅ

ថ្ងៃចន្ទ ១៨ ឧសភា ២០២៦

ដោយ

ទីភ្នាក់ងារសារព័ត៌មាន Yonhap របស់កូរ៉េខាងត្បូង បានផ្សាយថា សេតវិមាន បានប្រកាសនៅក្នុងការសង្ខេបព័ត៌មានមួយ ដែលបានចេញផ្សាយកាលពីថ្ងៃអាទិត្យ ទី១៧ ខែឧសភា ថា ប្រធានាធិបតីសហរដ្ឋអាមេរិក លោក ដូណាល់ ត្រាំ និងសមភាគីចិន លោក ស៊ី ជីនពីង បានបញ្ជាក់ជាថ្មី អំពីគោលដៅរួមគ្នា ដើម្បីលុបបំបាត់អាវុធនុយក្លេអ៊ែរនៅកូរ៉េខាងជើង ក្នុងអំឡុងពេលនៃកិច្ចប្រជុំកំពូលនាពេលថ្មីៗនេះ នៅក្នុងទីក្រុងប៉េកាំង។

តាមសេចក្តីរាយការណ៍នោះ វិមានប្រធានាធិបតីអាមេរិក បានគូសបញ្ជាក់នៅក្នុងសេចក្តីថ្លែងការណ៍នោះថា៖ «ប្រធានាធិបតី ត្រាំ និងប្រធានាធិបតី ស៊ី បានអះអាងពីគោលដៅរួមគ្នារបស់ពួកគេ ចំពោះការលុបបំបាត់អាវុធនុយក្លេអ៊ែរ «ទាំងស្រុង» នៅកូរ៉េខាងជើង។

**លោក ត្រាំ និងប្រធានាធិបតី ស៊ី (រូបភាព៖Reuters)**

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងបទសម្ភាសន៍មួយជាមួយទូរទស្សន៍ ABC ដែលបានផ្សាយកាលពីព្រឹកថ្ងៃដដែលនោះ តំណាងពាណិជ្ជកម្មអាមេរិក លោក Jamieson Greer ក៏បានលើកឡើងផងដែរថា លោក ត្រាំ និងលោក ស៊ី «បានយល់ស្របគ្នាថា គោលដៅនៅលើទ្វីបកូរ៉េ នៅតែជាការលុបបំបាត់អាវុធនុយក្លេអ៊ែរ»។

ការបញ្ជាក់ជាថ្មីអំពីគោលដៅលុបបំបាត់អាវុធនុយក្លេអ៊ែរនេះ បានធ្វើឡើងចំពេលដែលទីក្រុងព្យុងយ៉ាង កំពុងបង្កើនការអភិវឌ្ឍកម្មវិធីអាវុធនុយក្លេអ៊ែរ និងមីស៊ីលបាលីស្ទិករបស់ខ្លួនទ្វេដង ហើយហាក់បីដូចកំពុងស្វែងរកការទទួលស្គាល់ពីសហគមន៍អន្តរជាតិ ចំពោះឋានៈរបស់ខ្លួនជាប្រទេសមានអាវុធនុយក្លេអ៊ែរ។

ទោះជាយ៉ាងណាក៏ដោយ គេនៅមិនទាន់ច្បាស់នៅឡើយទេថា តើកិច្ចព្រមព្រៀងរបស់ចិនលើគោលដៅនេះ នឹងប្រែក្លាយទៅជាការដាក់សម្ពាធកាន់តែខ្លាំងលើកូរ៉េខាងជើង ឲ្យឈានទៅរកការបោះបង់អាវុធនុយក្លេអ៊ែរដែរឬយ៉ាងណា ដោយសារតែនាពេលកន្លងមក ការអនុវត្តទណ្ឌកម្មរបស់ទីក្រុងប៉េកាំងប្រឆាំងនឹងទីក្រុងព្យុងយ៉ាងហាក់ដូចជាធូររលុងពេក ។

សូមបញ្ជាក់ដែរថា មេដឹកនាំទាំងពីរបានជួបគ្នានៅក្នុងរដ្ឋធានីរបស់ប្រទេសចិន កាលពីថ្ងៃព្រហស្បតិ៍ និងថ្ងៃសុក្រ ដោយនៅក្នុងនោះ ពួកគេបានពិភាក្សាលើបញ្ហាសំខាន់ៗជាច្រើន រួមមានសន្តិសុខនៅលើទ្វីបកូរ៉េ, ស្ថានភាពកោះតៃវ៉ាន់, សង្គ្រាមរវាងសហរដ្ឋអាមេរិក-អ៊ីស្រាអែល ជាមួយប្រទេសអ៊ីរ៉ង់ និងពាណិជ្ជកម្មទ្វេភាគី៕

អត្ថបទ៖ សាង ស្រីល័ក្ខ